މާލެއަށް އެތެރެކޮށް ގެންގުޅެވޭނެ އެއްގަމު އުޅަނދުގެ ލިމިޓު ކަނޑައަޅަން ބުނި މުއްދަތުގައި އެކަން ނުކުރެވި، މުއްދަތު ފަހަނަ އަޅައި ހިނގައްޖެ އެވެ.
ވެހިކަލް އެތެރެކުރެވޭނެ އަދަދު ކަނޑައެޅުމަކީ ގާނޫނުން ކައުންސިލުގެ މައްޗަށް ލާޒިމްކޮށްފައި އޮތް ކަމެކެވެ. އެ ބާރު ލޯކަލް ކައުންސިލުތަކަށް ލިބޭ ގޮތަށް ގަވާއިދު އެކުލަވާލައި އަމަލު ކުރަންފެށީ މިދިޔަ ޑިސެމްބަރު މަހު އެވެ.
މިދިޔަ ފެބްރުއަރީ މަހުގެ ތެރޭގައި މާލެ ސިޓީ ކައުންސިލްގެ މޭޔަރު ޑރ. މުހައްމަދު މުއިއްޒު ވަނީ އެ މަސައްކަތް ފަސް މަސް ދުވަހުގެ ތެރޭގައި ނިންމާލެވޭނެ ކަމަށް ވިދާޅުވެފަ އެވެ. ނަމަވެސް ވެހިކަލް ލިމިޓް މިހާތަނަށް ކަނޑައެޅިފައި ނުވެ އެވެ.
"އެ ގަވައިދު އޮންނަނީ އެހެން، ހަ މަސް ތެރޭގައި ޖެހޭ ކަނޑައަޅަން، އެކަމަކު އިއުލާނުކޮށްގެން އެކްސްޕާޓެއް ނުލިބުނީމާ އަޅުގަނޑުމެން ކިހިނެއްތޯ ހަދަނީ، އަޅުގަނޑުމެން އަމިއްލައަކަށް ނުނިންމޭނެ ނޫންތޯ،" ލިމިޓު ކަނޑައެޅުން ލަސްވަނީ ކީއްވެތޯ "އަދަދު" އިން ސުވާލުކުރުމުން މުއިއްޒު ވިދާޅުވި އެވެ.
މުއިއްޒު ވިދާޅުވި ގޮތުގައި ސިޓީ ކައުންސިލުން އެ މަސައްކަތް ކުރަން ބޭނުންވަނީ ފެންވަރު ރަނގަޅު އެ ކަމުގެ ތަޖުރިބާކާރެއްގެ ލަފާގެ މަތީންނެވެ. ނަމަވެސް އެތައް ފަހަރެއްގެ މަތިން އިއުލާނުކޮށްގެން ވެސް ތަޖުރިބާކާރެއް ލިބިފައި ނުވާ ކަމަށް މޭޔަރު ވިދާޅުވި އެވެ.
"އެއީ މާ ފަސޭހަ ކަމެއް ނޫން، މާލޭގައި ދުއްވޭނީ މިހާ އަދަދެއްގެ ސައިކަލޭ ކާރޭ ނުވަތަ ޕިކަޕޭ ބުނެ ކަނޑައަޅަން،" މުއިއްޒު ވިދާޅުވި އެވެ.
ރާއްޖޭގެ އެހެނިހެން ރަށްރަށަށް ވުރެ މާލޭގައި ވެހިކަލްތައް ގިނަ ކަން ފާހަގަކުރައްވައި މުއިއްޒު އިތުރަށް ވިދާޅުވީ މި ކަމަކީ ވަރަށް ޒިންމާދާރު ކަމާ އެކުގައި ކުރަން ޖެހޭ ކަމެއް ކަމަށެވެ.
