މާފަންނު އައިޓަމްސް ފިހާރަ ކައިރީ ހިނގި މާރާމާރީއެއްގެ ތެރެއިން ވ. ކެޔޮދޫ، ދޭލިޔާގޭ މޫސާ އަހުމަދު، 19، ގެ ގަޔަށް ވަޅި ޖަހާ މަރާލިތާ ފަސް އަހަރުވީ ފަހުން އެ މައްސަލާގައި ކްރިމިނަލް ކޯޓުގައި ހިނގަމުންދާ ޝަރީއަތް އެންމެ ފަހު މަރުހަލާތަކަށް ހިނގައްޖެ އެވެ.
ސެޕްޓެމްބަރު 24، 2017 ގައި ހިނގި މި މާރާމާރީގައި ލިބުނު ޒަހަމްތަކާ ގުޅިގެން މޫސާ ހޮސްޕިޓަލަށް ގެންދިޔަތާ ކުޑައިރުކޮޅެއްގެ ތެރޭގައި ވަނީ މަރުވެފަ އެވެ.
އެ މައްސަލާގައި ދައުލަތުން ދައުވާ އުފުލީ ފަސް މީހެއްގެ މައްޗަށެވެ. އެއީ އިބްރާހިމް ސައްމާހު އަހުމަދު ފަތުހީއާއި، އަލީ ހަސަންއާއި، މުހައްމަދު ރިޔާޒްއާއި، އަހުމަދު އީޖާދު މުހައްމަދު އަދި މުހައްމަދު ނާޝިޒް ނާޒިމްގެ މައްޗަށެވެ.
ސައްމާހުގެ މައްޗަށް ކުރަނީ ތޫނު އެއްޗެއް ބޭނުން ކޮށްގެން ގަސްދުގައި މީހަކު މެރުމުގެ ދައުވާއާއި މަގްބޫލު ސަބަބެއް ނެތި އާންމު ތަނެއްގައި ތޫނު އެއްޗެއް ގެންގުޅުމުގެ ދައުވާ އެވެ.
ނާޝިޒްގެ މައްޗަށް ކުރީ މަގްބޫލު ސަބަބެއް ނެތި އާންމު ތަނެއްގައި ތޫނު އެއްޗެއް ގެންގުޅުމުގެ ދައުވާއާއި، ތޫނު އެއްޗެއް ބޭނުން ކޮށްގެން މާރާމާރީ ހިންގުމުގެ ދައުވާ އެވެ.
ބާކީ ތިބި އަލީ ހަސަންއާއި، މުހައްމަދު ރިޔާޒްއާއި، އަހުމަދު އީޖާދު މުހައްމަދުގެ މައްޗަށް ކުރަނީ ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމުގައި ބައިވެރިވުމުގެ ދައުވާ އެވެ.
މިއަދު ބޭއްވި އަޑުއެހުމުގައި އޮތީ ހުލާސާ ބަޔާން އިއްވުމެވެ. އެއީ މައްސަލައިގެ ހުކުމުގެ ކުރިއަށް އޮންނަ އެންމެ ފަހު މަރުހަލާ އެވެ.
ނަމަވެސް މިއަދުގެ އަޑުއެހުމަށް ސައްމާހުގެ ވަކީލު ހާޒިރުވެފައެއް ނުވެ އެވެ. މައްސަލަ ބައްލަވާ ގާޒީ ހަސަން ސައީދު ވިދާޅުވި ގޮތުގައި އެ ވަކީލަށް ބައިވެރިވެވެނީ އަންނަ ސެޕްޓެމްބަރު މަހުގެ ދެވަނަ ދުވަހުގެ ފަހުން ކަން ކޯޓަށް ވަނީ އަންގައިފަ އެވެ.
ދައުލަަތުން އެދެނީ އެއް މަޖިލީހެއްގައި، ދައުވާ ކުރާ އެންމެންގެ ދައުވާތަކުގެ މައްޗަށް އެކީގައި ހުލާސާ ބަޔާން ދިނުމަށެވެ. އެ ކަމަށް ގިނަ ދިފާއީ ވަކީލުން އިއުތިރާޒެއް ނުކުރެ އެވެ.
އެހެންވެ ގާޒީ ނިންމެވީ ހުރިހާ ވަކީލުންނަށް ވެސް ބައިވެރިވެވޭނެ ދުވަހެއް މަޝްވަރާ ކުރެއްވުމަށް ފަހު އެހެން ދުވަހަކަށް އަޑުއެހުން ތާވަލުކުރެއްވުމަށެވެ.
ގާޒީ ހަސަން ސައީދު ވިދާޅުވީ މައްސަލަ މިހާރު އޮތް މަރުހަލާ ވެސް ލަސްވެގެން ދަނީ މައްސަލަ ބޮޑުވެފައި، ދައުވާ އުފުލިފައި ތިބި މީހުން ވެސް ގިނަވެގެން ކަމަށެވެ. އެހެންވިޔަސް ވީއެންމެ އަވަހަށް މި ޝަރީއަތް ދެން ނިންމުމަށް މަސައްކަތް ކުރައްވަމުން ގެންދަވާ ކަމަށް ގާޒީ ވިދާޅުވި އެވެ.
ޖިނާއީ އިޖުރާއަތުގެ ގާނޫނުގައި ވެސް އޮންނަ ގޮތުން، މައްސަލާގައި ހިމެނޭ ފަރާތްތައް ހުލާސާ ބަޔާން އިއްވާތާ މަދުވެގެން 30 ދުވަހު ތެރޭގައި މައްސަލައިގެ ހުކުމް އިއްވަން ޖެެހެ އެވެ.
