ވިލިމާލޭގައި އީދު ނިންމާލުމުގެ ގޮތުން މިރޭ ހަވާ އަރުވާ ގޮތަށް ހަމަޖެހިއްޖެ އެވެ.
އެމްއެންޑީއެފުން ބުނީ، މިރޭ ވިލިމާލޭގައި ހަވާއަރުވާނީ އުތުރު ސަރަހައްދު ބަނދަރާ ދިމާ ބޭރުން ކަމަށެވެ. އަދި ހަވާއަރުވާނީ މިރޭ 9:30 ގައި ކަމަށް ވެސް އެމްއެންޑީއެފުން ބުނެ އެވެ.
މިއީ ވިލިމާލޭގައި އަލްހާ އީދު ފާހަގަކުރުމަށް ބޭއްވި ހަރަކާތްތައް ނިންމާލުމުގެ ގޮތުން ބާއްވާ ފަހު ހަރަކާތެވެ. މިރޭ ހަވާ އެރުވުމަށް ހަމަޖެހިފައި ވަނީ ސްޓޭޖް ޝޯއަކަށް ފަހު އެވެ.
މިރޭ ވިލިމާލޭގައި ބާއްވާ ސްޓޭޖް ޝޯ ހާއްސަކޮށްފައި ވަނީ ވިލިމާލޭގެ އާޓިސްޓުންނަށް ހާއްސަކޮށްގެން ކަމަށް މައުލޫމާތު ލިބެ އެވެ.
މިރޭ ވިލިމާލޭގައި ހަވާއަރުވާއިރު، އަލްހާ އީދާ ދިމާކޮށް ރާއްޖޭގެ އެހެން ބައެއް ރަށްތަކުގައި ވެސް ހަވާއަރުވާފައި ވެއެވެ. އެގޮތުން ވިޔަފާރި އުސޫލުން ހަވާއަރުވައި ދިނުމަށް އެދި ރާއްޖޭގެ 18 ރަށަކުން ސިފައިންގެ ވެލްފެއާ ކުންފުނި، ސިފްކޯގައި އެދިފައިވާކަން އެމްއެންޑީއެފުން މީގެ ކުރިން ހާމަކޮށްފައި ވެއެވެ.
