ނިމިދިޔަ ޖުލައި މަހު ރާއްޖެއަށް ވިއްސާރަކޮށް، އުދަ އެރުމުގެ ސަބަބުން ބޮޑެތި ގެއްލުންތަކެއް ލިބުނު ނުވަ ރަށަކަށް ސަރުކާރުން ބަދަލުގެ ގޮތުގައި 1.2 މިލިއަން ރުފިޔާ ދީފި އެވެ.
ވިއްސާރައިގައި ލިބުނު ގެއްލުމުގެ ބަދަލު ދީފައި ވަނީ އެކަމަށް ހާއްސަ އިދާރާ ކަމަށްވާ ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) މެދުވެރިކޮށެވެ. 1.2 މިލިއަން ރުފިޔާގެ ތެރެއިން 294،000ރ. ހަރަދުކޮށްފައި ވަނީ ޒަރޫރީ ހިފާގެންގުޅޭ ތަކެއްޗަށް ލިބުނު ގެއްލުންތަކަށެވެ. އަދި، 961،000ރ. ހަރަދުކޮށްފައި ވަނީ އިންފްރާންސްޓްރަކްޗާތަކަށް ލިބުނު ގެއްލުންތަކަށެވެ.
އެންޑީއެމްއޭއިން އެހީތެރިކަން ފޯރުކޮށްދީފައި މިވަނީ ވިއްސާރާގައި ބޮޑެތި ގެއްލުންތަކެއް ލިބުނު 10 ރަށުގެ ތެރެއިން ނުވަ ރަށަށެވެ. އެ އިދާރާއިން ހާމަކޮށްފައިވާ ގޮތުގައި ވިއްސާރާގައި، އަލުން އާރާސްތު ކުރަންޖެހޭ ފަދަ ގެއްލުންތަކެއް ހަ ގެއަކަށް ލިބިފައިވާ ކަމަށެވެ.
އެހީ ފޯރުކޮށްދިން ރަށްތައް:
- ތ. ތިމަރަފުށި
- ގދ. މަޑަވެލި
- ށ. ބިލެއްފަހި
- ސ. މަރަދޫފޭދޫ
- ގދ. ފިޔޯރީ
- ގދ. ރަތަފަންދޫ
- ހދ. ހޯނޑެއްދޫ
- ހދ. ވައިކަރަދޫ
- ސ. މަރަދޫ
އެ ރަށްތަކުގެ ތެރެއިން ތިމަރަފުއްޓަށް ފަސް ލައްކަ ރުފިޔާއާ ގާތްކުރާ އަދަދަކަށް އެހީ ދީފައިވާއިރު، މަޑަވެއްޔަށް ތިން ލައްކަ ރުފިޔާއަށްވުރެ ގިނައިން އަދި ބިލެއްފައްސަށް ދެ ލައްކަ ރުފިޔާއަށްވުރެ ގިނައިން ދީފައި ވެއެވެ.
މި ފައިސާ ދޫކުރީ ވިއްސާރައިގައި ލިބުނު ގެއްލުންތަކުގެ އެސެސްމަންޓް ހެދުމަށްފަހު އެންޑީއެމްއޭއަށް ހުށަހެޅުމުންނެވެ. އެންމެ ގިނަ އެސެސްމަންޓް ފޯމު، 80 ފޯމު ހޯނޑެއްދުއިން ހުށަހެޅިއިރު، ރިލީފްގެ ގޮތުގައި އެންމެ ގިނައިން ފައިސާގެ އެހީ ދިން ތިމަރަފުށިން ވަނީ 70 އަށް ވުރެ ގިނަ ފޯމު ހުށަހަޅާފަ އެވެ. ހަމައެއާއެކު މަޑަވެލިން ވެސް ވަނީ 70އާ ގާތްކުރާ އަދަދަކަށް ފޯމު ހުށަހަޅާފަ އެވެ.
ވިއްސާރާގައި ލިބުނު ގެއްލުމުގެ 47 ޕަސަންޓަކީ ގޯތޮގެދޮރާއި ޒަރޫރީ ބޭނުންތަކަށް ލިބުނު ގެއްލުންތަކަށްވާއިރު، 39 ޕަސަންޓަކީ ދަނޑު ބިންތަކަށް ލިބުނު ގެއްލުމެވެ. އަދި 14 ޕަސަންޓަކީ، ވިޔަފާރިއާއި ސަރުކާރު އިމާރާތްތަކާއި، އިޖްތިމާއީ އިމާރާތްތަކަށް ލިބިފައިވާ ގެއްލުންތަކެވެ.
ދަނޑުބިންތަކަށް ލިބިފައިވާ ގެއްލުންތަކުގެ ތެރޭގައި ވިއްކުމަށް ހައްދާ މިރުސް، ފަޅޯ، ބިލެތް، ދޮންކެޔޮގެ އިތުރުން ބަނބުކޭޔޮ ވެސް ހިމެނެ އެވެ. ދަނޑުބިންތަކަށް ގެއްލުން ލިބިގެން ޑެމޭޖު އެސެސްމަންޓް ފޯމު އެންޑީއެމްއޭއަށް ފޮނުވީ މަޑަވެއްޔާއި، ހޯނޑެއްދުއާއި، ފިޔޯރީގެ އިތުރުން ތިމަރަފުށިންނެވެ.
ޒަރޫރީ ހިފާގެންގުޅޭ ތަކެއްޗަށް ލިބުނު ގެއްލުމަށް ބަލާއިރު، އެންމެ ގިނައިން ހަލާކުވެފައިވަނީ ގެތަކުގެ އައިސްއަލަމާރިއާއި ދޮންނަމެޝިނެވެ. އެގޮތުން، ގެއްލުން ލިބުނު ހިފާގެންގުޅޭ ތަކެތީގެ ތެރެއިން 28 ޕަސަންޓަކީ އައިސްއަލަމާރި އެވެ. އަދި 25 ޕަސަންޓަކީ ދޮންނަމެޝިނެވެ.
