ހަވީރު ފެނުނީ ވަރުނުލާ ރާޅުގަނޑުގައި ބޯޑެއް ހިފައިގެން ރާޅުތަކުގެ ފޮނުތަކުގެ މެދުން ނިކުމެލައި، ބުރު އަޅާތަނެވެ. ރޭގަނޑު ހުރީ ކްލަބު ވެލެންސިޔާގެ ފުޓްބޯޅަ ޓީމްގެ ޕްރެކްޓިސްގަ އެވެ.
މިއީ މި ވަގުތު ކުޅިވަރުގެ އެންމެ ގިނަ ބަޔަކަށް ހުނަރުވެރި އެތުލީޓު އާމިން އުމަރު މޫސާގެ ދުވަހުގެ އެންމެ މުހިންމު ވަގުތުތައް ހޭދަކުރާ ގޮތެވެ.
އާމިންގެ ނަން ގިނަ ބަޔަކަށް އަޑު އިވި ފަރިތަ ނަމަކަށް މިވީ ދާދި ފަހުން ވަރުނުލާ ރާޅުގަނޑުގައި ބޭއްވި އައިބީސީ ވޯލްޑް ޓުއާގެ މޯލްޑިވްސް ޕްރޯ 2022 އިންނެވެ. ބޮޑީބޯޑިންގެ އެންމެ މަތީ ފަންތީގެ މުބާރާތުގައި އާމިން ވަނީ ދިވެހިރާއްޖޭގެ ބޮޑީބޯޑިންގެ އެއްވެސް އެތުލީޓަކަށް ލިބިފައި ނުވާ ޝަރަފަކާއި ފަހުރެއް ހޯދާފަ އެވެ.
މުބާރާތުގެ ޖޫނިއާ ބައިގެ ފައިނަލުން ޖާގަ ހޯދުމާއެކު އާމިން ވެފައިވަނީ ދުނިޔޭގެ ބޮޑީބޯޑިންގެ އެންމެ މަތީ ފަންތީގެ މުބާރާތެއްގެ ފައިނަލެއްގައި ވާދަކުރި ރާއްޖޭގެ ފުރަތަމަ އަދި ހަމައެކަނި އެތުލީޓަށެވެ. އެއީ، ދުނިޔޭގެ ބޮޑީބޯޑިންގެ އެންމެ މަތީ ފަންތީގައި ދިވެހި ޒުވާން އެތުލީޓުންނަށް ވާދަކުރެވޭނެ ކަން ހާމަކޮށްދީ އުއްމީދު ހޯދައިދިން އެތުލީޓެވެ.
ވިޒިޓް މޯލްޑިވްސް ޕްރޯގެ ހީޓެއް ނިންމާލުމަށް ފަހު އާމިން.-- ފޮޓޯ: އިސްމާއިލް އަޒްމީން/ އަދަދު
އަސްލު މިކަހަލަ ބޮޑު މުބާރާތެއްގައި ވާދަކޮށް ރަނގަޅު ހިސާބަކަށް ދެވިދާނެކަމުގެ އުއްމީދުވެސް އޮތް. އަނެއް ކޮޅުން ވަރަށް ގިނަ ކަންކަން ދަސްވާނެތީ މި ފުރުސަތުގެ ބޭނުން ހިފީ" މޯލްޑިވްސް ޕްރޯގައި ވާދަކުރަން ލިބުނު ފުރުސަތާއި ގުޅޭ ގޮތުން އާމިން ބުންޏެވެ.
މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ)ގެ ވައިލްޑް ކާޓް އެންޓްރީއެއްގެ ގޮތުގައި މި ފަހަރުގެ މުބާރާތުގައި ވާދަކޮށް އާމިން ބޭނުންވި ކަންކަން މާ ބޮޑަށް ވެސް އޭނާ ފުރިހަމަކޮށްފި އެވެ. ގައުމީ ޓީމުގެ ވަރުގަދަ ބޯޑަރުންނާ ވާދަކޮށް ތަފާތު ދެއްކި އެވެ.
ރާޅުތަކުގެ މަތީގަ އާއި ގޮނިތަކުގެ ތެރޭގައި ހަލުއިކަމާއި ފަރިތަކަމާއެކު އުކުޅުތައް ދައްކައި މީހުން ހައިރާންކޮށްލި އަމީން، މުބާރާތުގެ ސެމީ ފައިނަލުގައި މޮޅުވީ ރާއްޖޭގެ ޖޫނިއާ ޗެމްޕިއަން އަދި ޖޫނިއާ ގައުމީ ޓީމްގެ އެއް ވަނަ ޝިމާލް ޝާމީމް (ޝިމައްލެ) އަތުންނެވެ.
