ކުރިޔަށް އޮތް ފަސް ދުވަހު މޫސުން ވަރަށް ބޮޑަށް ގޯސްވެދާނެ ކަމަށް ލަފާކުރެވޭތީވެ، ސަމާލުވުމަށް މޯލްޑިވްސް މީޓިއޮރޮޖިކަލް ސާވިސް (މެޓް އޮފީސް) އިލްތިމާސްކޮށްފި އެވެ.
މެޓް އޮފީހުން ބުނީ ރާއްޖޭ ސަރަހައްދުގައި ހުޅަނގު މޫސުމުގެ ބާރުގަދަވެ، ކުރިއަށް އޮތް ފަސް ދުވަހު، ހާއްސަކޮށް އުތުރާއި މެދު ރާއްޖެތެރޭގައި ވައި ގަދަވުމާއެކު ކަނޑުތައް ވަރަށް ބޮޑަށް ގަދަވެގެން ދާނެކަމަށް ލަފާކުރެވޭ ކަމަށެވެ.
"ވީމާ ހުރިހާ ފަރާތްތަކުން، ހާއްސަކޮށް ކަނޑުދަތުރު ކުރައްވާ ފަރާތްތަކުން މޫސުމަށް ވަރަށް ބޮޑަށް ސަމާލު ވުމަށް ދަންނަވަން،" މެޓް އޮފީހުން ބުނެ އެވެ.
މޫސުން ގޯސްވުމަށް ލަފާކުރުމާއެކު، ނެޝަނަލް ޑިޒާސްޓަ މެނޭޖްމެންޓު އޮތޯރިޓީ ވެސް އިލްތިމާސް ކުރީ، ދަތުރުފަތުރު ކުރުމުގައި ރައްކާތެރިކަމުގެ ފިޔަވަޅު އެޅުމަށެވެ.
"ސަލާމަތްވެ ތިބެވޭނީ ސަލާމަތްވާނެ މަގު ހޯދައިގެން،" އެންޑީއެމްއޭ އިން ބުންޏެވެ.
އެންމެ ފަހުން މެޓް އޮފީހުން ނެރެފައިވާ ވައިޓް އެލާޓުގައި ބުނެފައި ވަނީ ހއ. އަތޮޅުން ފެށިގެން މ. އަތޮޅާ ދެމެދު ގަޑިއަކު 22 މޭލާއި 27 މޭލާ ދެމެދުގެ ބާރުމިނެއްގައި ވައިޖެހޭނެ ކަމަށާއި ވިލާގަނޑުގެ ވައި 45 މޭލަށް ބާރުގަދަވާނެ ކަމަށެވެ. އަދި ކަނޑުތައް ވެސް ގަދަވާނެ ކަމަށް ލަފާ ކުރެ އެވެ.
