މާލެ އާއި ވިލިމާލެ، ތިލަފުށްޓާ އެކު ގުޅައިލުމަށް އަޅާ ބްރިޖްގެ މަސައްކަތުގައި ބޭނުންކުރާ ޕްލެޓްފޯމެއް، ވިލިމާލޭ ފަރަށް އަރާފައި އޮންނަތާ ހަފްތާއެއްހާ ދުވަސްވެ ކަންބޮޑުވުންތައް އިތުރުވެފައިވަނިކޮށް، ދެ ދުވަސް ތެރޭ ޕްލެޓްފޯމު ނަގާނެ ކަމަށް އެ މަސައްކަތްކުރަމުންދާ އެފްކޯންސް އިން މިއަދު ބުނެފި އެވެ.
އިންޑިއާގެ ކުންފުނި، އެފްކޯންސް އިން މިއަދު ނެރުނު ނޫސް ބަޔާނެއްގައި ބުނީ މި ވަގުތު ކުންފުނިން އެންމެ ބޮޑު މަސައްކަތެއް ކުރަމުން ދަނީ ފަރަށް އަރާފައިވާ ސެލްޓް އެލެވޭޓިން ޕްލެޓްފޯމްސް (އެސްއީޕީ) އިން ނެގުމުގެ މަސައްކަތް ކަމަށެވެ.
މިދިޔަ އަންގާރަ ދުވަހު ފަރަށް އަރާފައިވާ އެ ޕްލެޓްފޯމް އަންނަ ބުރާސްފަތި ދުވަހު ނެގޭނެ ކަމަށް އެ ބަޔާނުގައިވެ އެވެ.
ވިލިމާލެ ފަރަށް އަރާފައިވާ ޕްލެޓްފޯމް ނެގުން ލަސްވަމުން ދާތީ ފަރަށް ގިނަ ގެއްލުންތަކެއް ދަނީ ވަމުންނެވެ. އެހެންވެ ތިމާވެށި ހިމާޔަތް ކުރުމަށް ވަކާލާތު ކުރާ ޖަމިއްޔާތަކުން ދަނީ ކަންބޮޑުވުން ފާޅުކުރަމުންނެވެ.
އެންވަޔަރަމަންޓް ޕްރޮޓެކްޝަން އެޖެންސީ (އީޕީއޭ) އިން މިއަދު ވަނީ އެ ކުންފުންޏާއި ޕްލޭނިން މިނިސްޓްރީއާ ބައްދަލު ވެސް ކޮށްފަ އެވެ. އެ ބައްދަލުވުމުގައި ވެސް ދެ ދުވަހުގެ ތެރޭގައި ޕްލެޓްފޯމު ނެގޭނެ ކަމުގެ ޔަގީންކަން އެފްކޯންސް އިން ދިން ކަމަށް އީޕީއޭއިން މިއަދު ބުނެފައިވެ އެވެ.