މާލޭ ރާޅުގަނޑުގެ ރާޅުތަކުގެ މަތީގައި ހަލުވިކޮށް ބޯޑު ދުއްވާލައި ބުރު އަޅަމުން ދާއިރު އޭނާ އަކީ މާލޭ ގަލޮޅު ދަނޑުގައި ވެސް ހުނަރު ދައްކަމުން އަންނަ ޒުވާން ހުނަރުވެރި ފުޓްބޯޅަ ކުޅުންތެރިއެކެވެ. އާމިން ވަނީ މިދިޔަ އަހަރުގެ ކުރީކޮޅު ކުރިއަށްދިޔަ 19 އަހަރުން ދަށުގެ ފުޓްބޯޅަ މުބާރާތުގައި ކުލަބް ވެލެންސިއާގެ ކެޕްޓަންކަން ކޮށްފަ އެވެ.
ޕްރެޒިޑެންޓްސް ކަޕް ޗެމްޕިއަންކަން ހޯދި ވެލެންސިއާ ޓީމުގައި ވެސް ހިމެނޭ އާމިން އަކީ އެ ޓީީމުގެ ޓްރެއިނަރު، އިސްމާއިލް އާސިފް (ކުޑަހީނާ)ގެ ނަޒަރުގައި ފުޓްބޯޅައިގެ މަތީ ފަންތީގައި ހިފަހައްޓާލެވޭ ވަރުގެ ކުޅުންތެރިއެކެވެ.
ދިވެހި ޕްރިމިއާ ލީގުގައި ވެލެންސިއާގެ މެޗެއްގެ ތެރެއިން އާމިން (ވ) ގްރީން ސްޓްރީޓްސްގެ ނަޒީމް އަތުން ބޯޅަ ހޯދަން މަސައްކަތް ކުރަނީ.-- ފޮޓޯ: އިމޭޖަސް.އެމްވީ
"އަސްލު ފުޓްބޯޅަ އާއި ރާޅާ އެޅުމުގައި މިވަނީ ތަފާތު ދެ ވަރުބައްޔެއް. ރާޅާ އަޅާފައި ގޮސް ފުޓްބޯޅަ ވެސް ކުޅެވޭ. އަސްލު މިކަން ކުރާތީ ފިޓްނަސް ރަނގަޅުވޭ. ވަރަށް ފައިދާ ކުރޭ އަސްލު ދެ ކުޅިވަރު ކުޅޭތީ،" އާމިން ބުންޏެވެ.
އަންޑަ 19 މުބާރާތް އޮތްއިރު ގިނައިން ފުޓްބޯޅަ ކުޅެން ދިޔައީ. އެއަށް ފޯކަސް ކޮށްގެން. ބޮޑީބޯޑިން މުބާރާތް އޮތީމަ މިއަށް ތަންކޮޅެއް ބޮޑަށް ފޯކަސް ކުރިން،"
އާމިން ދެ ކުޅިވަރަށް ވެސް ލޯބި ޖެހުނީ އާއިލާގެ މެންބަރުންގެ ސަބަބުންނެވެ. ފުޓްބޯޅަ އަށް ވެސް، ރާޅާ އެޅުމަށް ވެސް އޭނާ ހާއްސަ އިސްކަމެއް ދެ އެވެ. ބޭބެއާ އެކު ރާޅަށް އެރުނުއިރު، މި ކުޅިވަރުގައި މިހާ އަވަހަށް ބައިނަލްއަގްވާމީ މުބާރާތަކާ ހަމައަށް ދާނެ ކަމަށް އާމިން އުއްމީދެއް ނުކުރެ އެވެ.
އެކަމަކު، މި ފަހަރުގެ ވިޒިޓް މޯލްޑިވްސް ޕްރޯ 2022ގެ ފައިނަލުން ޖާގަ ހޯދުމަށް އަޒުމު ކަނޑަ އަޅައިގެން ނުކުމެ އޭނާ އެކަން ކާމިޔާބުވެސް ކުރި އެވެ. މި ފަހަރުގެ މުބާރާތުގެ ފައިނަލް ހީޓަށް އަމީން ނުކުތްއިރު، މުޅި ރާޅުގަނޑުން ފެނުނީ ގައުމީ ޖޯޝާއި ފޯރިން ފުރިފައިވާ މަންޒަރެކެވެ. އެންމެން އެއް އަޑަކުން އާމިން އަށް ތަރުހީބު ދީ ގައުމީ ދިދަތައް ވިހުރަމުން ދިޔަ އެވެ.
