އަންނަ އަހަރުގެ ރިޔާސީ އިންތިހާބުގައި ޕްރޮގްރެސިވް ޕާޓީ އޮފް މޯލްޑިވްސްގެ ފަރާތުން ވާދަ ކުރައްވާ ކެންޑިޑޭޓު ކުރީގެ ރައީސް އަބްދުﷲ ޔާމީން އަބްދުލްގައްޔޫމަށް މިރޭ ބޭއްވި ހާއްސަ ހަފްލާއެއްގައި ރަމްޒީ ރިޔާސީ ޓިކެޓެއް އަރުވައިފި އެވެ.
އެ ޓިކެޓު ޔާމީންގެ އަތްޕުޅަށް އެރުވީ ރާއްޖޭގައި މީހުން ދިރިއުޅޭ ހުރިހާ ރަށަކުން އިދިކޮޅު ކޯލިޝަން ތަމްސީލު ކުރާ މެމްބަރަކު ބައިވިރި ހާއްސަ ހަރަކާތެއްގަ އެވެ. ޔާމީނަށް ރިޔާސީ ޓިކެޓު ދިނުމަށް ނިންމީ އެ ޕާޓީގެ ސެނެޓުން މިދިޔަ ޖުލައި 31، ގަ އެވެ.
މިރޭ ކާނިވާ ސަރަހައްދުގައި ކުރިއަށްދާ "ހަވާލޭ ވަތަން" ޖަލްސާގައި ޔާމީނަށް ޓިކެޓު ހަވާލު ކުރިއިރު ކުރީގެ ރައީސް ޑރ. މުހައްމަަދު ވަހީދު ހިމެނޭ ގޮތަށް އެ ޕާޓީގެ އިސް ބޭފުޅުންނާއި ވަރަށް ގިނަ އަދަދެއްގެ އާންމުން ވެސް ބައިވެރިވި އެވެ.
ހުރިހާ ރަށެއް ތަމްސީލު ކުރާ އިދިކޮޅުގެ މަންދޫބުންގެ އަތުން، ރަމްޒީ ޓިކެޓު ޔާމީން އަތްޕުޅަށް އެރުވުމުން ޖަލްސާއަށް ހާޒިރުވި މީހުން އެމަނިކުފާނަށް ވަރަށް ހޫނު ތަރުހީބެއް ދިނެވެ. މުޅި ސަރަހައްދުގައި އެ ވަގުތު އިވުނީ ތަރުހީބުގެ އަޑެވެ.
ޔާމީނަށް ސެނެޓުން ރިޔާސީ ޓިކެޓު ދިނުމަށް ނިންމުމުން އެމަނިކުފާނު ވަނީ އެކަން ގަބޫލު ކުރައްވައި، "ހަވާލުކުރެއްވި ބުރަ މަސްއޫލިއްޔަތު އަދާކުރުމުގައި ދެމި ހުންނަވާނެ ކަމަށް" ވިދާޅުވެފަ އެވެ.
ރައީސް ޔާމީނާ އިދިކޮޅުގެ ރިޔާސީ ޓިކެޓު މިރޭ ހަވާލު ކުރި ނަމަވެސް އެމަނިކުފާނަށް އިންތިހާބުގައި ވާދަ ކުރެއްވޭނެކަން ޔަގީނެއް ނޫނެވެ. އެއީ ވެރިކަމުގައި ހުންނެވިއިރު ހިންގެވި ކަމަށް ބުނާ ކޮރަޕްޝަންތަކުގެ މައްސަލައިގައި އެމަނިކުފާނުގެ މައްޗަށް ދައުލަތުން ކޯޓުގައި ކުރާ ދައުވާތަކެއް ކުރިއަށްދާތީ އެވެ.
ޔާމީނަށް އިންތިހާބުގައި ވާދަކުރެއްވޭ ނަމަ، އެމަނިކުފާނަށް އެންމެ ބޮޑު ޗެލެންޖެއް ކުރިމަތިވާނީ، މިހާރު ވެރިކަން ކުރާ މޯލްޑިވިއަން ޑިމޮކްރެޓިކް ޕާޓީގެ ފަރާތުންނެވެ. އެންމެފަހުން، 2018 ވަނަ އަހަރު ބޭއްވި އިންތިހާބުގައި ޔާމީނަށް ދެވަނަ ދައުރެއް ނާކާމިޔާބުވީ، އެމްޑީޕީގެ ކެންޑިޑޭޓް ރައީސް އިބްރާހިމް މުހައްމަދު ސޯލިހާ ވާދަކުރައްވަ އެވެ.
