ޖަލު އޮފިސަރުންނާއި މުވައްޒަފުންގެ އެންމެ ބޮޑު އެއް ކަންބޮޑުވުމަކީ ބޯހިޔާވަހިކަމުގެ ދަތިކަން ކަމަށާއި، އެކަން ހައްލުކޮށް ދިނުމަށް ފަސޭހަ އިންތިޒާމެއް ހަމަޖައްސައި ދެއްވާނެ ކަމަށް ރައީސް އިބްރާހިމް މުހައްމަދު ސޯލިހު ވައުދުވެވަޑައިގެންފި އެވެ.
މޯލްޑިވްސް ކަރެކްޝަނަލް ސާވިސްގެ އަހަރީ ދުވަސް ފާހަގަ ކުރަން ރޭ އިސްލާމީ މަރުކަޒުގެ މާލަމުގައި ބޭއްވި ޖަލުސާގައި ރައީސް ސޯލިހު ވިދާޅުވީ ޖަލު އޮފިސަރުންނާއި މުވައްޒަފުންގެ ޒިންމާ އާއި ވާޖިބު އަދާކުރުމަށް ވަރަށް ގިނަ ދަތިތައް ކުރިމަތިވެފައިވާކަން ފާހަގަ ކުރެއްވޭ ކަމަށެވެ.
ކަރެކްޝަނަލް ސާވިސްގެ އަހަރީ ޖަލްސާގައި ބައިވެރިވި އޮފިސަރުންނާއި މުވައްޒަފުން. -- ފޮޓޯ: މުހައްމަދު ޝާބިން/އަދަދު
އޭގެ ތެރެއިން އެއް ކަމަކީ އެ މަނިކުފާނު ފާހަގަ ކުރެއްވި ގޮތުގައި، ޖަލުތަކުގެ އެކޮމަޑޭޝަންގެ ތާށިކަމާއި މުވައްޒަފުންގެ ބޯހިޔާވަހިކަމުގެ ދަތިކަމެވެ.
އިރާދަކުރެއްވިއްޔާ ތިޔަބޭފުޅުންގެ އެ ކަންބޮޑުވުމަށް އަޅުގަނޑުމެން ހައްލެއް ހޯދައިދޭނަން. އަދި ސަރުކާރުން މިހާރު ފަށާފައިވާ ބޯހިޔާވަހިކަމުގެ މަޝްރޫއުގެ ތެރެއިން ކަރެކްޝަނަލް ސާވިސްގެ މުވައްޒަފުންނަށް ބޯހިޔާވަހިކަން ލިބޭނެ ފަސޭހަ އިންތިޒާމެއް ވެސް މާތް ﷲގެ ވާގިފުޅާއެކު އަޅުގަނޑުމެން ހަމަޖައްސައިދޭނަން،" ރައީސް ސޯލިހު ވިދާޅުވި އެވެ.
ޖަލު އޮފިސަރުންނާއި މުވައްޒަފުންނާ މުހާތަބު ކުރައްވައި އެ ބޭފުޅުން މަސައްކަތުގެ މުހިންމުކަން ފާހަގަކުރައްވަމުން އެމަނިކުފާނު ވިދާޅުވީ "ތިޔަ ބޭފުޅުން މުޅި މުޖުތަމައުގެ ހައްގުގައި ތިޔަ ކުރައްވަނީ ޝުކުރާއި ތައުރީފު ހައްގު ގައުމީ ހިދުމަތެއް" ކަމަށެވެ.
ތަފާތު ކުށްތައް ކުރާ މީހުން އެއްތަނެއްގައި ބެލެހެއްޓުމަކީ ދަތި އުނދަގޫ ކަމެއް ކަމަށާއި ހިތަށް ވެސް ނާރާފަދަ ނުރައްކާތެރި ކަންކަން ޖަލުގެ ބައެއް އޮފިސަރުންނާ ދިމާވެފައިވާ ކަމަށް ރައީސް ފާހަގަ ކުރެއްވި އެވެ.
ކަރެކްޝަނަލް ސާވިސްގެ މުވައްޒަފުންނަށް ބޯހިޔާވަހިކަން ފަސޭހައިން ލިބޭނެ އިންތިޒާމެއް ހަމަޖައްސަވައި ދެއްވާނެ ކަމަށް ރައީސް ސޯލިހު ވިދާޅުވިއިރު، އެ މަނިކުފާނު ވަނީ 2023 ވަނަ އަހަރުގެ ރިޔާސީ އިންތިހާބުގައި ވާދަކުރައްވާނެ ކަމަށް ވިދާޅުވެފަ އެވެ.
ސަރުކާރުގެ ބޯހިޔާވަހިކަމުގެ މަޝްރޫއު
މި ސަރުކާރުގެ ބޯހިޔާވަހިކަމުގެ މަޝްރޫއުގެ ދަށުން ހުޅުމާލޭގައި 4،000 ފްލެޓު އިމާރާތް ކުރުމުގެ މަސައްކަތް ފަހި ދިރިއުޅުން ކޯޕަރޭޝަނުން ވަނީ ފަށައިފަ އެވެ. ސަރުކާރުގެ އަމާޒަކީ އެ ފްލެޓުގެ މަސައްކަތް އަންނަ އަހަރު ނިންމުމެވެ.
އިންޑިއާގެ އެކްޒިމް ބޭންކުން ނަގާފައިވާ 227 މިލިއަން ޑޮލަރުގެ ލޯނުގެ ދަށުން ކުރިއަށް ގެންދާ އެ މަޝްރޫއުގެ މަސައްކަތް ހަވާލުކޮށްފައި ވަނީ އިންޑިއާގެ ދެ ކުންފުންޏަކާއެވެ.
ސަރުކާރުން ކަނޑައަޅާ އަގެއްގައި ވިއްކާ ހައުސިން ޔުނިޓު ހިމެނޭ ގޮތަށް ހުޅުމާލޭގައި ފްލެޓު އިމާރާތް ކުރަން ބައެއް ކުންފުނިތަކާ ސަރުކާރުން ހަވާލުކޮށްފައިވެ އެވެ. އަދި ބައެއް ރަށްރަށުގައި ވެސް ފްލެޓުތައް އިމާރާތް ކުރުމުގެ މަސައްކަތް ވަނީ ފަށައިފަ އެވެ.
