އައިޖީއެމްއެޗްގައި ނަރުހެއްގެ ވަޒީފާ އަދާކުރަމުން ދިޔަ މެރީ ގްރޭސް އައިޖީއެމްއެޗަށް ގެންގޮސް ދިން ފަރުވާގެ ޕޭޝަންޓް ޗާޓުތައް އޭނާ މަރާލި ކަމުގެ ދައުވާ އުފުލާފައިވާ ހަލީމަތު ލަމްހާ އަބްދުލްރަހްމާންގެ ދިފާއު ބިނާކުރަން ބޭނުންވާތީވެ އެ ޗާޓުތައް ދިނުމަށް ޝަރީއަތުން މިއަދު އަންގައިފި އެވެ.
މޭރީ ގްރޭސް މަރާލީ ބޮލަށާއި ކަރަށް ހަމަލާދީ ނޭވާ ހާސްކޮށްލައިގެން އޭނާގެ އޮޓޮޕްސީ ރިޕޯޓުން ދައްކާއިރު، އެ ކަން ކުރީ އޭނާގެ ފިރިމީހާ މާވިން އެސްވައި ވާގަސް އާއި އޭނާގެ ލޯބިވެރިޔާ ލަމްހާ ކަމަށް ދައުލަތުން ދައުވާ ކުރެ އެވެ. މާވިން ވެސް މަސައްކަތް ކުރީ އައިޖީއެމްއެޗްގެ ނަރުހެއްގެ ގޮތުގަ އެވެ.
އައިޖީއެމްއެޗްގައި ކޮންމެ ޕޭޝަންޓަކަށް ތައްޔާރު ކުރާ މެޑިކަލް ޗާޓުތަކެއް އޮންނައިރު، އެންމެ ފަހުން މޭރީ ގްރޭޝް ގެންދިޔައިރު އެފަދަ ޗާޓެއް އޮންނާނެ ކަމަށް ބެލެވޭނެތީވެ އެ ޗާޓުތައް ދިނުމަށް ލަމްހާގެ ފަރާތުން ހުށަހެޅީ ޝަރީއަތުގެ ކުރިން ހުށަހަޅާ ހުށަހެޅުންތަކުގެ ގޮތުގަ އެވެ.
މިއަދު އޮންލައިންކޮށް ކްރިމިނަލް ކޯޓުން ބޭއްވި ޝަރީއަތުގެ އަޑުއެހުމުގައި ކުރިއަށް ގެންދިޔައީ ޝަރީއަތުގެ ކުރިން ހުށަހަޅާފައިވާ ހުށަހެޅުންތަކަށް ގޮތެއް ނިންމުމެވެ.
މޭރީ ގްރޭސް ހޮސްޕިޓަލަށް ގެނެވުނު ވަގުތާއި މަރުވި ވަގުތާއި އެއަށް ފަހު ހޮސްޕިޓަލުން އެ ކޭސްގައި އަމަލުކޮށްފައިވާ ހުރިހާ ކަމެއް ފެންނަ ގޮތަށް ތައްޔާރުކޮށްފައިވާ އެފަދަ ޗާޓުތަކެއް އޮތް ނަމަ ހަތް ދުވަހުގެ ތެރޭގައި ދިފާއަށް ދިނުމަށް މައްސަލަ ބައްލަވާ ގާޒީ ހުސައިން ފާއިޒު ރަޝާދު ދައުލަތަށް އެންގެވި އެވެ.
އޭގެ އިތުރަށް ލަމްހާގެ ގެއިން ފެނިފައިވާ ބޭސްތަކުގެ ބެޗު ނަންބަރުތަކާއި އެއާ ގުުޅުން ހުރި އެހެން މައުލޫމާތުތައް ހޯދުމަށް ވެސް އަމުރެއް ނެރެދޭން ލަމްހާގެ ފަރާތުން ހުށަހަޅާފައިވެ އެވެ. ނަމަވެސް އެއީ ލިޔެކިއުންތަކުން މިހާރު ވެސް އެނގެން އޮތް މައުލޫމާތަކަށް ވާތީ އެ އަމުރު ނެރެނުދިނެވެ.
