އިނގިރޭސިވިލާތުގެ ރާނީ، ކުއީން އެލިޒަބަތު ދެވަނަ އަވަހާރަވުމާ ގުޅިގެން ޝާހީ އާއިލާއަށް ރައީސް އިބްރާހިމް މުހައްމަދު ސޯލިހުގެ ތައުޒިޔާ ފޮނުއްވައިފި އެވެ.
ރާނީ އަވަހާރަވީ ސްކޮޓްލޭންޑުގެ ބަލްމޯރަލް ކާސަލްގައި ސިއްހީ ހާލުކޮޅު މޮނީޓާކޮށް ފަރުވާދެމުން ދަނިކޮށް މިއަދު މެންދުރުފަހުގެ ވަގުތެއްގަ އެވެ.
އެކަމަނާ އަވަހާރަވުމާ ގުޅިގެން ރައީސް ސޯލިހު ކުރެއްވި ޓްވީޓެއްގައި ވިދާޅުވީ އެކަމަނާ އަވަހާރަވި ހަބަރު އެއްސެވީ ފުން ހިތާމައާއެކުގައި ކަމަށެވެ.
ރައީސް ވަނީ ރާނީއަކީ އާންމު ހިދުމަތްތަކުގެ ދާއިރާއިންނާއި، ކަންކަމުގައި ފަސްނުޖެހުމާއި، އިނގިރޭސިވިލާތާއި މުޅި ދުނިޔެއަށް ވެސް ވަފާތެރިކަމުގެ ނަމޫނާ ބޭފުޅެއްގެ ގޮތުގައި ސިފަ ކުރައްވާފަ އެވެ.
"ރަސްގެފާނަށާއި ޝާހީ އާއިލާ އަދި އިނގިރޭސިވިލާތުގެ ރައްޔިތުންނާއި މުޅި ކޮމަންވެލްތަށް ދިމާވެފައިވާ މި ހިތާމަވެރި ވަގުތުކޮޅުގައި ހަމްދަރުދީ ފޮނުވުމުގައި އަޅުގަނޑާ އެކު ދިވެހި ރައްޔިތުން ބައިވެރިވޭ،" ރައީސް ސޯލިހު ކުރެއްވި ޓްވީޓުގައި ވިދާޅުވި އެވެ.
ރާނީ އަވަހާރަވުމާ އެކު އިނގިރޭސި ރަސްކަމާ ހަވާލުވެވަޑައިގަންނަވާނީ އެކަމަނާގެ ދޮށީ ދަރިކަލުން ޕްރިންސް ޗާލްސް އެވެ. އެމަނިކުފާނު މާދަމާ ލަންޑަނަށް ވަޑައިގަންނަވާނެ ކަމަށް ބަކިންހަމް ޕެލަސްއިން ވަނީ ހާމަކޮށްފަ އެވެ. ކިންގް ޗާލްސްގެ ގޮތުގައި މާދަމާގެ ވަގުތެއްގައި އެމަނިކުފާނު ހުވާ ކުރައްވާނެ އެވެ.
އަވަހާރަވިއިރު، އަރިހުގައި އާއިލާގެ ގިނަ މެމްބަރުންތަކެއް ތިއްބެވި އެވެ. އެކަމަނާ އަވަހާރަވިއިރު އުމުރުފުޅުން 96 އަހަރެވެ. އެކަމަނާ އުފަންވެވަޑައިގަތީ އެޕްރީލް 21، 1926 ގަ އެވެ.
މީގެ 70 އަހަރު ކުރިން، 1952 އިން ފެށިގެން އިނގިރޭސި ރަނިކަން ކުރައްވަމުން ގެންދަވަނީ އެލިޒަބަތު އެވެ. އެކަމަނާއަކީ އިނގިރޭސި ރަސްކަމުގެ ތަހުތުގައި އެންމެ ގިނަ ދުވަހު އިންނެވި ރާނީ އެވެ.
