މި އަހަރު ކުރިއަށް ގެންދިއުމަށް ނިންމާފައިވާ ބޯހިމެނުމުގައި މަސައްކަތްކުރާ ޓްރެއިނަރުންނާއި އެނިއުމަރޭޓަރުންގެ ތަމްރީނުތައް މާދަމާ ފަށާނެ ކަމަށް މޯލްޑިވްސް ބިއުރޯ އޮފް ސްޓެޓިސްޓިކްސް އިން ހާމަކޮށްފި އެވެ.
އެ އިދާރާއިން "އަދަދު" އާ ހިއްސާކުރި މައުލޫމާތުތަކުން އެނގޭ ގޮތުގައި ޓްރެއިނަރުންގެ ތަމްރީނުތައް މާދަމާ އިން ފެށިގެން ޖުލައި 21 އަށް ކުރިއަށްދާނެ އެވެ. އެއީ ފުރަތަމަ ބެޗެވެ. ދެވަނަ ބެޗުގެ ތަމްރީނުތައް ޖުލައި 31 އިން އޮގަސްޓު 4 އަށް ބާއްވާނެ އެވެ.
އެއަށްފަހު އޮންނާނީ އެނިއުމަރޭޓަރުންގެ ތަމްރީނުތަކެވެ. ހަތަރު ބެޗަކަށް ބަހާލައިގެން މާލޭގައި އެ ތަމްރީނުތައް ބާއްވާނީ އޮގަސްޓު 14 އިން ސެޕްޓެމްބަރު 8 އަށެވެ. އަތޮޅުތަކުގެ ތަމްރީނުތައް ޖުލައި 31 އިން އޮގަސްޓު 25 އަށް ކުރިއަށްދާނެ އެވެ. މިއީ ފަސް ދުވަހުގެ ޓްރެއިނިންއެކެވެ.
ބޯހިމެނުން ފަށާނީ ސެޕްޓެމްބަރު 13 ގަ އެވެ. ކުރިން ފަށަން ނިންމާފައި އޮތީ ސެޕްޓެމްބަރު 14 ގަ އެވެ.
މުސާރަ އާއި އެލަވަންސް
- މަސައްކަތަށް ނިކުންނަ ކޮންމެ ދުވަހަކަށް 500ރ. ގެ އެލަވެންސެއް ދޭނެ އެވެ. އަދި އިތުރަށް 10ރ ގެ އެލަވެންސެއްވެސް ދެ އެވެ. (އެއީ 7-11 ދުވަހަަށް)
- ބޯހިމެނުމުގެ މަސައްކަތުގައި ބައިވެރިވާ މީހުންނަށް އެއް ހަފުތާގެ ތަމްރީނެއް ދޭން ހަމަޖެހިފައިވެ އެވެ. އެ ތަމްރީނު ފުރިހަމަ ކުރުމަށް ނިކުންނަ ކޮންމެ ދުވަހަކަށް 100ރ. ދޭނެ އެވެ.
މި މަސައްކަތުގައި ހަރަކާތްތެރިވާ މީހުންނަށް އެލަވަންސް ދޭން ހަމަޖެހިފައި ވަނީ ތަމްރީނު ފުރިހަމަކޮށްް، ބޯހިމެނުމުގެ މަސައްކަތް ފުރިހަމަކޮށް ނިމުނީމަ އެވެ.
އެންމެ ފަހުން ރާއްޖޭގައި ބޯހިމަނާފައި ވަނީ 2014 ވަނަ އަހަރު އެވެ. މި އަހަރު ކުރިއަށްގެންދާ ބޯހިމެނުުން ކުރިއަށް ގެންދިއުމަށް ނިންމާފައި ވަނީ ޓެބްލެޓް ބޭނުންކޮށްގެންނެވެ. މިއީ ރާއްޖޭގައި މިގޮތަށް ކުރިއަށް ގެންދާ ފުރަތަމަ ބޯހިމެނުމެވެ.