"އަސްލު ފައިނަލަށް އެރުނުއިރު، އެންމެން ސަޕޯޓް ކުރީމަ ވަރަށް ހިތްވަރު ލިބުނު. ރަނގަޅަށް ޕާފޯމް ކުރަން އިތުރަށް މޯޓިވޭޓްވި،" ހިތްހަމަޖެހިފައި ހުރެ އާމިން ބުންޏެވެ.
ހީޓުގެ އެންމެ ފަހު ވަގުތާއި ހަމައަށް އާމިން އޮތީ ކުރީގަ އެވެ. ކެނެރީ އައިލެންޑްސްގެ ގެބްރިއެލް މޮލީނާ އާމިން އަތުން މޮޅުވީ 0.90 ގެ ކުޑަ ތަފާތަކުންނެވެ. އާމިން ދެ ރާޅުން ހޯދި ސްކޯއާ އެކު ކުރީގައި އޮއްވައި މޮލީނާ އަށް ކުރި ލިބުނީ ހީޓު ނިމެން 10 މިނެޓަށް ވެފައިވަނިކޮށް ހޯދި ސްކޯ އިންނެވެ. އޭގެ ފަހުން އާމިން އަނެއްކާ ވެސް އެއް ރާޅުގައި 6.60 ގެ ސްކޯ އެއް ހޯދައި ލީޑު ނެގި އެވެ. ފައިނަލް ހީޓު ނިމެން ދެ މިނެޓަށް ވެފައިވަނިކޮށް ލިބުނު ރާޅުގައި 7.25ގެ ސްކޯ އެއް ހޯދައިގެން 13.00ގެ ޖުމްލަ ސްކޯ އަކާ އެކުގަ މޮލީނާ ކުރި ހޯދި އެވެ. އާމިން އަށް ޖުމްލަ ލިބުނީ 12.10ގެ ސްކޯ އެކެވެ.
ފައިނަލަށް ފަހު އާމިން އޭނާގެ ސަޕޯޓަރުންނާ އެކު.--- ފޮޓޯ: އަދަދު
އަސްލު ހިތްހަމަޖެހޭ ފައިނަލުން ލިބުނު ސްކޯ އާއި ދެއްކުނު ޕާފޯމަންސާ މެދު. ވަރަށް ވާދަވެރިކޮށް ދިޔައީ،" ފޯރިގަދަކޮށް ދިޔަ ފައިނަލުގެ ހަނދާން އާ ކުރަމުން އާމިން ބުންޏެވެ.
ކޮންމެ ގޮތެއްވިޔަސް އާމިންގެ ނަތީޖާ އާއި ދެއްކި ހިތްވަރުން އެންމެންނަށް ލިބުނީ އުއްމީދެވެ. ކެރުމާއި ޖެހިލުން ކުޑަކަމުން ލިބުނީ އިތުރު ތައުރީފެވެ. ހުރިހާ ގޮތަކުން ވެސް އާމިން އެ ހުޅުވައިދިނީ ތަނަވަސް ދޮރެކެވެ. ބައިނަލްއަގްވާމީ މައިދާނުގައި ރާއްޖޭގެ ގައުމީ ދިދަ ކުރިއަށް އޮތް ބޮޑީބޯޑިން މުބާރާތްތަކުގައި ވިހުރާލަން ދިވެހި އެތުލީޓުންނަށް ދިނީ ހިތްވަރެކެވެ.
އެންމެ މުހިންމީ އަމީންގެ މި މެސެޖެވެ؛ އެއް ކުޅިވަރެއްގެ އެންމެ އުހުގައި ހުއްޓަސް އެހެން ކުޅިވަރަކުން ވެސް މަތީ ވަނަ އެއް ހޯދޭނެ ކަމެވެ. ރަނގަޅަށް އެ ކަމަކަށް ތައްޔާރުވެ، ވަރުގަދަ އަޒުމެއްގައި ކުރިއަށް ދެވިއްޖެ ނަމަ ކާމިޔާބު ލިބޭނެކަމެވެ.
