ތަފާތު އެކި ދާއިރާތަކުން ދިރާސާތައް ހުށާހެޅުމަށް ގައުމީ ޔުނިވަސިޓީން ކޮންމެ އަހަރަކު ބާއްވާ 'ތެވެލި' މަހާސިންތާ މިއަދު ފަށައިފި އެވެ. މިއީ މިފަދަ ފަސް ވަނަ ކޮންފަރެންސެވެ.
ދުނިޔޭގެ އެކި ގައުމުތަކުގެ އިލްމީ ތަޖުރިބާކާރުންނާއި ރާއްޖޭގެ ތައުލީމީ ބޭފުޅުން ބައިވެރިވާ މި ކޮންފަރެންސްގެ އެންމެ ބޮޑު ބޭނުމަކީ ގައުމު ތަރައްގީކުރުމަށް ބޭނުންވާ އެކި ދާއިރާތަކަށް ވަށައިޖެހޭ، އަމަލީ މައިދާނުގައި ބޭނުންކުރެވޭ ހައްލުތަކެއް ހޯދުމެވެ. އަދި ރާއްޖޭގެ މަތީ ތައުލީމީ ދާއިރާ އަކީ، ދިރާސާތަކުގެ މައްޗަށް އެކުލެވޭ ނިޒާމަކަށް ހެދުމެވެ.
ރަސްމިއްޔާތުގެ އިފްތިތާހީ ހަފްލާގެ ފެށުމުގެ ބަސްފުޅު ވިދާޅުވަމުން ނައިބު ރައީސް ފައިސަލް ނަސީމް ވަނީ ތެވެލިން ކޮންމެ އަހަރަކު ގައުމު ބިނާކުރުމަށްޓަކައި ލިބޭ އެހީތެރިކަން ފާހަގަކުރައްވައި ޝުކުރު އަދާކުރައްވާފަ އެވެ. ވިދާޅުވީ، އެކި ދާއިރާތަކުން ރިސާޗް ކަރުދާސް ހުށަހެޅި، އެއަށް އިލްމީ ބޭފުޅުންގެ މެދުގައި ފުޅާ ދާއިރާއެއްގައި މަޝްވަރާ ކުރެވި ހިޔާލު ބަދަލުކުރެވި، ގައުމުގެ އެކި ދާއިރާތައް ތަރައްގީކޮށް ހަރުދަނާކުރަން ބޭނުންވާ ހައްލުތައް، މި މަހާސިންތާ ނިމޭއިރު ލިބޭނެ ކަމަށް އުންމީދުކުރައްވާ ކަމަށެވެ.
"ގައުމީ ޔުނިވަސިޓީއަކީ ބަޖެޓް އެކުލަވާލުން ފަދަ މުހިއްމު ކަންކަމުގައި ރިސާޗް ފޯރުކޮށްދޭ މުއައްސަސާއެއް... އެހެންކަމުން މި މަހާސިންތާ އަކީ، ބޮޑު ބަދަލުތަކެއްގެ ފެށުން ކަމަށް ގަބޫލުކުރަން،" ފައިސަލް ވިދާޅުވި އެވެ.
މި އަހަރުގެ ކޮންފަރެސްއަށް އެކި ދާއިރާތަކުން ގިނަ އަދަދެއްގެ ޝައުގުވެރި ދިރާސާ ކައުދާސްތަކެއް ހުށަހަޅާފައިވެ އެވެ. ދާއިރާތަކުގެ ތެރޭގައި، އެޑިއުކޭޝަން، ކަލްޗާ، ހިސްޓްރީ، ކޮންސްޓްރަކްޝަން، ޖާނަލިޒަމް، ޖެންޑާ އެންޑް ހިއުމަން ރައިޓްސް ފަދަ ދާއިރާތައް ހިމެނެ އެވެ. އަދި ދީނީ އަދި އިސްލާމީ ފިގުހާ ގުޅޭ އެކި މައުލޫތައް ވެސް ހިމެނެ އެވެ.
މަހާސިންތާ ކުރިއަށްދާނީ މިއަދާއި މާދަމާ އެވެ. މި ދެ ދުވަހު، މައިގަނޑު ގޮތެއްގައި ކުރިއަށްދާނީ، ހުށަހަޅާފައިވާ ދިރާސާ ޕޭޕަރުތަކާ ބެހޭ ގޮތުން ފުޅާކޮށް މަޝްވަރާކުރުމާއި އިލްމީ އެކި ނަޒަރިއްޔާތަކުން ހިޔާލު ހޯދުމެވެ.
