އިދިކޮޅު ޕާޓީ، ޕީޕީއެމްއަށް މެމްބަރުން އިތުރު ކުރުމުގެ މަސައްކަތުގެ ތެރެއިން އިތުރު 10،000 މެމްބަރުން ހަމަކޮށް އިލެކްޝަން ކޮމިޝަން (އީސީ) އަށް މިއަދު ފޯމުތައް ހަވާލުކޮށްފި އެވެ.
ޕީޕީއެމުން ފޯމުތައް ހަވާލުކޮށްފައި ވަނީ އެޕާޓީގެ ކޯލިޝަންގައި ހިމެނޭ ޕީއެންސީގެ އިސް ބޭފުޅުންނެވެ. މި ފޯމުތަކާ އީސީން ހަވާލުވެފައި ވަނީ އީސީގެ ރައީސް ފުއާދު ތައުފީގެވެ.
ޕީޕީއެމްގެ ތަރުޖަމާނު ހީނާ ވަލީދު "އަދަދު" އާ ވާހަކަ ދައްކަވަމުން ވިދާޅުވީ މިއަދު ހުށަހެޅު ފޯމުތަކަކީ މީގެ މަހެއްހާ ދުވަސް ކުރިން އެ ޕާޓީން ފެށި މަސައްކަތެއް ކަމަށެވެ. އަލަށް ހުށަހެޅި 10،000 ފޯމަކީ އެޕާޓީއަށް މުޅިން އަލަށް ގުޅުނު މެންބަރުންގެ ފޯމުތައް ކަމަށް ހީނާ ވިދާޅުވި އެވެ.
ހީނާ ވިދާޅުވީ މިއަދު ހުށަހެޅި ފޯމުތަކަކީ އެ ޕާޓީގެ ދާއިރާތަކުގެ އިންތިހާބުގައި ވާދަކުރައްވާ ކެންޑިޑޭޓުން ފުރާފައިވާ ފޯމުތަކެއް ކަމަށެވެ.
ޕީޕީއެމާ އަލަށް ގުޅުނު މެމްބަރުންގެ ފޯމުތައް އިލެކްޝަން ކޮމިޝަނާ ހަވާލުކުރަނީ-- ފޮޓޯ: ޕީޕީއެމް
ޕީޕީއެމްގެ އެތެރޭގެ އިންތިހާބު އޮތީ މި ސެޕްޓެމްބަރު 15، ގަ އެވެ. އެ ޕާޓީން ކުރީން ބުނީ އެތެރޭގެ އިންތިހާބާ ދިމާކޮށް 11،987 މީހަކު އެ ޕާޓީއާ ގުޅެން ހުށައަޅާފައިވާ ކަމަށެވެ.
އޮގަސްޓް 17، 2011 ގައި އުފެއްދި ޕީޕީއެމްގައި މިވަގުތު 38،020 މެމްބަރުން ރަޖިސްޓްރީ ވެފައި އެބަ ތިއްބެވެ. އެ ކޯލިޝަންގެ ޕީއެންސީ ޕާޓީގެ އަދަަދަކީ 3084 މެމްބަރުންނެވެ.
އެ ހުރިހާ ފޯމްތައް ޕްރޮސެސްކޮށް ނިމުމުން 44،000 ވުރެ ގިނަ މެންބަރުން ޕީޕީއެމްގައި ތިބޭނެ ކަމަށް އެ ޕާޓީން ބުނެ އެވެ.