ދައުލަތުގެ ފަރާތުން ހުށަހެޅީ ލަމްހާގެ ދިފާއީ ހެކިންގެ ގޮތުގައި ހުށަހަޅާފައިވާ 12 ހެއްކެއް ބަލައިނުގަތުމަށެވެ. ނަމަވެސް އެއިން ދެ ހެކި ފިޔަވައި އެހެން ހެކިތައް ބަލައިގަންނަން ގާޒީ ފާއިޒު ނިންމެވި އެވެ.
ބަލައިނުގަތުމަށް ނިންމި ދެ ހެއްކަކީ ޑރ. ޔޫސުފް ޝާނާއި، ލަމްހާ އިންޓަވިއު ދީފައިވާ ސަން އޮންލައިންގެ އެސިސްޓެންޓް މެނޭޖިން އެޑިޓަރު އަހުމަދު ސާއިލް އެވެ.
ދެން އޮންނާނީ ޝަރީއަތް ފެށުމެވެ. އެ ގޮތުން އަންނަ މަހުގެ އޮކްޓޯބަރު މަހުގެ ހަތަރުވަނަ ދުވަހު އަޑުއެހުމެއް ބާއްވަން ވަނީ ނިންމައިފަ އެވެ. ޝަރީއަތް ފެށުމުގެ ގޮތުން ދެ ފަރާތުން ވެސް އިފުތިތާހީ ބަޔާނެއް ހުށަހަޅާނެ އެވެ. އެއަށްފަހު ދެން ކުރިއަށް ދާނީ ހެކިންގެ ހެކިބަސް ނެގުމެވެ.
މައްސަލައިގެ ފަސްފަހަތް
މޭރީ ގްރޭސް އަކީ އައިޖީއެމްއެޗްގެ ޑައިލެސިސް ޑިޕާޓްމެންޓްގެ ނަރުހެކެވެ. އޭނާގެ ފިރިމީހާ މާވިންއާއި ލަމްހާއަކީ ކެޝުއަލްޓީގައި މަސައްކަތް ކުރާ ނަރުހުންނެވެ. މޭރީގެ ހަށިގަނޑު ޕޯސްޓްމޯޓަމް ހެދި އިރު މޭރީ މަރުވެފައި ވަނީ ބޮލަށް ދީފައިވާ ބޮޑު އަނިޔާއަކުން ކަން ރިޕޯޓުން ވަނީ ދައްކައިފައެވެ.
މިދިޔަ އަހަރުގެ އޮކްޓޯބަރު މަހުގެ 19 ވަނަ ދުވަހު މޭރީ މަރުވެގެން ފުލުހަށް ރިޕޯޓް ކުރީ ވެސް މާވިން އެވެ. މާވިން ރިޕޯޓް ކުރީ މޭރީ ދަންޖެހިގެން މަރުވެފައި ހުއްޓައި ފެނިގެން ކަމުގަ އެވެ. ނަމަވެސް ޝައްކު ކުރެވޭ ބައެއް ކަންކަން ހުރުމާއެކު މައްސަލައިގެ ތަހުގީގު އެ ހިސާބުން ފެށި އެވެ.
ދަންޖެހިގެން މަރުވި ކަމަށް ބުނެ ރިޕޯޓް ކުރިޔަސް ތުހުމަތު ކުރެވޭ ކަންކަން ހުރުމުން ފުލުހުން ތަހުގީގު ހިންގުމަށް ފަހު މާވިން ހައްޔަރު ކުރީ އޮކްޓޯބަރު 27 ގަ އެވެ. އޭގެ ފަހުން ލަމްހާ ހައްޔަރު ކުރީ އޭގެ 50 ދުވަސް ފަހުން ޑިސެމްބަރު 16 ގަ އެވެ.
މާވިންގެ މައްޗަށް މަރުގެ ދައުވާ އުފުލާފައިވާއިރު، ލަމްހާގެ މައްޗަށް މަރުގައި ބައިވެރިވުމުގެ ދައުވާގެ އިތުރަށް އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތެއްގައި ބާރު ހިންގުމުގެ ދައުވާއާއި ހުއްދަ ނަގައިގެން ކުރަން ޖެހޭ ކަމެއް ހުއްދަ ނުނަގާ ކުރުމުގެ ދައުވާ އުފުލާފައިވެ އެވެ. އެއީ އައިޖީއެމްއެޗުން ހުއްދަ ނުނަގާ، ނުރައްކާތެރި ބައެއް ބޭސްތަކެއް ލަމްހާ ނެގި ކަމަށް ތުހުމަތުކޮށެވެ.
