ހޮރައިޒަން ފިޝަރީޒް މޯލްޑިވްސްއަށް ގއ.ހޯޑެއްދޫން ދޫކޮށްފައިވާ ބިމުގައި ފެކްޓްރީއެއް އަޅައި، މަސްގަތުމުގެ މަސައްކަތް ނުފަށާ އޮތީ އެކަމުން އެ ކުންފުންޏަށް ފައިދާއެއް ނުވާނެތީ ކަމަށް ފިޝަރީޒް މިނިސްޓަރު ޑރ.ހުސައިން ރަޝީދު ހަސަން މިއަދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވަޒީރުންނާ ސުވާލުކުރުމުގެ ވަގުތުގައި މަޑަވެލި ދާއިރާގެ އެމްޑީޕީ މެމްބަރު ހުސައިން ފިރުޝާން ކުރެއްވި ސުވާލަކަށް ޖަވާބުދެއްވަމުން މިނިސްޓަރު ވިދާޅުވީ ހޯޑެއްދޫން ހޮރައިޒަންއަށް ދޫކޮށްފައިވާ ބިމުގައި މަސައްކަތް ފެށުމާ ބެހޭ ގޮތުން އޭނާ އެކުންފުންޏާ ވާހަކަ ދައްކަވާފައިވާ ކަމަށެވެ. އެ ތަނުގައި ފެކްޓްރީ އަޅަން ފަސް މިލިޔަން ނުވަތަ ހަ މިލިޔަން ޑޮލަރު ހަރަދުވާނެ ކަަމަށް ހޮރައިޒަން އިން ބުނާ ކަމަށާއި އެވަރަށް ހަަރަދުކޮށްގެން މަސައްކަތް ނިންމިޔަސް އެތަނުގައި މަސް ގަނެ ޕްރޮސެސްކުރުމަކީ ވިޔަފާރީގެ ގޮތުން ބަލާއިރު ކުރެވޭ ވަރު ކަމެއް ނޫން ކަމަށް ވެސް އެ ކުންފުނިން ބުނި ކަމަށް އޭނާ ވިދާޅުވި އެވެ.
"އެމީހުންނަށް ފައިދާ ނުވާ ވިޔަފާރިއެއް، މިހާރު މި ދެންނެވީ މަސް ގަންނަ އަގުގައި، އެމީހުންލާ ކުރުވާނެ ގޮތެއް އިއްޒަތެރި ރައީސް އަޅުގަނޑަކަށް ނުވިސްނޭ،" ހުސައިން ވިދާޅުވި އެވެ.
އޭނާ ވިދާޅުވި ގޮތުގައި ރާއްޖޭގައި ކަނޑުމަސް ގަނެވޭނެ އެންމެ ދަށް އަގަކީ ކިލޯއަކަށް 13 ރުފިޔާ ކަމަށް ވިޔަސް ދައުލަތުގެ ކުންފުނި، މިފްކޯއިން މަސް ކިލޯއެއް ގަންނަމުން އަންނަނީ 17 ރުފިޔާއަށެވެ. ހޯޑެއްދޫގައި ފެކްޓްރީ އަޅައި 17 ރުފިޔާއަށް ކިލޯއެއްގެ މަގުން މަސް ގަނެގެން ފައިދާވާނެ ކަމަށް ހޮރައިޒަން އަށް ނުފެންނަ ކަމަށާއި ހޯޑެއްދޫގައި ފެކްޓްރީ ނާޅާ އެންމެ ބޮޑު ސަބަބަކީ އެއީ ކަމަށް ވެސް އޭނާ ވިދާޅުވި އެވެ.
ހޮރައިޒަން ފިޝަރީޒްއަށް ހޯޑެއްދޫން 13.5 ހެކްޓަރުގެ ބިމެއް ހަވާލުކޮށްފައި އޮންނަތާ މިހާރު ގާތްގަނޑަކަށް 17 އަހަރު ވެއްޖެ އެވެ. މެމްބަރު ފިރުޝާންގެ ސުވާލުގައި އެއްސެވީ ހޯޑެއްދޫން ދޫކުރި ބިމުގައި ހޮރައިޒަން އިން މަސައްކަތް ނުފަށާ އެހާ ދިގު މުއްދަތެއް ވެފައި ވާއިރު އެ ކަމުގައި ފިޝަރީޒް މިނިސްޓްރީގެ ޒިންމާއަކީ ކޮބައިތޯ އެވެ.
މިނިސްޓަރު ވިދާޅުވީ ހޯޑެއްދޫން ހޮރައިޒަންއަށް ބިން ދޫކުރިތާ އެހާ ދުވަސްވެފައިވާ ކަމަށާއި އެ ކުންފުނިން އެ ބިމަށް ކުލިވެސް ދައްކަމުން އަންނަ ކަމަށެވެ. އެތަނުގައި މަސައްކަތް ފެށުމަށްޓަކައި މަސައްކަތްތަކެއް ކޮށްފައިވާ ކަމަށް ވެސް އޭނާ ވިދާޅުވި އެވެ.
