މޮންޓެވީޑޯ، އުރުގުއޭ (ޖުލައި 27) - އުރުގުއޭ ގައުމީ ޓީމުގެ ފޯވާޑް ލުއިސް ސުއަރޭޒް، އޭނާގެ ސީނިއާ ކެރިއަރުގައި އެންމެ ފުރަތަމަ ކުޅުނު ކްލަބު ނަސިއޮނާލް އަށް ބަދަލުވާން ނިންމައިފި އެވެ.
ސުއަރޭޒް، 35، މިދިޔަ ސީޒަނަށް ފަހު އެތުލެޓިކޯ މެޑްރިޑް ދޫކޮށްލައި، އާ ކްލަބެއް ހޯދުމުގެ މަސައްކަތް ފެށިއިރު، އޭޝިއާގެ ވަރުގަދަ ލީގުތަކާއި ޖަރުމަނުގެ ބޮރޫޝިއާ ޑޯޓްމަންޑާއި އިޓަލީގެ ބައެއް ކްލަބްތަކުގެ ރަނގަޅު ހުށަހެޅުން ލިބުނެވެ. އެކަމަކު، އެންމެ ފަހުން ސުއަރޭޒް ނިންމާފައި މި ވަނީ މީގެ 16 އަހަރު ކުރިން އޭނާ އެންމެ ފުރަތަމަ ކުޅުނު ޓީމު ނަސިއޮނާލްއާ ގުޅުމަށެވެ.
ގަތަރު ވޯލްޑް ކަޕް ފަށަން ތިން މަހެއްހާ ދުވަހަށް ވެފައި ވަނިކޮށް ސުއަރޭޒް، ނަސިއޮނާލަށް ބަދަލުވާން އެއްބަސްވީ އޭނާގެ ކެރިއަރުގައި ކުޅޭ ހަތަރު ވަނަ ފީފާ ވޯލްޑް ކަޕްގެ ކުރިން އަމިއްލަ ގައުމުގައި ކުޅެލަން ލިބުނު ރަނުގެ ފުރުސަތުގެ ބޭނުން ހިފާށެވެ.
ސުއަރޭޒް، ސީނިއާ ކެރިއަރުގެ ފުރަތަމަ މެޗު ނަސިއޮނާލަށް ކުޅެދިނީ 2005 ވަނަ އަހަރުގެ މެއި މަހު އޭނާގެ އުމުރުން 18 އަހަރުގަ އެވެ.
އެތުލެޓިކޯ މެޑްރިޑްގެ މެޗެއްގެ ތެރެއިން ގޯލު ޖެހުމަށް ފަހު ސުއަރޭޒް އުފާފާޅުކުރަނީ: ސުއަރޭޒް ވަނީ އެތުލެޓިކޯ އަށް 83 މެޗުން 34 ގޯލު ޖަހައިދީފައި.
އެއް ސީޒަން ނަސިއޮނާލަށް ކުޅެދީފައި ސުއަރޭޒް ދެން ބަދަލުވީ 2007 ވަނަ އަހަރު ނެދަލެންޑްސްގެ ގްރޮނިންގެން އަށެވެ.
ސުއަރޭޒް އަލުން ނަސިއޮނާލާ ގުޅެން ނިންމިއިރު، އަދި ރަސްމީކޮށް ހުރިހާ ކަމެއް އެއްކޮށް ނުނިމެ އެވެ. އެކަމަކު، ސުއަރޭޒް ބުނީ ނަސިއޮނާލަށް އަލުން އެނބުރި އަންނަން ލިބުނު ފުރުސަތަކީ "ދޫކޮށްނުލެވޭނެ ވަރުގެ" ފުރުސަތެއް ކަމަށެވެ.
ނަސިއޮނާލް ދޫކޮށް، 2007 ވަނަ އަހަރު ސުއަރޭޒް އަޔަކްސް އަށް ބަދަލުވެ، އެ ޓީމުގައި ވިދާލުމުން، 2011 ވަނަ އަހަރު ލިވަޕޫލުން އޭނާގެ ސޮއި ހޯދި އެެވެ. އެ ޓީމާ އެކު ތަފާތު މޮޅު ކުޅުމެއް ދައްކައި، ދުނިޔޭގެ ސަމާލުކަން ހޯދި ސުއަރޭޒް، 2014 ވަަނަ އަހަރު ބާސެލޯނާ އަށް ބަދަލުވި އެވެ. އެ ޓީމަށް ކުޅެމުން ކެރިއަރު އެއް ހަރުފަތް މައްޗަށް ޖައްސާލި ސުއަރޭޒް ވަނީ އެ ކްލަބަށް 2020 ވަނަ އަހަރާ ހަމައަށް ކުޅެދީ ކާމިޔާބު ވެސް ހޯދައިފަ އެވެ.
ބާސެލޯނާ އަށް ފަހުން ދެން މިދިޔަ ދެ އަަހަރު ސުއަރޭޒް ފެނުނީ އެތުލެޓިކޯ ޓީމުންނެވެ. އެތުލެޓިކޯގައި ވެސް ސުއަރޭޒް ވަނީ ފުރަތަމަ ސީޒަނުގައި މޮޅަށް ކުޅެފަ އެވެ. ފަހު އަހަރު އަނިޔާއާ ހެދި ފޯމަށް އަސަރުކުރީ އެވެ.
ސުއަރޭޒް ވަނީ އުރުގުއޭ ގައުމީ ޓީމަށް 132 މެޗުން 68 ގޯލު ޖަހައިފަ އެވެ. އޭނާ އަކީ އުރުގުއޭ ޓީމަށް އެންމެ ގިނަ ގޯލު ޖަހައިދިން ކުޅުންތެރިޔާ އެވެ.
