ބައިނަލްއަގްވާމީ ގޮތުން ފާހަގަކުރާ މެރިޓައިމް ސޭފްޓީ ވީކް ރާއްޖޭގައި ފާހަގަކުރަން ނިންމާފައިވާ ކަމަށް ޓްރާންސްޕޯޓް މިނިސްޓްރީން ބުނެފި އެވެ.
އެ މިނިސްޓްރީން ކުރި އިއުލާނެއްގައި ބުނީ މި ހަފްތާ ރާއްޖޭގައި ފާހަގަކުރާނީ ސެޕްޓެމްބަރު 22 ވަނަ ދުވަހުން ފެށިގެން 29 ވަނަ ދުވަހަށް ކަމަށެވެ.
މި ހަފްތާ ފާހަގަ ކުރުމުގެ ގޮތުން ކަނޑު އުޅަނދުފަހަރުގެ ސަލާމަތާ ރައްކާތެރިކަމާއި ތިމާވެށީގެ ރައްކާތެރިކަމާގުޅޭ މައުލޫމާތު ދިނުމުގެ ގޮތުން މާލޭ ނޯތު ހާބާގައި މިނިސްޓްރީގެ މުވައްޒަފުން ހަރަކާތްތެރިވާނެ ކަމަށް ޓްރާންސްޕޯޓުން ބުނެ އެވެ.
ޓްރާންސްޕޯޓުން ވަނީ މި ހަފްތާގައި މުޅި ރާއްޖޭގައި އުޅަނދުފަހަރުގެ ސަލާމަތާއި ރައްކާތެރިކަމުގެ މުހިއްމުކަން އަންގާދިނުމަށްޓަކައި ކަނޑުގައި ދުއްވާ ހުރިހާ އުޅަނދެއްގައި ސަލާމަތީ ދިދަ ސެޓް (ސީ.ބީ.5 އަދި އެން ދިދަ) ނަގާފައި ބެހެއްޓުމަށް އެދިފަ އެވެ.
އަދި، ރާއްޖޭގެ ހުރިހާ ރަށެއްގެ ބަނދަރުތަކަށް އަންނަ އުޅަނދުފަހަރުގައި ސަލާމަތާއި ރައްކާތެރިކަމުގެ ގޮތުން އުޅަނދުފަހަރުގައި ހަމަޖެހިފައި ހުރުން ލާޒިމްކުރާ ކަންކަން ހަމަޖެހިފައި ވޭތޯ ބެލުމަށް ކަމާބެހޭ މުއައްސަސާތަކުން އުޅަނދު ފަހަރަށް އަރައި ޗެކްކޮށް މައުލޫމާތު ދެމުންދާނެތީ އެކަމަށް އެއްބާރުލުން ދިނުމަށް ވެސް އެދިފައިވެ އެވެ.
މި ހަފުތާ ފާހަގަކުރުމުގެ މަގްސަދަކީ ކަނޑު އުޅަނދުފަހަރުގެ ސަލާމަތާ ރައްކާތެރިކަމާއި ތިމާވެށީގެ ރައްކާތެރިކަން އިތުރު ކުރުމަށް ހޭލުންތެރިކުރުވުމާއި ކަނޑު ދަތުރުފަތުރުގެ ސިނާއަތުގައި ހުރި ފުރުސަތުތައް ސްކޫލްތަކުގެ ދަރިވަރުންނަށް އަންގާދިނުން ކަމަށް ޓްރާންސްޕޯޓުން ބުންޏެވެ.
