މާލޭގައި ހަތަރު ފުރޮޅުލީ އުޅަނދެއް ރަޖިސްޓްރީ ކުރުމަށްޓަކައި، އެ އުޅަނދު ބާއްވާނެ ގަރާޖެއް އޮތްކަން ސާބިތުކޮށްދޭ ސިޓީއެއް (ގަރާޖު ސިޓީ) ހުށަހަޅަން ޖެހޭ އުސޫލު އުވައިލުމާ ބެހޭ ބަހުސް ރައްޔިތުންގެ މަޖިލީހުގައި އަނެއްކާވެސް ފަށައިފި އެވެ.
އެ އުސޫލު އުވައިލަން ގާނޫނަށް ބަދަލު ގެންނަން، މަޖިލީހަށް މީގެ ކުރިން ވެސް ބިލެއް ހުށަހެޅުއްވީ ނޮޅިވަރަމް ދާއިރާގެ މެމްބަރު މުހައްމަދު ނަޝީދު އަބްދުﷲ އެވެ. ވަކި ޕާޓީއަކަށް ނިސްބަތްނުވާ އެ މެމްބަރު ހުށަހެޅުއްވި ބިލަށް މަޖިލީހުގެ ތަަޅުމުގައި ބަހުސްކުރުމަށް ފަހު ބޭރުކޮށްލާފައި ވަނިކޮށް ހަމަ އެ ބަދަލު ގެންނަން އަނެއްކާވެސް ބިލެއް ހުށަހެޅުއްވުމުން، އެ ބިލުގެ އިބުތިދާއީ ބަހުސް ފެށީ މިއަދެވެ.
މަޖިލީހުގެ ތަޅުމަށް ބިލު ހުށަހެޅުއްވުމަށް ފަހު ބަހުސް ކުރެއްވުމަށް ލިބިވަޑައިގެންނެވި ފުރަތަމަ ފުރުސަތުގައި ނޮޅިވަރަމް ދާއިރާގެ މެމްބަރު ނަޝީދު މިއަދު ވިދާޅުވީ "ގަރާޖުސިޓީ ވިއްކައިގެން ކައިބޮއި ހަދާ ބަޔަކު ރާއްޖޭގައި އެބަތިބި" ކަމަށެވެ.
މާލޭގެ އެންމެ ގެއެއްގެ ނަމުގައި 1700 އަށް ވުރެ ގިނަ ކާރު ރަޖިސްޓްރީކޮށްފައިވާ ކަމަށް ވެސް އޭނާ ތުހުމަތުކުރެއްވި އެވެ. އެ ތުހުމަތު ކުރެއްވުމުން އެއީ ކޮން ގެއެއްކަން ހާމަކުރައްވަން ރިޔާސަތުން މަޖިލީހުގެ ރައީސް މުހައްމަދު ނަޝީދު އެދިވަޑައިގެންނެވި އެވެ. އެހެން ނަމަވެސް މެމްބަރު ވިދާޅުވީ ނަންތައް ހާމަކުރައްވާނީ ފަހުން ކަމަށެވެ.
ގަރާޖު ސިޓީ ދައްކައިގެން ރަޖިސްޓްރީ ކުރިޔަސް ކާރުތައް ހުންނަނީ މަގުތަކުގައި ކަމަށާއި ސިޓީގައި އޮންނަ ގަރާޖު ނުފެންނަ ކަމަށް ވެސް އޭނާ ވިދާޅުވި އެވެ.
"އެ ކާރު އެ ގަރާޖަށް ވެއްދޭތޯ ރަޖިސްޓްރީ ކުރުމަށް ފަހު؟ އެ ކާރެއް ނުވެއްދޭނެ އެއްވެސް ގަރާޖަކަށް. މަގުތައް ފުރުނީ ތިޔަ ބުނާ ގަރާޖު ސިޓީއެއް މިހެން އޮއްވައި،" މުހައްމަދު ނަޝީދު އަބްދުﷲ ވިދާޅުވި އެެވެ.
