މާފަންނު ސަހަރާ ހުންނަ ސަރަހައްދުގައި ޕާކިން ޒޯނެއް ހެދުމަށް އެ ސަރަހައްދު ހުސްކުރަން މާލެ ސިޓީ ކައުންސިލަށް އިސްލާމިކް މިނިސްޓްރީން ހުއްދަ ދީފި އެވެ.
މާފަންނު ސަހަރާ ހުންނަ ސަރަހައްދުގައި ޕާކިން ޒޯނެއް ހެދުމުގެ މަސައްކަތް ކުރަނީ، އެ ސަހަރާ ހުންނަ މަޖީދީ މަގުގައި ޕާކް ކުރުން މަނާކޮށްފައިވާތީ އެވެ. އެއީ މާލޭގައި މިނީ ބަހުގެ ހިދުމަތް ފެށުމަށެވެ.
އެހެންވެ ޕާކް ކުރާނެ އިތުރު ޖާގަތަކެއް ހެދުމަށް ޓަކައި، ސަރުކާރުން ވަނީ މާފަންނު ސަހަރާ ހުސްކުރުމަށް ނިންމައި, އެކަން މާލެ ސިޓީ ކައުންސިލަށް އަންގާފަ އެވެ. އެއީ މީހުން ވަޅުލާފައިވާ ސަހަރާއެއް ކަމުން, މަސައްކަތް ފެށުމުގެ ކުރިން ސިޓީ ކައުންސިލުން އިސްލާމިކް މިނިސްޓްރީގެ ލަފަޔަކަށް އެދުނެވެ.
އޭގެ ޖަވާބުގައި މާލެ ސިޓީގެ މޭޔަރު ޑރ. މުހައްމަދު މުއިއްޒަށް މިނިސްޓްރީން ފޮނުވި ސިޓީއެއްގައި ވަނީ އެ ތަން ސާފުކޮށް ކޮންނަމުންދާއިރު ފެންނަ ގަބުރުތަކުގެ މިނިކަށިތައް ވަކިވަކިން ސާފުކޮށް ހުދު ފޮތިން ފަހާފައިވާ އުރައަކަށް އެޅުމަށް އަންގައިފަ އެވެ.
އަދި ގަބުރު ފެންނަ ސަރަހައްދު ކޮނުމުގައި ބޭނުން ކުރަން ޖެހޭނީ އުދަލި ކަމަށާއި އެކްސްކަވޭޓަރު ފަދަ އާލާތްތައް ބޭނުން ނުކުރެވޭނެ ކަމަށް ވެސް މިިނިސްޓްރީން ފޮނުވާފައިވާ ސިޓީގައިވެ އެވެ.
އިސްލާމިކް މިނިސްޓްރީން މި ހުއްދަ ސިޓީ ކައުންސިލަށް ވަނީ މިދިޔަ މަހުގެ ހަތްވަނަ ދުވަހު ދީފަ އެވެ. ނަމަވެސް އެ ތަން ސާފުކުރުމުގެ މަސައްކަތް އަދި ނުފަށަ އެވެ.
