ތަދުމަޑުކަން ކުރިމަތިވެ ސިޔާސީ ހަލަބޮލިކަމުގެ ތެރެއަށް ވެއްޓިފައިވާ އަވަށްޓެރި ސްރީ ލަންކާގެ ބޮޑު ވަޒީރު ރަނިލް ވިކްރަމްސިންހަ އާއި ކުރީގެ ބޮޑު ވަޒީރު މަހިންދަ ރާޖަޕަކްސަގެ އިތުރުން ލަންކާ ސަރުކާރުގެ އިސް ބައެއް ބޭފުޅުން ފުރުން މަނާކުރަން އެ ގައުމުގެ ސުޕްރީމް ކޯޓަށް ކުއްލި މައްސަލައެއް ހުށަހަޅައިފި އެވެ.
ލަންކާގެ ގާނޫނު އަސާސީގެ 126 ވަނަ މާއްދާގެ ދަށުން ހުށަހެޅި އެ މައްސަލައިގައި ރަނިލް އާއި މަހިންދަ އާއި ކުރިން ފިނޭންސް މިނިސްޓަރުކަން ކުރެއްވި ދެ ބޭފުޅުންކަމުގައިވާ ބަސިލް ރާޖަޕަކްސަ އާއި އަލީ ސަބްރީ އާއި، ސެންޓްރަލް ބޭންކުގެ ކުރީގެ ގަވަރުނަރު އަޖިތްގެ އިތުރުން ބައެއް އެހެން މީހުން ވެސް ފުރުން މަނާކުރަން އެދިފައިވެ އެވެ.
މި މައްސަލަ ހުށަހެޅިއިރު ލަންކާގެ ރައީސް ގޮތަބަޔާ އާއި ބަސިލް ފުރައިވަޑައިގަންނަވަން ގިނަ މަސައްކަތްތަކެއް ކުރެއްވި އެވެ. ނަމަވެސް އިމިގްރޭޝަންގެ އޮފިޝަލުންގެ އެއްބާރުލުން ނުދިނުމުން އެ ބޭފުޅުންށަށް ފުރައިވަޑައިނުގެންނެވުނެވެ.
ލަންކާގެ ރައީސް ކަމުން ގޮތަބަޔާ މާދަމާ އިސްތިއުފާ ދެއްވާނެ ކަން ކުރިން ވަނީ އިއުލާން ކުރައްވައިފަ އެވެ. ގޮތަބަޔާ ގައުމުން ބޭރަށް ވަޑައިގަންނަވަން މަސައްކަތް ކުރައްވަނީ އިސްތިއުފާ ދެއްވުމުން ހައްޔަރުކޮށްފާނެތީ ކަމަށް ލަންކާގެ ނޫސްތަކުން ރިޕޯޓްކުރެ އެވެ.
އެއްބައިވަންތަކަމުގެ ސަރުކާރެއް ގާއިމުކުރުމަށް ފަހަތަށް ޖެހިވަޑައިގަތުމަށް ބޮޑުވަޒީރު ރަނިލް ވަނީ ނިންމަވާފަ އެވެ.
ލަންކާގެ ރައީސްގެ މަގާމު ހުސްވެގެން ދާނެތީ އެ މަގާމަށް ބޭފުޅަކު އިންތިހާބު ކުރުން މި މަހުގެ 20 ވަނަ ދުވަހު އޮންނާނެ ކަމަށް ލަންކާގެ ގާނޫނު ހަދާ މަޖިލީހުން ވަނީ އިއުލާންކޮށްފަ އެވެ. ޖުލައި 19 ވަނަ ދުވަހު ކެންޑިޑެސީ ހުށަހަޅަން ޖެހޭނެ އެވެ. ލަންކާގެ މަޖިލީހުގައި ޖުމުލަ 225 މެމްބަރުން ތިއްބަވަ އެވެ. މި ވޯޓު ނެގުމަށް ނިންމާފައި މިވަނީ ހުރިހާ ސިޔާސީ ޕާޓީއެއްގެ ލީޑަރުންގެ މެދުގައި ބޭއްވި މަޝްވަރާތަކުގައި އެއްބަސްވެފައިވާ ގޮތަށެވެ.
ރައީސް ގޮތަބަޔާ އަދި ބޮޑުވަޒީރު ރަނިލް އިސްތިއުފާ ދެއްވުމަށް ގޮވާލައި މުޒާހަރާތައް ވަރުގަދަކޮށް އެންމެ ފަހުން ރިޔާސީ ގަނޑުވަރާއި ބޮޑުވަޒީރުގެ ގެކޮޅަށް ވަދެގަނެ، އެ ތަންތަން ރައްޔިތުންގެ އަތްދަށަށް ގެނެސްފަ އެވެ. އެ ބޭފުޅުން އިސްތިއުފާ ދެއްވުމުގެ ކުރިން ރިޔާސީ ގަނޑުވަރާއި ބޮޑު ވަޒީރުގެ ގެކޮޅު ދޫކޮށް ނުލާނެ ކަމަށް މުޒާހަރާކުރާ މީހުން ވަނީ ބުނެފަ އެވެ.
