މި ދުވަސްވަރު ރާއްޖޭގެ ހުރިހާ ސަރަހައްދަކަށް މަސްވެރިކަން ރަނގަޅުވި ނަމަވެސް މަސް ކިރުވުން ލަސްވާ ކަމަށާއި މިފްކޯގައި ކެޕޭސިޓީ ނެތް ކަމުގެ ޝަކުވާ މަސްވެރިން ކޮށްފި އެވެ.
މަސްވެރިކަމުގެ ފަހި މޫސުން ފެށި، އެކި ހިސާބުތަކުން ދަނީ ގިނަ އަދަދަކަށް މަސް ބާނަމުންނެވެ. އެގޮތުން ބައެއް ދޯނިތަކުން 30 ޓަނު، 40 ޓަނުވެސް ދަނީ ބާނަމުންނެވެ.
މިވަގުތު މިފްކޯއަށް މަސް ކިރުމަށް އައްޑޫއަށް ގޮސް އޮތް ފަރެސްމާތޮޑާގެ މަސްވެރިއަކު ބުނީ މަސް ކިރުމަށް ކިޔުއަށް އެރީ އިއްޔެ ކަމަށެވެ. ނަމަވެސް އަދިވެސް މަސް ކިރުވިފައި ނުވާ ކަމަށް އޭނާ ބުންޏެވެ.
"ކިޔު ވަރަށް ދިގު. އިއްޔެ އައި ގޮތަށް މި ތިބީ. އަދި ކިރޭ ގޮތެއް ނުވޭ. މިހާރު މަސް ކިރާއިރު ވަކި ލިމިޓެއް ނެތި މަސް ނަގާތީ ފަސޭހަ، ބާނައިގެން އަންނަ ހުރިހާ މަހެއް ނަގާ،" އޭނާ ބުންޏެވެ.
މި ނޫހާ ވާހަކަ ދައްކަމުން އެހެން މަސްވެރިއަކު ބުނީ ގިނަ ދުވަސްތަކަކަށްފަހު މަސް ބޭނިގެން މަސް ކިރަން އަނެއްކާވެސް އުނދަގޫވެފައިވާ ކަމަށެވެ.
"މިހާ ދުވަހުން މަސް ބާނައިގެން އައީމަވެސް މަސްވެރިން މި ޖެހެނީ މަސް ނުކިރިގެން ނޫނީ އައިސް ނުލިބިގެން އުޅެން. އެއްކޮޅަށް ދުއްވާފަ އަނެއްކޮޅަށް ދުއްވާފަ އުޅެން،" އޭނާ ބުންޏެވެ.
"މިފްކޯއިން ބުނަނީ އިތުރު ބޯޓެއް ގަންނަން ބަލަމުންދާ ކަމަށް"
މަސްވެރިކަން އިންތިހާއަށް ރަނގަޅުވެ މިފްކޯގެ ކެޕޭސިޓީއަށް ވުރެ އިތުރަށް މަސް ބޭނުމަކީ މީގެ ކުރިންވެސް މަސްވެރިކަމުގެ މޫސުމުގައި ދިމާވާ އެންމެ ބޮޑު ގޮންޖެހުމެވެ.
އެކަމަށް ހައްލެއް ގެނައުމަށް ބާނަމުންދާ ހުރިހާ މަސް ގަނެވޭނެ ގޮތެއް ހޯދުމުގެ މަސައްކަތުގައި ބޭރުގެ ބޯޓެއް ގެންނަން ހަމަޖެހިފައިވާ ކަމަށް ފިޝަރީޒް މިނިސްޓަރު ޑރ. ހުސައިން ރަޝީދު ހަސަން ވިދާޅުވެފައި ވަނީ މިދިޔަ އޭޕްރީލް މަހު އެވެ.
އަދި މަސްވެރިކަމުގެ މޫސުން ފެށުމުގެ ކުރިން އެކަން ކުރުމަށް މަސައްކަތް ކުރަމުންދާ ކަމަށްވެސް އޭނާ ވިދާޅުވި އެވެ.
މަސްވެރިކަން ރަނގަޅު ދުވަސްވަރު މަސް ނުކިރޭ މައްސަލައަށް އެކަށީގެންވާ ހައްލެއް ގެނައުމަށް ކުރަމުންދާ މަސައްކަތްތަކާ ގުޅޭގޮތުން ސުވާލު ކުރުމުން މިފްކޯގެ އެމްޑީ އިސްމާއިލް ފައުޒީ މި ނޫހަށް ވިދާޅުވީ ސްޓޯރޭޖް ކެޕޭސިޓީ ރަނގަޅު ކުރުމަށް މެޝިނަރީއަށް ގެންނަން ޖެހޭ ބަދަލުތައް ގެނައުމަށް މަސައްކަތް ކުރަމުންދާ ކަމަށެވެ.
"މީގެ އިތުރުން ކެޕޭސިޓީ އިތުރު ކުރުމަށް އަޅުގަނޑުމެން މި ދަނީ އިތުރު ބޯޓުފަހަރުވެސް ބަލަމުން. މިއީ ބާޒާރުން ޗޮކްލެޓް ގަތުން ކަހަލަ ކަމެއް ނޫން. ވަގުތު ނަގާނެ. ބަލަން ޖެހޭ ކަންކަން ބަލާ ގަންނައިރު ގަންނާނީ ރަނގަޅު އެއްޗެއް،" ފައުޒީ ވިދާޅުވި އެވެ.
އޭނާ އިތުރަށް ވިދާޅުވީ ކެޕޭސިޓީގައި ހުރި ވަރަކުން މަސް ނަގަމުންދާނެ ކަމަށެވެ. އެގޮތުން ބައެއް ދޯނިތަކުން ދެ ބުރަށް މަސް ބަނައިގެން މަސް ކިރަމުންދާ ކަމަށް އޭނާ ވިދާޅުވި އެވެ.
މިފްކޯއަށް މަސް ގަންނަ މިންވަރު އިތުރުކުރުމަށާއި، ފިނިކޮށްފައި މަސް ބެހެއްޓޭ ޖާގަ އިތުރުކުރުމަށް މަޝްރޫއުތަކެއް ވެސް ވަނީ ފަށައިފަ އެވެ.
