އޮސްލޯ، ނޯވޭ (ސެޕްޓެމްބަރު 5) - މި ފަހަރުގެ ޓްރާންސްފާ މާކެޓްގައި ބަޔާން މިއުނިކުން ރޮބަޓް ލެވަންޑޯސްކީ ދޫކޮށްލަން ޖެހޭތީ އެންމެ ފުރަތަމަ އެ މަގާމަށް ގެންނަން ނިންމީ ކުރިން ބޮރޫޝިއާ ޑޯޓްމަންޑަށް ކުޅުނު އާލިން ބްރައުޓް ހާލަންޑް ކަމަށް ހާލަންޑްގެ ބައްޕަ އަލްފް އިންޖް ހާލަންޑް ބުނެފި އެވެ.
މިދިޔަ ސީޒަން ނިމުނުތަނުން ލެވަންޑޯސްކީ ވަނީ ބަޔާން ދޫކޮށްލައި، އާ ޗެލެންޖެއް ނަގަން ބޭނުންވާކަން އެ ކްލަބްގެ ސީނިއާ މެނޭޖްމަންޓަށް އަންގައިފަ އެެވެ.
ތަކުރާރުކޮށް އެކި މީޑިއާ އިންޓަވިއުތައް ދިން ފަހުން، ބަޔާނުން ގޮތް ދޫކުރުމުން ލެވަންޑޯސްކީ އަށް އެންމެ ފަހުން 50 މިލިއަން ޑޮލަރަށް ވަނީ ބާސެލޯނާ އަށް ސޮއިކޮށްފަ އެވެ. ބާސެލޯނާއާ ގުޅުމަށް ފަހު ލެވަންޑޯސްކީ ވަނީ ބަޔާނާ މެދު އޭނާގެ ހިތް ސާފު ކަމަށް ބުނެފަ އެވެ.
ޖަރުމަނު ލީގުގައި ބަޔާންގެ އެންމެ ބޮޑު ވާދަވެރިޔާ، ބޮރޫޝިއާ ޑޯޓްމަންޑް ދޫކޮށް ހާލަންޑް މި ފަހަރު އިނގިރޭސި ޗެމްޕިއަން، މެންޗެސްޓާ ސިޓީ އަށް ބަދަލުވީ 60 މިިލިއަން ޑޮލަރަށެވެ.
ގިނަ ކްލަބްތަކެއްގެ އޮފާ ލިބިފައި އޮއްވައި، ސިޓީ އަށް ބަދަލުވާން ހާލަންޑް ނިންމި ސަބަބު އޮޅުންފިލުވައިދޭ، ޑޮކިއުމެންޓަރީއެއް މިހާރު ދައްކަމުންދާއިރު، އެ ޑޮކިއުމެންޓްރީގައި ވަނީ ބަޔާނުން ލެވަންޑޯސްކީގެ ބަދަލުގައި ހާލަންޑް ގެންދަން ބޭނުންވި ކަމަށް ހާލަންޑްގެ ބައްޕަ، އަލްފް ބުނެފަ އެވެ.
ބާސެލޯނާ އާއި ސިޓީ ކުޅުނު އެކުވެރިކަމުގެ މެޗެއްގެ ތެރެއިން ލެވަންޑޯސްކީ އާއި ހާލަންޑް ވާހަކަ ދައްކަނީ
"އެ މީހުންގެ (ބަޔާން މިއުނިކްގެ) ހުށަހެޅުމެއް ވެސް އައި، އެ މީހުން ޝައުގުވެރިކަން ވެސް ފާޅުކުރި. އަހަންނަށް އެނގޭ މިހާރު އެ މީހުން (އާންމުން ކުރިމަތީގައި) ހާލަންޑް ބޭނުންނުވާ ކަމަށް އެ ބުނަނީ ފެއިލްވީ ކަމަށް އެއްބަސްނުވަން،" އަލްފް ބުންޏެވެ.
ޑޮކިއުމެންޓްރީގައި ހާލަންޑް ވަނީ ލެވަންޑޯސްކީއާ ބެހޭގޮތުން ވެސް ވާހަކަ ދައްކައިފަ އެވެ.
ކުރިން ޑޯޓްމަންޑްގައި ވެސް ތަފާތު ދެއްކި ލެވަންޑޯސްކީއާ ބެހޭގޮތުން ހާލަންޑް ބުނީ ބަޔާނުން ލެވަންޑޯސްކީ ހިތާ ދެކޮޅަށް އޭނާ ކްލަބްގައި މަޑުކުރުވަން ކުރި މަސައްކަތަކީ ވަރަށް "އިހުތިރާމް ކުޑަ" އަމަލެއް ކަމަށެވެ.
އުމުރުން 22 އަހަރުގެ ހާލަންޑް އަންނަނީ ޕެޕް ގާޑިއޯލާގެ މެންޗެސްޓާ ސިޓީ ޓީމުގައި ތަފާތު ދައްކަމުންނެވެ. މި ސީޒަނުގައި މިހާތަނަށް އިނގިރޭސި ޕްރިމިއާ ލީގުގައި ކުޅުނު ހަ މެޗުން އޭނާ ވަނީ 10 ގޯލު ޖަހައިފަ އެވެ. އޭގެ ތެރޭގައި ޖެހިޖެހިގެން ދެ މެޗުގައި ހެދި ހެޓްރިކްތައް ވެސް ހިމެނެ އެވެ.
