ހުޅުމާލޭ ދެވަނަ ފިޔަވަހީގައި ހުންނަ ހިޔާ ޓަވަރުތަކުގައި ދިރިއުޅޭ މީހުންނަށް ކުޅިވަރު ކުޅޭނެ ވަސީލަތްތައް ގާއިމުކޮށްދިނުމުގެ މަސައްކަތުގެ ތެރެއިން ކުޅިވަރު ކުޅޭ ދަނޑުތައް އެޅުމުގެ މަސައްކަތް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ން މިއަދު ފަށައިފި އެވެ.
އެޗްޑީސީން މައުލޫމާތު ދީފައިވާ ގޮތުގައި މި މަސައްކަތުގެ ތެރޭގައި ހިމެނެނީ ފުޓްސަލް ދަނޑަކާއި، ހޭންޑްބޯލް ކޯޓަކާއި ބަސްކެޓްބޯޅަ ކޯޓަކާއި ދެ ވޮލީ ކޯޓާއި ބާސްކެޓްބޯޅަ ހާފްކޯޓެއް އެޅުމެވެ. މި ހުރިހާ ތަނެއް ވެސް ހުންނާނީ ހިޔާ ސަރަހައްދުގައި ހުންނަ ހުސް ބިންތަކުގަ އެވެ.
މިއީ ރައްޔިތުންގެ މަޝްވަރާގެ މަތިން އެތަނުގައި އަޅާ ތަންތަން ކަމަށް އެޗްޑީސީން ބުންޏެވެ. އެގޮތުން އެޗްޑީސީގެ އޮފިޝަލަކު "އަދަދު" ނޫހަށް ވިދާޅުވީ، މިއީ ހިޔާ ސަރަހައްދުގައި ހުރި ހުސް ބިންތައް ބޭނުންކުރާނެ ގޮތަކާ މެދު ރައްޔިތުންގެ މަޝްވަރާ ހޯދައިގެން ކުރާ މަސައްކަތެއް ކަމަށެވެ.
"އެޗްޑީސީން މަސައްކަތް ކުރަމުން މިދަނީ ހުޅުމާލޭގައި ދިރިއުޅޭ، ވަކިން ހާއްސަކޮށް ހިޔާ ސަރަހައްދުގައި ދިރިއުޅޭ މީހުންނަށް ހުޅުމާލެއަކީ ހިތްފަސޭހަ ތަނަކަށް ހެދުމަށް," އޭނާ ވިދާޅުވި އެވެ.
މި ޕްރޮޖެކްޓަށް ހަރަދުކުރަނީ އެޗްޑީސީގެ އާންމު އިޖްތިމާއީ ޒިންމާ (ސީއެެސްއާރު) ބަޖެޓުންނެވެ. މި ހުރިހާ މަސައްކަތްތަކަށް ހަރަދު ވާނެ ވަރެއް ނުބުނެ އެވެ.
ކުޅިވަރު ކުޅޭ ތަންތަނުގެ މަސައްކަތުގެ އިތުރުން ހިޔާ ފްލެޓުތައް ކައިރީގައި ޕާކެއް ހިމެނޭހެން ބޮޑު ހިތްފަސޭހަ މައިޒާނަކާއި އެހެނިހެން ވަސީލަތްތައް ތަރައްގީކުރުމަކީ އެޗްޑީސީގެ ޕްލޭނުގެ ތެރޭގައި ހިމެނޭ ކަންކަމެވެ.