ދެފުރޮޅުލީ އުޅަނދުތައް ރަޖިސްޓްރީކުރަން ގަރާޖެއް ދައްކަން ގަރާޖެއް ދައްކަން ނުޖެހޭ އިރު ހަތަރުފުރޮޅުލީ އުޅަނދު ރަޖިސްޓްރީ ކުރަން ގަރާޖެއް ދައްކަން ޖެހުމަކީ ހަމަޖެހޭ އުސޫލެއް ނޫން ކަމަށް ވެސް އޭނާ ވިދާޅުވި އެވެ.
މިއަދުގެ ބަހުސްގައި ބިލާ އެއްކޮޅަށް ބައެއް މެމްބަރުން ވާހަކަ ދެއްކެވި ނަމަވެސް ގިނަ މެމްބަރުން ވިދާޅުވީ އެ ބިލަށް ތާއީދުނުކުރައްވާ ކަމަށެވެ.
ބިލަށް ތާއީދުކުރައްްވާ ކަމަށް ސީދާ ވިދާޅު ނުވި ނަަމަވެސް ވިލުފުށި ދާއިރާގެ އެމްޑީޕީ މެމްބަރު ހަސަން އަފީފު ވިދާޅުވީ ގަރާޖުސިޓީ ހޯދަން ޖެހޭ ގޮތަށް ޓްރާންސްޕޯޓް ގަވައިދުގައި އޮންނަ އޮތުމަކީ ކޮރަޕްޝަނަށް މަގުފަހިވާ ކަމެއް ކަމަށެވެ.
"މި ގަވާއިދުގެ ސަބަބުން ކަރަޕްޝަނުން އެތައް ބައިވަރު [ފައިސާއެއް އެބަ ނަގާ]. އެއް ގަރާޖުގައި އެތައް ބައިވަރު [އުޅަނދެއް] ރަޖިސްޓްރީކޮށްފައި، ޓްރާންސްޕޯޓުގައި އެކަން ކުރަން ތިބޭ މީހުން ފައިސާ ނަގަނީ،" އަފީފު ވިދާޅުވި އެވެ.
ހުޅުމާލެ ދާއިރާގެ އެމްޑީޕީ މެމްބަރު އަލީ ނިޔާޒު ވިދާޅުވީ ގަރާޖު ސިޓީ ދައްކަން ޖެހޭ ގަވައިދު އުވައިލުމަކީ ހައްލެއް ނޫން ކަމަށް ރައްޔިތުންގެ މަޖިލީހުން ނިންމި ކަމަށާއި އެ ގަވައިދު އުވައިލަން ހުށަހެޅި ބިލު މިފަހަރު ވެސް މަޖިލީހަށް ބަލައިގަންނަން ފާސް ނުވާނެކަމަށް ދެކެވަޑައިގަންނަވާ ކަމަށެވެ.
"ކުރީ ފަހަރު ވެސް ރައްޔިތުންގެ މަޖިލީހުގައި ފުޅާކޮށް ބަހުސްކުރުމަށް ފަހު ، މިއީ މިކަމަށް އޮތް ހައްލު ކަމަށް ރައްޔިތުންގެ މަޖިލީހުގެ މެޖޯރިޓީއަކަށް އަޅުގަނޑު ދެކޭ ގޮތުގައި އޭރުވެސް ގަބޫލެއް ނުކުރެވުނު. އަދި އަޅުގަނޑު ދެކޭ ގޮތުގައި މިފަހަރު ވެސް މިއަށް ވެގެން ދާނީ ހަަމަ އެގޮތް،" އަލީ ނިޔާޒު ވިދާޅުވި އެވެ.
ގަރާޖު ސިޓީ އުވައިލުމަކީ ހައްލެއް ނޫން ކަމަށާއި ހައްލަކީ ރަށެއްގައި އުޅަނދުފަހަރު ދުއްވޭނެ އަދަދު ކަނޑައެޅުން ކަމަށެވެ. ހުޅުމާލޭގައި އެގޮތަށް އަަދަދު ކަނޑައަޅާފައިވާ ކަމަށް ވެސް އޭނާ ވިދާޅުވި އެވެ.
