ސަރުކާރު ހިންގާ ކޯލިޝަނުގެ އެއް ލީޑަރު ގާސިމް އިބްރާހީމްގެ ކަންބޮޑުވުންތަކެއް ހުރިނަމަވެސް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް ގެންދަވަނީ ކޯލިޝަން އެއްބަސްވުމަށް އަމަލުކުރައްވަމުން ކަމަށް ސަރުކާރުގެ ތަރުޖަމާނު މިއުވާން މުހައްމަދު ވިދާޅުވެއްޖެ އެވެ.
ރާއްޖެ ޓީވީގެ ފަށާއިރު ޕްރޮގްރާމަށް ދެއްވި އިންޓަވިއުއެއްގައި ކޯލިޝަނާ ގުޅޭ ގޮތުން ކުރި ސުވާލަކަށް ޖަވާބު ދެއްވަމުން ގާސިމް ވިދާޅުވީ، މީގެ ކުރިން އުފެއްދި ކޯލިޝަންތަކާ ހިލާފަށް ރައީސް ސޯލިހުގެ ސަރުކާރުން ހެދި ކޯލިޝަން ދަމަހައްޓާފައިވާ ކަމަށެވެ.
"އެކަމަކު އެއްބަސްވެގެން ސޮއިކުރި ކަންކަމުގެ 10 ޕަސަންޓު ވެސް އަޅުގަނޑުމެނަށް ނުލިބޭ،" ގާސިމް ޝަކުވާ ކުރެއްވި އެވެ.
ގާސިމްގެ އެ ވާހަކައާ ގުޅިގެން ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން މިއުވާން ވިދާޅުވީ ކޯލިޝަން އެއްބަސްވުމުގައި އެއްބަސްވެފައިވާ ކަންތައްތަކަށް ސަރުކާރުގެ ފަރާތުން އިހްތިރާމް ކުރާނެ ކަމަށާއި، ހުރިހާ ކަމެއް ވެސް ކުރިއަށްދަނީ އެކަންކަމާ އެއްގޮތަށް ކަމަށެވެ.
ހަމައެއާއެކު ކޯލިޝަން ލީޑަރުންގެ މެދުގައި މަޝްވަރާތައް ވެސް ކުރިއަށްދާކަން މިއުވާން ފާހަގަކުރެއްވި އެވެ.
ސަރުކާރު ކޯލިޝަނާ ބެހޭގޮތުން ހުރި ކަންބޮޑުވުންތައް ގާސިމް ފާހަގަކުރައްވަމުން ގާސިމް އިތުރަށް ވިދާޅުވީ ކޮންމެ ސަރުކާރެއް ވެސް ކޯލިޝަން ހަދަނީ ވެރިކަމަށް އައުމަށް ކަމަށާއި، ކަމިޔާބުވުމަށްފަހުު ދެން އޮންނަނީ ކޯލިޝަނުގެ މައި ޕާޓީގެ ވެރިކަން ކަމަށެވެ. އަދި ރަސްމީ ސިފައެއްގައި ކޯލިޝަން އުވާ ނުލާކަން ވެސް އޭނާ ފާހަގަކުރެއްވި އެވެ.
ގާސިމް ވިދާޅުވީ ކޯލިޝަން އެއްބަސްވުމުގައި އެއްބަސްވިކަންކަމުގެ 90 ޕަސަންޓް ކަންކަން ތަންފީޒު ނުކުރެވޭ ކަމަށާއި، ތަންފީޒު ކުރެވެމުން ދަނީ 10 ޕަސަންޓު ކަންކަން ކަމަށް ވެސް އޭނާ ވިދާޅުވި އެވެ.
އެއަށް ރައްދު ދެއްވާ މިއުވާން މިއަދު ވިދާޅުވީ ވަކި އިންސަންތައެއް ތަންފީޒު ނުކުރެވޭ ކަމަށް ވިދާޅުވި ނަމަވެސް އެއަށް ޖަވާބު ދެއްވަން ދަތި ކަމަށާއި، ތަންފީޒު ނުކުރެވޭ ކަމެއް ސީދާ ވިދާޅުވެދެއްވައިފިނަމަ ފަސޭހަވާނެ ކަން އޭނާ ފާހަގަކުރެއްވި އެވެ.
