ޓީޗަރުންގެ ފަރާތުން ލިބޭ ހެޔޮ ތަސައްވަރު ދާއިމަށް ހަރުލާނެ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެެއްޖެ އެވެ.
މިއަދު ފާހަގަ ކުރާ ޓީޗަރުންގެ ދުވަހުގެ ތަހުނިޔާ ދެންނެވުމަށް ކުރެއްވި ޓްވީޓެއްގައި ރައީސް ސޯލިހު އިތުރަށް ވިދާޅުވެފައިވަނީ ދަރިވަރުންނަށް ތައުލީމު އުނގަންނައިދިނުމަށް ޓީޗަރުން ކުރައްވަމުން ގެންދަވާ މިންނެތް ބުރަ މަސައްކަތަށް އެންމެން ވެސް އެ ބޭފުޅުންނަށް ދަރާފައިވާ ކަމަށެވެ.
"މި އަހަރުގެ ޓީޗަރުންގެ ދުވަހުގެ މުނާސަބަތުގައި ހުރިހާ ޓީޗަރުންނަށް ޝުކުރު އަދާކޮށް އެ ބޭފުޅުންގެ މަސައްކަތް އަގުވަޒަން ކުރަން،" ރައީސް ސޯލިހު ވިދާޅުވި އެވެ.
ޓީޗަރުންގެ ދުވަހަކީ އޮކްޓޯބަރު 5 ވަނަ ދުވަހެވެ. ރާއްޖޭގެ ހުރިހާ ސްކޫލުތަކެއްގައި މި ދުވަސް އެކި ފެންވަރުގައި މިއަދު އަންނަނީ ފާހަގަ ކުރަމުންނެވެ.
މި އަހަރުގެ ކުރީކޮޅު ރައީސް ސޯލިހު ވަނީ އެމަނިކުފާނުގެ ރިޔާސީ ވައުދުތަކުގެ ތެރޭގައި ހިމެނޭ ޓީޗަރުންގެ މުސާރައަށް ހެޔޮބަދަލެއް ގެނައުމުގެ ވައުދު ފުއްދަވާފަ އެވެ.
މުސާރައަށް އައި ހެޔޮ ބަދަލު ވެގެން ގޮސްފައިވަނީ ޓިޗަރުންގެ ގިނަ ދުވަސްތަކެއް ވަންދެން ކުރަމުން އައި ދިގު އިންތިޒާރެއްގެ ނިމުމަށެވެ.
