ސްޓެލްކޯއިން ކަރަންޓުގެ ހިދުމަތް ފޯރުކޮށްދެމުން އަންނަ އއ. އަތޮޅުގެ ތިން ރަށެއްގެ މަގުބައްތިތައް މަރާމާތުކޮށް ބެހެއްޓުމުގެ އެއްބަސްވުމެއްގައި އެ ކުންފުނިން ސޮއިކޮށްފި އެވެ.
ސްޓެލްކޯ ހެޑް އޮފީހުގައި މިއަދު ބޭއްވި ރަސްމިއްޔާތެއްގައި އެއްބަސްވުންތަކުގައި ސޮއިކޮށްފައިވަނީ އެ އަތޮޅުގެ ރަސްދޫ، އުކުޅަސް އަދި ތޮއްޑޫ ކައުންސިލާއެކުގަ އެވެ.
"ސްޓެލްކޯއިން އަޅުގަނޑުމެންގެ ކުންފުނިން މިދޭ ހިދުމަތްތަކުގައި މައިގަނޑު އަމާޒަކަށް ހަދާފައިވާނީ ރައްޔިތުންނަށް ބޭނުންވާ ހިދުމަތްތައް ރައްޔިތުންނަށް ލުއި ފަސޭހަކަމާއެކީގައި ކޮށްދެވޭނެ ސިޔާސަތުތައް ބައްޓަންކޮށް، އެކަން ތަންފީޒުކުރުމަށް،" މި ރަސްމިއްޔާތުގައި ސްޓެލްކޯގެ މެނޭޖިން ޑިރެކްޓަރު އަހްމަދު ޝަރީފު ވިދާޅުވި އެވެ.
މި ރަސްމިއްޔާތުގައި އުކުޅަހުގެ ކައުންސިލް ރައީސް ޝައުކަތު އިބްރާހިމް ވިދާޅުވި ގޮތުގައި މިއީ މިދިޔަ މެއި މަހު މެދުރާއްޖެ ތެރޭގެ ރަށްރަށުގެ ކައުންސިލްތަކުގެ ރައީސުންނާއި އަންހެނުން ކޮމިޓީތަކުގެ ރައީސުން ހިމެނޭ ގޮތަށް އެ ރަށުގައި ބޭއްވި ވިއަވަތި ކޮންފަރެންގެ ހަވާސާއިން ބޭރުން ޝަރީފް އާއެކު ބޭއްވުނު ބައްދަލުވުމަކަށް ފަހު ކޮށްދެއްވި ކަމެކެވެ.
"އަޅުގަނޑުމެންނަށް މި ފެނިގެން ދިޔައީ ވަރަށް އަވަހަށް މިކަމަށް ހައްލެއް ލިބިގެން ދިޔަތަން،" އޭނާ ވިދާޅުވި އެވެ.
ޝަރީފް ވިދާޅުވި ގޮތުގައި މިވަގުތު އއ. އަތޮޅުގެ ތިން ރަށެއްގައި މި ހިދުމަތް ފެށިނަމަވެސް ކުރިއަށް އޮތް ތަނުގައި އެ އަތޮޅުގެ އެހެން ރަށްތަކުގައި ވެސް ސްޓެލްކޯއިން މި ހިދުމަތް ފަށާނެ އެވެ.
މީގެ އިތުރުން، އެ ރަށްރަށް ތަރައްގީ ކުރުމަށް އިޖުތިމާއީ ގޮތުން ކުރާ ހުރިހާ ކަމެއްގައި ވެސް ސްޓެލްކޯއިން ބައިވެރިވާނެ ކަމަށް ޝަރީފް ވިދާޅުވި އެވެ.
ރަސްމިއްޔާތުގައި ޝަރީފް ވާހަކަދައްކަވަނީ-- ފޮޓޯ: ސްޓެލްކޯ
"އިޖުތިމާއީ ގޮތުން ރަށްރަށް ތަރައްގީކުރުމަށް ޓަކައި ރަށްރަށުގެ ރައްޔިތުންގެ ލާބަޔާ މަންފާއަށް މަގުފަހިކުރުމަށް ޓަކައި، ކައުންސިލުން ކުރާ ހުރިހާ ކަމެއްގައި އަޅުގަނޑު ބައިވެރިވާނަން، އަޅުގަނޑުމެން ސްޓެލްކޯގެ ފަރާތުން، އަދި އަޅުގަނޑުމެން ހިދުމަތް ދިނުމުގައި އެއްވެސް ކުލަޔަކަށް ބެލުމެއް ނޯންނާނެ،" ޝަރީފް ވިދާޅުވި އެވެ.
ރަސްމިއްޔާތުގައި ބައިވެރިވި ކައުންސިލްތަކުގެ ރައީސުން ވަނީ ސްޓެލްކޯއިން މި ހިދުމަތް ދޭން ފެށުމާއެކު މަގުބައްތިތައް ދިއްލުމަށް ދާއިމީ ހައްލެއް ލިބިގެން ދާނެ ކަމަށް އުންމީދުކުރައްވާ ކަމަށް ވިދާޅުވެފަ އެވެ.
