ސީޕްލޭންގެ ހިދުމަތް އެންމެ ބޮޑަށް ބޭނުންވާ ރަށްތައް މިހާރު ކަނޑައަޅާފައިވާ ކަމަށާއި އެއީ މ. މުއްޔާއި ހދ. މަކުނުދޫ ކަމަށް ސަރުކާރުން މިއަދު ބުނެފި އެވެ.
ރައްޔިތުންގެ މަޖިލީހުގެ ގައުމީ ތަރައްގީއާއި ތަރިކައިގެ ކޮމިޓީއަށް މިއަދު ހުށަހެޅި އަހަރީ ރިޕޯޓްގައި ޓްރާންސްޕޯޓް މިނިސްޓްރީން ބުނީ ސީޕްލޭން ހިދުމަތް އެންމެ ބޮޑަށް ބޭނުންވާ ރަށްތައް ކަނޑައަޅައި, އެ ހިދުމަތަށް ބޭނުންވާ ޕްލެޓްފޯމް އަޅާނެ ތަންތަން ވެސް މިހާރު ނިންމާފައިވާ ކަމަށެވެ.
"ނެޝަނަލް ސްޕޭޝަލް ޕްލޭނާ އެއްގޮތަށް، މީހުން ދިރިއުޅޭ ރަށްތަކަށް ސީޕްލޭންގެ ހިދުމަތް ފުޅާކުރުން. އެގޮތުން ނެޝަނަލް ސްޕޭޝަލް ޕްލޭންގެ ދަށުން، ސީޕްލޭންގެ ހިދުމަތް އެންމެ ބޮޑަށް ބޭނުންވާ ރަށްތައް ކަނޑައެޅުނު. [އެއީ] މުލި އަދި މަކުނުދޫ،" ޓްރާންސްޕޯޓް މިނިސްޓްރީގެ ރިޕޯޓްގައި ބުންޏެވެ.
އެ ދެރަށަށް ސީޕްލޭން ދަތުރުތައް ފަށަނީ، ކޮންމެ ރަށަކުން ވެސް 30 މިނެޓުން ދަތުރުކުރެވޭ ހިސާބެއްގައި އެއާޕޯޓެއް ބޭއްވުން ނުވަތަ ވައިގެ ދަތުރަކަށް ފެށޭނެ އިންތިޒާމު ހަމަޖައްސަން ސަރުކާރުން ވެފައިވާ ވައުދު ފުއްދުމަށެވެ.
ސީޕްލޭން ހިދުމަތް އެންމެ ބޮޑަށް ބޭނުންވާ ކަމަށް ސަރުކާރުން ކަނޑައެޅި ދެ ރަށުގައި ވެސް އެއާޕޯޓް އަޅަން ވަނީ ނިންމައިފަ އެވެ. ސީޕްލޭންގެ ހިދުމަތް ފަށަނީ ބެލެވޭ ގޮތުގައި އެ ދެ އެއާޕޯޓް ނިމެންދެން ދޭ ވަގުތީ ހިދުމަތެއްގެ ގޮތުގަ އެވެ.
ޓްރާންސްޕޯޓް މިނިސްޓްރީގެ ރިޕޯޓްގައިވާ ގޮތުން މުއްޔާއި މަކުނުދޫގައި އެއާޕޯޓް އަޅައި ނިމުމުން، ރާއްޖޭގެ މީހުން އުޅޭ ކޮންމެ ރަށަކުން ވެސް 30 މިނެޓުން ދަތުރުކުރެވޭ ހިސާބުގައި އެއާޕޯޓެއް އޮންނާނެ އެވެ.
