ޖަލުގައި ބަންދުކޮށްފައިވާ ގައިދީންގެ އަސާސީ ހައްގުތަކާއި އިންސާނީ ކަރާމާތް ނަގައިލުމަކީ އެމަނިކުފާނު ގަބޫލުކުރައްވާނެ ހަމައެއް ނޫން ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ރޭ ވިދާޅުވެއްޖެ އެވެ.
މޯލްޑިވްސް ކަރެކްޝަނަލް ސާވިސްގެ 51 ވަނަ އަހަރީ ދުވަސް ފާހަގަ ކުރުމަށް ބޭއްވި ޖަލްސާގައި ވާހަކަ ދައްކަވަމުން ރައީސް ސޯލިހު ވިދާޅުވީ ކިތަންމެ ބޮޑު ކުށެއްގައި ނަމަވެސް ޖަލުގައި ބަންދުކޮށްފައި ހުންނަ މީހުންގެ ހައްގުތައް ހިމާޔަތް ކުރުމަކީ "ދައުލަތުގެ ވާޖިބެއް" ކަމަށެވެ.
"އަޅުގަނޑު އަބަދުވެސް ބުނާ އެއް ވާހަކައެއް މިވަގުތުވެސް ތަކުރާރުކޮށްލާނަން. ޖަލު ބަންދުގައި ހުއްޓަސް، އެއްވެސް މީހެއްގެ އަސާސީ ހައްގުތަކާއި އިންސާނީ ކަރާމާތް ނަގައިލުމަކީ، އަޅުގަނޑުމެން ގަބޫލުކުރާ ހަމައެއް ނޫން. ކިތަންމެ ބޮޑު ކުށެއްގައިވިޔަސް، ދައުލަތުގެ ބެލުމުގެ ދަށުގައި ހުންނަހާ ހިނދަކު، އެމީހެއްގެ އަސާސީ ހައްގުތަކާއި އިންސާނީ ކަރާމާތް ރައްކާތެރިކޮށްދިނުމަކީ ދައުލަތުގެ ވާޖިބެއް،" ރައީސް ސޯލިހު ވިދާޅުވި އެވެ.
އޭގެ އިތުރުން ރައީސް ވިދާޅުވީ ގައިދީންނާމެދު އަމަލު ކުރުމަށް އދ. އިން ކަނޑައަޅާފައި "މަންޑޭލާ ރޫލްސް" ރާއްޖޭގެ ޖަލުތަކުގައި ތަންފީޒު ކުރުމުގެ މަސައްކަތް މިހާރު ކުރަމުންދާ ކަމަށެވެ.
"އ.ދ.ގެ "މަންޑޭލާ ރޫލްސް"ގެ މިންގަނޑަށް ޖަލުތަކުގެ ކަންތައް އިންތިޒާމު ކުރުމުގެ މަސައްކަތް އަޅުގަނޑުމެން ވާނީ ފަށާފައި. ޖަލު އޮފިސަރުންވެސް މަންޑޭލާ ރޫލްސްގެ ހަމަތަކަށް އަހުލުވެރިކުރުމުގެ ތަމްރީނުތައް މިހާރު އަންނަނީ ހިންގަމުން،" އެމަނިކުފާނު ވިދާޅުވި އެވެ.
ޖަލުގައި އިންސާނީ ހައްގުތަކާއި ކަރާމާތް ނަގައިލުމަކީ ގަބޫލު ކުރައްވާ ހަމައެއް ނޫން ކަމަށް ރައީސް ރޭ ވިދާޅުވިއިރު، މި ސަރުކާރުގެ ދައުވަތަކަށް ޑިސެމްބަރު، 2021، ގައި ރާއްޖެ އައި އދ. ވޯކިން ގްރޫޕް އޮން އާބިޓްރަރީ ޑިޓެންޝަނުން ވަނީ ރާއްޖޭގައި މީހުން ބަންދު ކުރާ މަރުކަޒުތަކުގެ ހާލަތާމެދު އިންތިހާއަށް ކަންބޮޑުވާކަމަށް ބުނެފަ އެވެ.
"ބަންދުކޮށްފައި ތިބޭ ބައެއް މީހުންނަކީ ގޮޅިން ނުނެރޭ މީހުން. ބައެއް މީހުން ގޮޅިން ނެރެނީ މަހަކު އެއް ފަހަރު. މި މޫސުމުގައި، ގޮޅިއެއްގައި އެތައް މީހުންނަކާއެކު ތިބެންޖެހެނީ. މިއީ އިންސާފުތޯ؟،" އދ. ގެ އެ ކޮމެޓީގެ ޗެއާ ޑރ. އެލީނާ ސްޓެއިނާޓް އެއިރު ބޭއްވި ނޫސްވެރިންގެ ބައްދަލުވުމެއްގައި ވިދާޅުވެފައިވެ އެވެ.
އދ. އެ ޓީމުން ވަނީ މާލޭ ޖަލުގައި ގައިދީންނާމެދު އަމަލު ކުރާ ގޮތަށް ވެސް ވަރަށް ބޮޑަށް ފާޑުކިޔައިފަ އެވެ.
"މާލޭ ޕްރިޒަންގައި ގައިދީން ޔާޑަށް ނެރެނީ ބޮޑު ކޮއްޓަކަށް ލައިގެން. މިތަނުގެ ވަރަށް ގިނަ ގައިދީންގެ ނިދާނެ އެނދެއް އަދި ގޮދަނޑިއެއް ނެތް. މިތަނުގެ ގައިދީންގެ އަދަދު ގިނަކަމުން ނިދަންޖެހެނީ ވަރަށް ކައިރިކައިރީގައި، ފައި ދަމާލާނެހާ ޖާގަ ވެސް ނެތި،" ވޯކިން ގްރޫޕުގެ މެމްބަރު ޕްރިޔާ ގޮޕަލާން ވިދާޅުވެފައިވެ އެވެ.
އޭގެ އިތުރުން ޖަލުގައި އިންސާނީ ހައްގުތައް ކަށަވަރު ކުރުމަށް ސަރުކާރަށް ގޮވާލައި އައްސޭރި ޖަލުގައި ތިބި 200 އަށް ވުރެ ގިނަ ގައިދީން ސޮއިކޮށް ޑިސެމްބަރު، 2021 ގައި ރައީސުލްޖުމްހޫރިއްޔާގެ އޮފީހަށް ވަނީ ޕެޓިޝަނެއް ހުށަހަޅައިފަ އެވެ.
"އަޅުގަނޑުމެން މި ތިބީ ވަރަށް ބޮޑަށް ވަރުބަލިވެ، ކެތްތެރިކަން ކޮޅުންލައި، ސިކުނޑި، ތަގައްޔަރުވެފަ. އިހުމާލުވެފައިވާ އަދި ގާނޫނާ ހިލާފްވެފައިވާ ފަރާތްތައް ގޮވައިގެން ދައުވާ ކުރަން ބޭނުން. ދިވެހިރާއްޖޭގެ ޖަލުތަކުގެ ތާރީހު އިޔާދަވާކަށް އަޅުގަނޑުމެން ބޭނުމެއް ނޫން،" އެ ޕެޓިޝަނުގައި ގައިދީން ބުނެފައިވެ އެވެ. "ވީމާ އަޅުގަނޑުމެން މި ގޮވާލަނީ ތިރީގައިމިވާ ކަންތައްތަކާއި އދ. ގެ ވޯކިން ގްރޫޕުގެ ރިޕޯޓުގައި ފާހަގަކޮށްފައިވާ ކަންކަން ހައްލު ކުރުމަށް."
