ރާއްޖޭއަށް މިހާރު ކުރަމުންދާ ވިއްސާރާގައި އިއްޔެ އެންމެ ގިނައިން ވާރޭ ވެހުނީ ގދ. ކާޑެއްދޫއަށް ކަމަށް މޫސުމާ ބެހޭ ގައުމީ އިދާރާ (މެޓް)އިން ބުނެފި އެވެ.
ވޭތުވެދިޔަ 24 ގަޑިއިރު ތެރޭގައި ރާއްޖޭގެ ގިނަ ރަށްތަކަށް ބޯކޮށް ވާރޭވެހިފައިވާއިރު، މެޓް އޮފީހުން ބުނީ އިއްޔެ އެ ރަށަށް 124.8 މިލިމީޓަރުގެ ވާރޭ ވެހިފައިވާ ކަމަށެވެ.
މެޓް އޮފީހުން ވަނީ މި އަހަރު ތެރޭގައި އެއް ދުވަހަކު އެންމެ ގިނަ ވާރޭ ވެހުނު ރަށް ވެސް ހިއްސާކޮށްފަ އެވެ. އެއީ މިދިޔަ ޖުލައި މަހުގެ 31 ވަނަ ދުވަހު ރ. އަލިފުއްޓަށް ކުރި ވިއްސާރަ ކަމަށް ބުނެފައިވެ އެވެ.
ރ. އަލިފުށީގެ އޮޓަމެޓިކް ވެދާ ސްޓޭޝަނުން 156.5 މިލިމީޓަރުގެ ވާރޭ އެ ދުވަހު ރިކޯޑުކޮށްފައިވާ މެޓު އޮފީހުން ބުނެ އެވެ.
މޫސުން ގޯސް، އަލިވާނީ އަންގާރަ ދުވަހު
މިއަދާއި މާދަމާ ވެސް ރާއްޖޭގެ ހުރިހާ ސަރަހައްދަކަށް މޫސުން ގޯސްވާނެ ކަމަށް މެޓުން ލަފާ ކުރެ އެވެ. އެ އިދާރާއިން ލަފާކުރާ ގޮތުގައި މޫސުން ރަނގަޅު ވާނީ އަންނަ އަންގާރަ ދުވަހަށެވެ.
އެ އޮފީހުން ވަނީ މިއަދު ހަވީރު ފަހަކުން ފެށިގެން މިރޭ ނުވަޔަކަށް ހއ. އަތޮޅުން ތ. އަތޮޅަށް ރީނދޫ ސަމާލު ނެރެފަ އެވެ.
މި ވަގުތުތަކުގައި ބޯކޮށް ވާރޭ ވެހި، 25 މޭލާއި 30 މޭލާ ދެމެދުގެ ބާރު މިނެއްގައި ވައި ޖެހި، އަދި ވިލާގަނޑުގައި 50 މޭލަށް ވައިގަދަ ވާނެ ކަމަށް މެޓުން ލަފާ ކުރެ އެވެ.
