މިހާރު ސޯޝަލް ސެންޓަރުގައި ފަށައިގެން ކުރިއަށްދާ އެމްޑީޕީގެ ކޮންގްރެސްއާ ގުޅިގެން ހުށަހެޅުނު ޝަކުވާތަކުގެ ސައްހަކަމާމެދު އެ ޕާޓީގެ ލީޑާޝިޕުން ސުވާލު އުފައްދައިފި އެވެ.
އެމްޑީޕީން މީގެ ކުރިން ބުނި ގޮތުގައި ކޮންގްރެސް އާ ގުޅިގެން ހުށަހެޅިފައިވަނީ ތިން ގޮތްޕަކާ ގުޅޭ 17 މައްސަލައެކެވެ. އެހެންނަމަވެސް އޭގެ ތެރޭގައި ކޮންގްރެސް ފަސްކުރަން ޖެހޭ ވަރުގެ މައްސަލައެއް ނެތް ކަމަށް ވެސް ބުނެފައިވެ އެވެ.
"އެންމެ ފުރަތަމަ މިހާރު ބަލަން ޖެހެނީ ހުށަހެޅުނު ޝަކުވާތަކަކީ ސައްހަ ޝަކުވާތަކެއްތޯ، އެއީ 17 ޝަކުވާގެ ތެރެއިން ހަތަރު މީހަކު ލިޔުން ފޮނުވައިފި އެ މީހުން ޝަކުވާއެއް ނުކުރަމޭ ކިޔާފައި، އެހެންވީމާ ސިޔާސީ ކަންތައްތަކަކަށް ވެސް މިކަން ވެދާނެ،" ހަވީރު ބޭއްވި ނޫސްވެރިންގެ ބައްދަލުވުމުގައި އެ ޕާޓީގެ ޗެއާޕާސަންގެ ނައިބު އިބްރާހީމް ވަހީދު (އެންސްޕާ އިބްރެ) ވިދާޅުވި އެވެ.
ހުށަހެޅުނު ޝަކުވާތަކަކަކީ ސައްހަ ޝަކުވާތަކަކަށް ވިޔަސް، އެ ޝަކުވާތަކަކީ ގޮފިތައް ނުވަތަ ގޮފީގެ ރައީސް ކޮންގްރެސް އިން އުނިކުރެވޭ ވަރުގެ ޝަކުވާތަކެއް ނޫން ކަމަށް ވެސް އިބުރޭ ވިދާޅުވި އެވެ.
"އޭގެން އަސަރެއް ނާންނަ ޝަކުވާތަކަކަށް މިވަގުތު އަޅުގަނޑުމެން ވަގުތު ދުއްވާލުމުގެ އަނެއްހެން ބޭނުމެއް ނެތް،" ނޫސްވެރިއަކު ކުރި ސުވާލަކަށް ޖަވާބު ދެއްވަމުން އިބުރޭ ވިދާޅުވި އެވެ.
ހުކުރު ދުވަހުގެ ރޭ ފެށި ކޮންގްރެސްގައި 1100 އެއްހާ މަންދޫބުން ބައިވެރިވާއިރު، ޕާޓީގެ އެތެރޭގައި އުފެދިފައިވާ ހިޔާލުތަފާތުވުންތަކުގެ އަސަރު ކޮންގްރެސްއަށް ނުކުރާ ކަމަށް ހުޅުމާލޭ ދާއިރާގެ މެންބަރު އަލީ ނިޔާޒު ވެސް ވިދާޅުވި އެވެ.
"މި ކޮންގްރެސް ހުއްޓުވުމަށް، އުނދަގޫ ކުރުމަށް ދަތިކުރުމުގެ އެއްވެސް ކަމެއް [މިހާތަނަށް] ކޮންގްރެސް ތެރެއަކު ނެތް، އަމާންކަމާއި ސުލްހަވެރިކަމާއެކު [ކުރިއަށް ދަނީ]،" އަލީ ނިޔާޒު ވިދާޅުވި އެވެ.
ޕާޓީގެ އަސާސީ ގަވައިދާ ހިލާފަށް ބަޔަކު ވައްދައިގެން ކުރިއަށް ގެންދަން އެބަ އުޅޭ ކަމަށް ބުނެ ކޮންގްރެސް ފަސްކޮށްދިނުމަށް އެދި އެމްޑީޕީގެ ޕާލިމެންޓްރީ ގްރޫޕްގެ ކުރީގެ ލީޑަރު އަދި ރައްޔިތުންގެ މަޖިލީހުގެ މެދު ހެންވޭރު ދާއިރާގެ މެންބަރު އަލީ އާޒިމް ވަނީ ފައްޔާޒަށް ސިޓީއެއް ފޮނުއްވާފަ އެވެ.
އެހެންނަމަވެސް ފައްޔާޒް ވަނީ އެފަދަ ހާލަތެއް ނެތް ކަމަށް ވިދާޅުވެފަ އެވެ.
