އިރުމަތީ އޭޝިއާ އަދި ޔޫރަޕުގެ ސަރަހައްދީ ސަލާމަތާއި ރައްކާތެރި ކަމަށް މަސައްކަތް ކުރާ ޝަންހާއީ ކޯޕަރޭޝަން އޯގަނައިޒޭޝަން (އެސްސީއޯ) ގެ ޑަޔަލޮގް ޕާޓްނަރެއްގެ ގޮތުގައި ރާއްޖެ ހަމަޖައްސައިފި އެވެ.
އުޒްބެކިސްތާނުގެ ވެރިރަށް ޓަޝްކެންޓުގައި ކުރިއަށްދިޔަ އެސްސީއޯ ގައުމުތަކުގެ އެންމެ އިސްވެރިންގެ ބައްދަލުވުމުގައި ވަނީ ޑަޔަލޮގް ޕާޓްނަރެއްގެ ގޮތުގައި ރާއްޖެ ހަމަޖެއްސުމަށް ވަނީ ފާސްކޮށްފަ އެވެ. އެ ޖަމާއަތުގެ ޕާޓްނަރެއްގެ ގޮތުގައި ރާއްޖެ ހަމަޖެއްސުމަށް އެންމެ ފުރަތަމަ ނިންމީ ޖުލައި މަހުގެ ފަހުކޮޅު ޓަޝްކެންޓުގައި ބޭއްވި ފޮރިން މިނިސްޓަރުންގެ ބައްދަލުވުމުގަ އެވެ.
"ރާއްޖެ އިން ދެކޭ ގޮތުގައި ޑަޔަލޮގް ޕާޓްނަރަކަށް ވުމަކީ ސަރަހައްދީ އިގްތިސާދީ ހަރަކާތްތަކުގެ އުޅުމުގެ ފުރުސަތު ވަރަށް ބޮޑަށް ތަނަވަސްވެ، މެމްބަރު ގައުމުތަކާ އެކު ގާތުން މަސައްކަތް ކުރުމަށް ފުރުސަތު ލިބިގެންދާނެ ކަމެއް،" ފޮރިން މިނިސްޓްރީން އޮގަސްޓު މަހު ނެރު ބަޔާނެއްގައި ބުނެފައި ވެއެވެ.
ހަމައެހެންމެ، ރާއްޖޭގެ ހާރިޖީ ސިޔާސަތަށް މުހިންމު ކަންކަމުގައި އާއި ކަނޑުގެ ސަރަހައްދުގެ ސަލާމަތާއި ރައްކާތެރި ކަމަށް އެސްސީއޯގެ މެމްބަރު ގައުމުތަކާ އެކު މަސައްކަތް ކުރުމުގެ ފުރުސަތު ލިބިގެންދާނެ ކަމަށް ރާއްޖޭގެ ފޮރިން މިނިސްޓްރީން ބުނެފައި ވެއެވެ.
ޝަންހާއީ ކޯޕަރޭޝަން އޯގަނައިޒޭޝަނަކީ ކޮބާ؟
މިއީ އިރުމަތީ ޔޫރަޕާއި އޭޝިއާގެ ގައުމުތައް ހިމެނޭ ގޮތުން ޖޫން 15، 2001 ގައި އުފެއްދި އެއްބާރުލުން ދިނުމުގެ ބައިނަލްއަގްވާމީ ޖަމާއަތެކެވެ. މިވަގުތު މި ޖަމާއަތުގެ މެމްބަރުންގެ ގޮތުގައި އަށް ގައުމު އެބައޮތެވެ. އެއީ ޗައިނާ، އިންޑިއާ، ޕާކިސްތާނު، ރަޝިއާ، ކިރިގިސްތާނު، ކަޒަކްސްތާނު، ތަޖިކިސްތާނު އަދި އުޒްބެކިސްތާނެވެ.
އޭގެ އިތުރުން، އޮބްޒާވަރުންގެ ގޮތުގައި ހަތަރު ގައުމެއް ހިމެނެ އެވެ. އެއީ، އަފްޢާނިސްތާނު، ބެލަރޫސް، އިރާނު އަދި މޮންގޯލިއާ އެވެ. މި ޖަމާއަތުގެ ފުރިހަމަ މެމްބަރަކަށް އިރާނު ހެދުމުގެ މަސައްކަތް މިދިޔަ އަހަރު ވަނީ ފަށާފަ އެވެ.
އަދި، ޕާޓްނަރުންގެ ގޮތުގައި އާމީނިއާ، އަޒަރުބައިޖާނު، ކެމްބޯޑިއާ، ނޭޕާލް، ސްރީ ލަންކާ އަދި ތުރުކީ ހިމެނެ އެވެ. ހަމައެހެންމެ، މިސްރު، ގަތަރު އަދި ސައުދީ އަރަބިއްޔާ ޕާޓްނަރުންގެ ގޮތުގައި ހަމަޖެއްސުމުގެ މަސައްކަތް ވެސް ވަނީ ފަށާފަ އެވެ. އެ ގައުމުތަކުގެ ތެރޭގައި ރާއްޖެ، ޔޫކްރެއިން އަދި އިޒްރޭލު ވެސް ހިމެނެ އެވެ.
މި ޖަމާއަތަކީ 2005 އިން ފެށިގެން އދ. ގެ އާންމު މަޖިލީހުގެ އޮބްޒާވަރެއް ވެސްމެ އެވެ.
އެސްސީއޯ އުފެދުނު ފަހުން މިހާތަނަށް އެ ޖަމާއަތުން މަސައްކަތްކޮށްފައި ވަނީ ސަރަހައްދީ ސަލާމަތާއި ރައްކާތެރިކަމަށެވެ. އެގޮތުން، ސަރަހައްދީ ޓެރަރިޒަމާއި، ނަސްލީ ވަކިވެގަތުމާއި، ދީނީ ހައްދުފަހަނައެޅުމާ ދެކޮޅަށް އަންނަނީ ގައުމުތައް ގުޅިގެން މަސައްކަތް ކުރަމުންނެވެ. ހަމައެހެންމެ، ސަރަހައްދީ ކުރިއެރުމާއި ތަރައްގީއަށް ވެސް ދަނީ މަސައްކަތް ކުރަމުންނެވެ.
އިގްތިސާދީ ގޮތުންނާއި އަސްކަރީ ގޮތުން ބެލި ނަމަވެސް އެސްސީއޯ އަކީ މިވަގުތު ދުނިޔޭގައި އޮތް މިފަދަ އެންމެ ބާރުގަދަ ޖަމާއަތެވެ. އަދި، އާބާދީގެ ގޮތުން ބަލާއިރު ދުނިޔޭގެ އާބާދީގެ 40 ޕަސެންޓު މި ޖަމިއްޔާއިން ހިއްސާކުރެ އެވެ. ރާއްޖެ ވެގެންދާނީ މި ޖަމާއަތުގެ ޕާޓްނަރުކަން ދޭ އެންމެ ކުޑަ ގައުމަށެވެ.
