މ ދިއްގަރާއި ތ ގާދިއްފުށީގައި ކައުންސިލުން ހުސްވެފައިވާ ދެ މަގާމަކަށް މެންބަރުން ހޮވުމަށް ބޭއްވި ބައި އިލެކްޝަން އެމްޑީޕީ އިން ކާމިޔާބުކޮށްފި އެވެ.
ދިއްގަރުގައި ބޭއްވި ބައި އިލެކްޝަނަކީ އެރަށުގެ ކައުންސިލުގެ މެންބަރަކު އިސްތިއުފާ ދިނުމުން އެ މަގާމަށް އާ މެންބަރަކު ހޮވުމަށެވެ. ގާދިއްފުށީގައި، އެރަށު ކައުންސިލުގެ އަންހެނުންގެ ގޮނޑިއަށް މެންބަރަކު ހޮވުމަށެވެ.
އެމްޑީޕީން ފަޅިން ވާދަކުރި ދެ ކެންޑިޑޭޓުން ވެސް މޮޅުވީ ޕީޕީއެމް ކެންޑިޑޭޓަކާ ވާދަކޮށްގެންނެވެ.
ދިއްގަރު ކައުންސިލްގެ ގޮނޑި އެމްޑީޕީގެ ކެންޑިޑޭޓް އަބްދުﷲ އާރިފް ކާމިޔާބުކުރީ 375 ވޯޓުންނެވެ. ޕީޕީއެމްގެ ކެންޑިޑޭޓަށް ލިބުނީ 320 ވޯޓެވެ.
ގާދިއްފުށީ ކައުންސިލްގެ އަންހެނުންގެ ގޮނޑިއަށް ވާދަކުރި އެމްޑީޕީގެ ކެންޑިޑޭޓް ޒުހައިލާ އަހުމަދު ކާމިޔާބު ހޯދީ 210 ވޯޓު ހޯދައިގެންނެވެ. ޕީޕީއެމްގެ ކެންޑިޑޭޓަށް ލިބުނީ 201 ވޯޓެވެ.
