ޒަމާނީ ފެންވަރަށް ތަރައްގީކުރުމަށް ކުރަމުން އަންނަ އޮލިމްޕްސް ހުޅުވުމުގެ މަސައްކަތް ކުރަމުން ދާއިރު، އޮލިމްޕަހުގެ ކޮރިޑޯތަކުގައި މުށިޖެހުމުގެ މަސައްކަތް ކުރަން މިނިސްޓްރީ އޮފް އާޓްސް، ކަލްޗާ އެންޑް ހެރިޓޭޖް އިން އިއުލާން ކޮށްފި އެވެ.
ރާއްޖޭގެ ފިލްމް އިންޑަސްޓްރީގެ މަސައްކަތްތަކާ ގުޅިލާމެހިފައިވާ އޮލިމްޕަހުގައި ކުރިއަށްދާ މަސައްކަތްތަކާއި، އޮލިމްޕަސް އަލުން ހުޅުވޭނެ ތާރީހަކާއި ދޭތެރޭ އެ އިންޑަސްޓްރީގެ ބައެއް ފަރާތްތަކުން ވަނީ މިފަހުން ކަންބޮޑުވުން ފާޅުކޮށްފަ އެވެ.
އެންމެ ފުރަތަމަ އެންސީއޭއިން ވަނީ އެ މަސައްކަތް ޖޫން މަހުގެ ފަހުކޮޅަށް ނިމި، އޮލިމްޕަސް އަލުން ހުޅުވާލެވޭނެ ކަމަށް ބުނެފަ އެވެ. ނަމަވެސް ޖޫން މަސް ފަހަނައަޅާ ގޮސް އެ ފަހުން ވަނީ ސެޕްޓެމްބަރަށް ހުޅުވަން މަސައްކަތް ކުރާ ކަމަށް ބުނެފަ އެވެ.
ސެޕްޓެމްބަރު މަސް ނިމިފައި ވާއިރު، މިނިސްޓްރީން އިއްޔެ ކުރި އިއުލާނެއްގައި ބުނީ އެ މިނިސްޓްރީން ދޭ މައުލޫމާތާ އެއްގޮތަށް އޮލިމްޕަހުގެ ހުޅަނގު ކޮރިޑޯ އާއި ދެކުނުކޮރިޑޯގައި މުށިޖެހުމުގެ މަސައްކަތް ކޮށްދޭނޭ ފަރާތެއް ހޯދަން ބޭނުންވާ ކަމަށެވެ.
އެންސީއޭއިން މީގެ ކުރިން ބުނެފައި ވަނީ އެތަން ހުޅުވުން ލަސްވެފައި ވަނީ ކޮވިޑް-19 އާއި ރަޝިއާ-ޔޫކްރެއިން ހަނގުރާމައިގެ ސަބަބުން މުދާ އުފުލާ ބޯޓު ފަހަރުގެ ދަތުރުތަކަށާއި ތެލުގެ އަގަށް އައި ބަދަލުތަކުގެ ސަބަބުންނާއި ތަކެތީގެ އަގު އުފުލި، މަޝްރޫއުގެ ބަޖެޓުގެ ތެރެއިން ގެނެވޭ ވަރަށް ވުރެ ތަކެތީގެ އަގުބޮޑުވުމާ ގުޅިގެން ކަމަށެވެ.
އެ ސަބަބަށްޓަކައި ލަސްތަކެއް ވީނަމަވެސް، ވީހާވެސް އަވަހަށް އޮލިމްޕަހުގެ މަސައްކަތް ނިންމުމަށް ކެނޑިނޭޅި މަސައްކަތް ކުރަމުންދާކަމަށް ވެސް އެންސީއޭއިން ބުނެފައިވެ އެވެ.
އެންސީއޭއިން ބުނީ އޮލިމްޕަސް ތަރައްގީކުރުމުގެ ދެ ވަނަ ފިޔަވަހީގެ މަސައްކަތް ފެށިފައިވަނީ މިދިޔަ މާޗު މަހުގެ އަށް ވަނަ ދުވަހުު ކަމަށެވެ.
މި މަސައްކަތުގެ ފުރަތަމަ ފިޔަވަހީގައި އޮލިމްޕަހުގެ ޓެރަސްއިން އިމާރާތުގެ ތެރެއަށް ފެން ލީކުވުން ހުއްޓުވުމަށްޓަކައި ޓެރަސް މަރާމާތުކޮށް، އޮލިމްޕަހުގެ އެކި ހިސާބުތަކުގައި ޝީޓު ކަނޑައިގެންދިއުމާއި، ރެނދުލުމުގެ ސަބަބުން ކޮންކްރީޓަށާއި ފާރުތަކަށް ލިބިފައިވާ ގެއްލުންތައް ވަނީ މަރާމާރުކުރެވިފަ އެވެ.
އޭގެ އިތުރުން ވެސް ހާއްސަ އެހީއަށް ބޭނުންވާ ފަރާތްތަކަށް އޮލިމްޕަހުން ހިދުމަތް ހޯދުން ފަސޭހަކުރުމަށް އެތަނުގެ ހޯލަށާއި ގޯތިތެރެއަށް ފުރޮޅުލީ ގޮނޑީގައި ވަދެނުކުމެ އުޅުމަށް ހާއްސަ ރޭމްޕް އެކްސެސް ވެސް މިހާރު ގާއިމުކޮށްފައިވެ އެވެ.
އޮލިމްޕަސް މަރާމާތުކުރުމުގެ މަސައްކަތަކީ އިންޑިއާ ސަރުކާރުގެ ހިލޭ އެހީގެ ދަށުން ކުރިއަށް ގެންދާ މަސައްކަތެކެވެ.
