އެމީހަކު އަމިއްލައަށް ފެންނަ ގޮތަކަށް މަގުމަތީން އިންސާފު ކަމަށް ގަބޫލުކުރެވޭ ކަންކަން ތަންފީޒުކުރުމަކީ އިސްލާމީ ޝަރީއަތުގައި ހުއްދަ ކަމެއް ނޫން ކަަމަށާއި އެއީ ނުރައްކާތެރި ކަމެއް ކަމަށް ޕްރޮސެކިއުޓާ ޖެނެރަލް ހުސައިން ޝަމީމް ވިދާޅުވެއްޖެ އެވެ.
ޕީޖީ ޝަމީމްގެ ބްލޮގްގައި ހިއްސާކުރެއްވި ލިޔުމެއްގައި ވިދާޅުވީ އިންސާފު ގާއިމުކުރުމުގެ ޒިންމާއަކީ، ދައުލަތުން، ގާނޫނު ތަންފީޒުކުރާ މީހުނާ މަތިކޮށްފައިވާ ޒިންމާއެއް ކަމަށެވެ.
"އެމީހަކަށް އިންސާފުކަމަށް ގަބޫލުކުރެވޭ ކަމެއް، އަމިއްލަ އަތުން ތަންފީޒުކުރުމަކީ ނުރައްކާތެރި، ގާނޫނީ ގޮތުންނާއި ދީނީ ގޮތުން ބޮޑުވެގެންވާ މަނާކަމެކެވެ،" ޝަމީމް ލިޔުއްވާފައިވެ އެވެ.
ދިވެހިރާއްޖޭގައި އިސްލާމްދީނުގެ އަސްލަކާ ހިލާފު އެއްވެސް ގާނޫނެއް ނެހެދޭނެކަން ގާނޫނުގައި ބަޔާންކޮށްފައިވާ ކަން ފާހަގަކޮށް އިސްލާމްދީނާ ހިލާފު ގާނޫނެއްކަމަށް ކޯޓަކުން ކަނޑަނާޅާހާ ހިނދަކު، ރައްޔިތުންނަށް އޮތީ ގާނޫނުގައިވާ ގޮތުގެ މަތިން އުޅުން ކަން ފާހަގަކޮށްފައިވެ އެވެ.
"އިސްލާމީ ޖިނާއީ އަދުލުގެ ނިޒާމުގައި ވަކި ހަމަތަކެއް، އުސޫލުތަކެއް ބަޔާންކޮށްފައިވެއެވެ. އިސްލާމްދީނުގެ ހަމައަކީ ހަމައެކަނި ނަތީޖާއެއް ހާސިލުކުރުމެއް ނޫނެވެ. ނަތީޖާއަށް ވާސިލުވި ގޮތަކީވެސް މުހިންމު ކަމެކެވެ." ޝަމީމް ލިޔުއްވާފައިވެ އެވެ.
މީހަކު ކުރާކަމަށް ތިމާއަށް ގަބޫލުކުރެވޭ، ނުވަތަ މީހަކު ތުހުމަތުކުރާ ކަމެއްގެ ސަބަބުން، އެމީހަކު ދެކެ ތިމާ އަންނަ ރުޅިއަކީ، ނުވަތަ ކުރާ ނަފްރަތަކީ، ގާނޫނުތަކުގައި ކަނޑައަޅާފައިވާ ހަމަތަކުން ބޭރުން މީހުންނާމެދު އަމަލުކުރުމަކީ ވެސް ދީނީ ގޮތުންނާއި ގާނޫނީ ގޮތުން ވެސް ހުއްދަ ކަމެއް ނޫން ކަން ފާހަގަކުރައްވާފައިވެ އެވެ.
ގާނޫނުގައި އޮތް ގޮތަށް ހެކި ނުލިބިއްޖެނަމަ ވެސް ނިޒާމުގެ ތެރެއިން ފިޔަވަޅު ނޭޅޭނެ ކަމަށާއި އެ ކަން އެގޮތަށް އޮންނަނީ އެންމެންގެ ވެސް ސަލާމަތަށް ޓަކައި ކަމަށް ޝަމީމް ލިޔުއްވާފައިވެ އެވެ.
މިފަހުން "މަގުމަތިން އިންސާފު ހޯދަން" ކަމަށް ބުނެ ބައެއް ކުށްތަކުގައި ތުހުމަތުކުރެވޭ މީހުންނަށް އަނިޔާކޮށްފައިވާއިރު، ފުލުހުން ވަނީ އެކަން އެގޮތަށް ނުކުރުމަށާއި ފިޔަވަޅު އަޅާނެ ކަމަށް ބުނެފަ އެވެ.
