އިންދިރާގާންދީ މެމޯރިއަލް ހޮސްޕިޓަލުގައި ކެންސަރުބަލީގެ މީހުންނަށް ހާއްސަ ވޯޑެއް ގާއިމްކުރުމުގެ މަސައްކަތަށް އެހީތެރިވުމުގެ ގޮތުން 3.5 މިލިޔަން ރުފިޔާ ހަދިޔާކުރަން ބޭންކް އޮފް މޯލްޑިވްސް (ބީއެމްއެލް) އިން އެއްބަސް ވެއްޖެ އެވެ.
އައިޖީއެމްއެޗަށް 3.5 މިލިޔަން ރުފިޔާ ހަދިޔާކުުރުމުގެ އެމްއޯޔޫގައި ސޮއިކުރީ ބޭންކް އޮފް މޯލްޑިވްސްގެ ހެޑް އޮފީހުގައި މިއަދު ބޭއްވި ރަސްމިއްޔާތެއްގަ އެވެ. އެ އެމްއޯޔޫގައި ބީއެމްއެލްގެ ފަރާތުން ސޮއިކުރެއްވީ އެ ބޭންކްގެ އެކްޓިން މެނޭޖިން ޑިރެކްޓަރު އާއިޝަތު ނޫރައްދީނެވެ. އައިޖީއެމްއެޗްގެ ފަރާތުން ސޮއިކުރެއްވީ އެ ސީއީއޯ ބަަންދު އިބްރާހީމް ސަލީމެވެ.
ބީއެމްއެލް އިން ބުނީ އައިޖީއެމްއެޗްގައި އޮންކޮލޮޖީ ވޯޑެއް ގާއިމްކުރަން އެހީތެރިވަނީ އެ ބޭންކަށް 40 އަހަރު ފުރޭތީ ކުރަން ނިންމާފައިވާ، މުޖުތަމައަށް ފައިދާހުރި 12 ކަމެއްގެ ތެރޭގައި ހިމަނައިގެން ކަމަށެވެ. ބީއެމްއެލްއަށް 40 އަހަރު ފުރޭނީ އަންނަ ނޮވެމްބަރު މަހު ކަމަށް ވާއިރު، ބީއެމްއެލް އިން ކުރިއަށް ގެންދާ މުޖުތަމައަށް ފައިދާހުރި ކަންތައްތައް ކޮށް ނިންމާނީ އެހައިތަނަށެވެ.
ބީއެމްއެލްގެ އެކްޓިން އެމްޑީ އާއިޝަތު ނޫރައްދީން ވިދާޅުވީ ބޭންކަށް 40 އަހަރު ފުރުން ފާހަަގަކުރަން ހިންގާ ހަރަކާތްތައް ހިންގާނީ ރާއްޖެއަށް ބޭނުންތެރި ދާއިރާތަކަކަށް ކަމަށެވެ.
"މި ޕްރޮޖެކްޓްގެ އެހީގައި ކެންސަރ ބަލި ތަހައްމަލުކުރަމުންދާ ބަލިމީހުންނަށް ހާއްސަ ވޯޑެއް ގާއިމްކުރެވިގެންދާނެ. އަދި އަޅުގަނޑުމެންގެ އުންމީދަކީ މި ވޯޑުގެ މެދުވެރިކޮށް ރައްކާތެރި އަދި ފެންވަރު ރަނގަޅު އޮންކޮލޮޖީ ހިދުމަތްތަކެއް އެކަމަށް ބޭނުންވެފައި ތިބި ފަރާތްތަކަށް ލިބިގެންދިއުން،" އޭނާ ވިދާޅުވި އެވެ.
އައިޖީއެމްއެޗްގެ ސީއީއޯ އިބްރާހީމް "ބަންދު" ސަލީމް ވިދާޅުވީ ބީއެމްއެލްގެ އެހީގެ ސަބަބުން، އެ ހޮސްޕިޓަލްގެ ހިދުމަތްތައް އިތުރަށް ފުޅާކުރެވޭނެ ކަމަށެވެ. އެކަމަށްޓަކައި އޭނާ ބީއެމްއެލްއަށް ޝުކުރުއަދާކުރެއްވި އެވެ.
"ކެންސަރު ބަލީގެ ފަރުވާ ބޭނުންވެފައިތިބި ފަރާތްތަކަށް ފަސޭހަކަމާއެކު ލިބޭނެ ގޮތް ހޯދައިދިނުމަކީ އައިޖީއެމްއެޗްގެ މުހިންމު ލަނޑުދަނޑިއެއް،" އޭނާ ވިދާޅުވި އެވެ.
މުޖުތަމައަށް ފައިދާހުރި ކަންކަަމަށް އެހީވާން ބީއެމްއެލް އިން އަންނަނީ މިދިޔަ ޖެނުއަރީ މަހުން ފެށިގެން ހަރަކާތްތައް ހިންގަމުންނެވެ. ހިންގި ހަރަކާތްތަކަކީ:
- ޖުލައި: ގައުމީ ދާރުލްއާސާރު ތަރައްގީ ކުރުމަށް އެހީވުން
- ޖޫން: ބީއެމްއެލް ފެހި ޕްރޮޖެކްޓް
- މޭ: އޮންލައިންކޮށް ފަންޑްރެއިޒް ކުރެވޭ ޕްލެޓްފޯމް ކައިންޑްލީ
- އެޕްރީލް: ހާއްސަ އެހީއަށް ބޭނުންވާ މީހުންގެ މަރުކަޒު ތަރައްގީކުރުމަށް އެހީވުން
- މާރިޗު: ސްމޯލް ގްރާންޓްސް
- ފެބުރުވަރީ: ހައުސިންގ ގްރާންޓް
- ޖަނަވަރީ: ބީއެމްއެލް ސްޓާރޓަޕް ގްރާންޓް
