މީގެކުރިން ދެ ފަހަރެއްގެ މަތިން ފަރަށް އަރާފައިވާ ބާޖެއް 100 މިލިއަނުން ޖޫރިމަނާ ކުރިތާ ދެ މަސް ދުވަސް ނުވަނީސް އަނެއްކާ ވެސް ފަރަށް އަރައިފި އެވެ.
ކ. ތިލަފުށީ ކައިރީގައި އޮންނަ ފަރަކަށް އަރާފައި ވަނީ އިންޑިއާ އިން ރާއްޖެއަށް ހިލަ ގެންނަ "އޭއެމް އަލްޕިޓް" ޓަގާ އެކު ދަތުރުކުރާ "އާގަމް" ނަމަކަށް ކިޔާ ބާޖެކެވެ. ތިލަފުށީ ފަރަށް ރޭ މި ބާޖު އެރުމުން މިހާތަނަށް ލިބިފައިވަނީ ކިހާވަރެއްގެ ގެއްލުމެއް ކަމެއް ނޭނގެ އެވެ.
މި މައްސަލައިގެ މައުލޫމާތު އެ ސަރަހައްދުން ދަތުކުރާ އުޅަނދުތައް މެދުވެރިކޮށް ލިބިފައިވާ ކަމަށާއި އަދި އެކަން ބަލަމުންދާ ކަމަށް އެންވަޔަރަމެންޓަލް ޕްރޮޓެކްޝަން އޭޖެންސީ (އީޕީއޭ) އިން "އަދަދު" އަށް ކަށަވަރުކޮށްދިނެވެ. ނަމަވެސް، އެފަދަ މައުލޫމާތެއް އެމްއެންޑީއެފްއިން ހާމަކޮށްފައެއް ނުވެ އެވެ.
މީގެކުރިން، މި ބާޖު ވަނީ ވ. ރަކީދޫ ކައިރީގައި އޮންނަ ފަރަކަށް ވެސް އަރާފަ އެވެ. އެ މައްސަލައިގައި 152،569،800ރ. އިން އެ އުޅަނދުގެ ރާއްޖޭގެ އޭޖެންޓު، މެއިންލޭންޑު ޝިޕިން ޖޫރިމަނާކުރީ އޮގަސްޓު މަހުގެ ތެރޭގަ އެވެ. މިހާތަނަށް އައި އިރު އެ ޖޫރިމަނާ އީޕީއޭއަށް ދައްކާފައިނުވާކަން ވަނީ އެނގިފަ އެވެ.
އެކަމަކު، ގާނޫނުގެ ދަށުން ޖޫރިމަނާ ކުރެވެނީ ގިނަވެގެން 100 މިލިއަން ރުފިޔާ ކަމަށްވާތީ އެ އަދަދު 100 މިލިއަނަށް ކުޑަކޮށް އެ ފަރުގެ 6،054 އަކަމީޓަރުގެ ސަރަހައްދަށް ލިބުނު ގެއްލުމުގެ ބަދަލު ޝަރީއަތް މެދުވެރިކޮށް ހޯދުމުގެ މަސައްކަތް އެޓާނީ ޖެނެރަލްގެ އޮފީހާ އެކު އީޕީއޭ އިން ދަނީ ކުރަމުންނެވެ.
މި ނޫހަށް އިތުބާރު ހުރި މަސްދަރަކުން ކަށަވަރުކޮށްދިން ގޮތުގައި ކ. ވާގިލި ފަރަށް ވެސް މިއަހަރުގެ ތެރޭ މި ބާޖު އެރި އެވެ. އަދި، އެފަހަރު ފަރަށް ލިބުނު ގެއްލުން ނުހޯދެނީސް އެ ބާޖު އީޕީއޭއަށް "ފިލީ" ކަމަށް ވެސް މައުލޫމާތު ލިބެ އެވެ. ނަމަވެސް، މިހާރު އެ ފަރަށް ލިބުނު ގެއްލުމުގެ ބަދަލު ހޯދައި ޖޫރިމަނާ ކުރުމުގެ މަސައްކަތްތައް އީޕީއޭ އިން ދަނީ ކުރަމުންނެވެ.
މި ބާޖު ތިން ފަހަރު ފަރަށް އެރި އިރު ވެސް ޓަގު ބޯޓު ދުއްވަން ހުރީ އެއް ކެޕްޓަނެއް ކަމަށް ވަނީ މައުލޫމާތު ލިބިފަ އެވެ. އަދި، މި މައްސަލަތަކާ ގުޅިގެން އެ ބާޖަށް ރާއްޖޭގައި ދަތުރުކުރުމުގެ ކްލިއަރެންސް ދީފައި ނުވާކަން ވެސް ވަނީ އެނގިފަ އެވެ.
މި މައްސަލަ ވެސް ބަލައި ގާނޫނުގެ ދަށުން އަޅަން ޖެހޭ ފިޔަވަޅުތައް އީޕީއޭ އިން އަޅާނެ ކަމަށް ބެލެވެ އެވެ.
