ދިވެހި ގައުމިއްޔަތަށް އޮތް އެންމެ ބޮޑު ގޮންޖެހުމަކީ އަދި ނުރައްކަލަކީ ދީނަށް ފުރައްސާރަ ކުރުމާއި ދީނީ ހަރުކަށި ފިކުރުތައް ކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެ އެވެ.
މިއަދު ފާހަގަކުރާ ގައުމީ ދުވަހާ ގުޅިގެން "އަދަދު" ނޫހަށް ދިން ހާއްސަ އިންޓަވިއެއްގައި މިނިސްޓަރު އިމްރާން ވިދާޅުވީ ދީނަށް ފުރައްސާރަ ކުރުމާއި ހަރުކަށި ފިކުރުތަކުގެ ސަބަބުން ގެއްލުންތައް ކުރިމަތިވަމުން އަންނަ ކަމަށެވެ.
"ދީނަށް ބައެއް ފަހަރަށް ގޮންޖެހުމާއި މަލާމާތް ކުރުމާއި ފުރައްސާރަ ކުރުމުގެ މައްސަލަ އަށަގަނެ އިތުރުވަމުން ދިޔަ ދިއުން އެއީ ހަމަ ބޮޑު ގޮންޖެހުމެއް، އަނެއް ކޮޅުން ދީނުގެ ނަމުގައި ހަރުކަށި ފިކުރުތައް ގެންގުޅެ އޭގެ ސަބަބުން މުޖުތަމައުގެ އަފުރާދުންނަށް ނުރައްކަލާއި ގެއްލުން އަދި ބައެއް ފަހަރަށް ދައުލަތުގެ މުދަލާއި ވަސީލަތްތަކަށް ގެއްލުންވާ ހިސާބަށް ކަންކަން ދިއުން އެއީ އޭގެ ތެރޭގައި ހިިމެނޭ ނުރައްކާތެރި ކަމެއް،" އަދާލަތު ޕާޓީގެ ރައީސްގެ ގޮތުގައި ވެސް ހުންނެވި ދީނީ އިލްމުވެރިޔާ ޝެއިޚު އިމްރާން ވިދާޅުވި އެވެ.
ދިވެހިންނަކީ ނުވަސަތޭކައެއްހާ އަހަރު "އެއްބައިވަންތައް މުސްލިމުންތަކެއް"ގެ ގޮތުގައި ތިބި ބައެއްކަން ފާހަގަ ކުރައްވައި އިމްރާން ވިދާޅުވީ އިސްލާމީ ސައްހަ އަގީދާ އާއި ހެޔޮލަފަ އާއި ރަނގަޅު އަހުލާގާއި އާދަކާދަ ދެމެހެއްޓުމަށް އެންމެން ވެސް މަސައްކަތް ކުރަން ޖެހޭ ކަމަށެވެ.
ދީނާއި ދުރަށް ދާ ފަރާތްތައް ވެސް ހަމަ މަގަށް ގެނައުން މުހިންމު، ހަރުކަށި ފިކުރުތަކުން ދީން ސަލާމަތް ކުރުން ވެސް މުހިންމު،" އޭނ ވިދާޅުވި އެވެ.
ގައުމިއްޔަތަށް ކުރިމަތިވެދާނެ ހުރިހާ ގޮންޖެހުންތަކުން ވެސް ސަލާމަތް ކުރުމަށް، ހުރިހާ ދިވެހިން އެއް ވިސްނުމެއްގައި މަސައްކަތް ކުރަން ޖެހޭ ކަމަށް ވެސް އިމްރާން ވިދާޅުވި އެވެ.
"އަޅުގަނޑުމެން ތެރޭގައި ސިޔާސީ ބައެއް ތަފާތުވުންތައް ހުންނާނެ އަދި ބައެއް ކަހަލަ މައްސަލަތަކުގައި އިޖުތިމާއީ ތަފާތުކުރުންތައް ވެސް ހުރެދާނެ، އެކަމަކު މުޅި ގައުމާ ގުޅުންހުރި ކަންކަމުގައި ގައުމީ މަސްލަހަތަށް އެންމެންގެ ވިސްނުން އެއްގޮތް ކުރަން ވާނެ،" އޭނާ ވިދާޅުވި އެވެ.
ގައުމިއްޔަތުގެ އެންމެ ބޮޑު ބޮޑު ބަހާއެއްގެ ގޮތުގައި ގަބޫލުކުރަނީ ދީނާއި ބަހާއި ތާރީހު ކަމަށާއި އެ ވިސްނުން އިސްކޮށް ގައުމިއްޔަތުގެ ސިފަތައް ދިރުވާ އާލާކުރަން އެންމެން ވެސް ވިސްނަން ޖެހޭ ކަމަށް އިމްރާން ވިދާޅުވި އެވެ.
މި އަހަރުގެ ގައުމީ ދުވަސް ރަސްމީކޮށް ފާހަގަކުރަނީ މި ދުވަސް އެ ބޭފުޅަކަށްޓަކައި ހާއްސަވާ، ޕޯޗްގީޒުންގެ އަޅުވެތިކަމުން ރާއްޖެ ސަލާމަތްކޮށް ދެއްވި ބަތޮލު މުހައްމަދު ތަކުރުފާނުގެ އުފަން ރަށް، ހއ. އުތީމުގަ އެވެ. މި ރަށުގައި ރޭ ވެސް ބައެއް ހަރަކާތްތައް ކުރިއަށް ގެންދިޔައިރު، ގައުމީ ދުވަހުގެ ހާއްސަ ޖަލްސާ މިއަދު ހެނދުނު 9:00 ގައި އޮންނާނެ އެވެ.
