އިންޑިއާއިން ދިވެހިރާއްޖޭގެ ސިފައިންނަށް އެކި ބާވަތްތަކުގެ 24 އުޅަނދު މިއަދު ހަދިޔާކޮށްފި އެވެ.
ހާރިޖީ މިނިސްޓްރީން މިއަދު ސޯޝަލް މީޑިއާގައި ބުނެފައި އޮތީ އެ އުޅަނދުތަކަކީ އިންޑިއާ އާއި ރާއްޖެއާ ދެމެދު އޮތް ޑިފެންސް އެންޑް ސެކިއުރިޓީ ގުޅުމުގެ ދަށުން ހަދިޔާ ކުރި ތަކެތި ކަމަށެވެ.
"ދިވެހި ސަލާމަތީ ބާރުތަކުގެ ގާބިލްކަން އިތުރު ކުރުމަށް އިންޑިއާ އެއްބާރުލުންދޭ،" ހާރިޖީ މިނިސްޓްރީން ބުނެފައިވެ އެވެ.
އިންޑިއާއިން ހަދިޔާ ކުރި އުޅަނދުތައް ދިވެހި ސަރުކާރާ ރަސްމީކޮށް ހަވާލުކޮށްދެއްވީ މިހާރު ރާއްޖެ ވަޑައިގެން އުޅުއްވާ އެ ގައުމުގެ ފޮރިން ސެކްރެޓަރީ ވިނޭ މޯހަން ވަތުރާ އެވެ. ދިވެހި ސަރުކާރުގެ ފަރާތުން އުޅަނދުތަކާ ހަވާލުވެވަޑައިގަތީ ޑިފެންސް މިނިސްޓަރު މާރިޔާ އަހުމަދު ދީދީ އެވެ.
އެ ރަސްމިއްޔާތުގައި ޗީފް އޮފް ޑިފެންސް މޭޖާ ޖެނެރަލް އަބްދުﷲ ޝަމާލާއި ވައިސް ޗީފް އޮފް ޑިފެންސް ފޯސް ބްރިގޭޑިއާ ޖެނެރަލް ޢަބްދުއްރަޙީމް އަބްދުއްލަތީފްގެ އިތުރުން އެމްއެންޑީއެފްގެ ޖެނެރަލް އޮފިސަރުން ބައިވެރިވެ ވަޑައިގެންނެވި އެވެ.
