ވެރިކަން ކުރާ ކޯލިޝަނުގެ މައިޕާޓީ އެމްޑީޕީ އުފެއްދުމުގައި އެންމެ އިސްކޮށް އުޅުއްވި އެޕާޓީގެ އެެއް ބާނީ މުހައްމަދު ލަތީފު (ގޯގޯ ލަތީފު)ގެ ހަނދާނުގައި ތައުޒިޔާގެ ދަފްތަރެއް ރައްޔިތުންގެ މަޖިލީހުގައި ހުޅުވައިފި އެވެ.
ރައްޔިތުންގެ މަޖިލީހުގެ ގދ. އަތޮޅުގެ މެންބަރުކަން ކުރެއްވި މެމްބަރު މުހައްމަދު ލަތީފު އަވަހާރަވީ ކެންސަރުގެ އާލާސްކަންފުޅެއްގައި ފަރުވާ ހޯއްދަވަމުން ގެންދަވާތާ ގިނަ ދުވަސްތަކެއް ވެފައިވަނިކޮށް އުމުރުން 70 އަހަރުގަ އެވެ.
ލަތީފްގެ ހަޔާތުގެ ފަހު ދުވަސްތައް އޭނާ ހޭދަ ކުރެއްވީ ސްރީ ލަންކާގަ އެވެ. ކެންސަރު ބައްޔަށް ފަރުވާ ކުރެއްވުމުގެ އިތުރުން ކުރިން ލަތީފަށް ހުންނެވީ ދެ ފަހަރެއްގެ މަތިން ހާޓްއެޓޭކެއް ޖެހިފަ އެވެ.
ތައުޒިޔާގެ ދަފުތަރު ހުޅުވާފައި ވަނީ އިއްޔެ ހަވީރު ރައްޔިތުން މަޖިލީހުގަ އެވެ. އޭގައި އެމްޑީޕީގެ ރައީސް އަދި މަޖިލީހުގެ ރައީސް މުހައްމަދު ނަޝީދު ވެސް ވަނީ ސޮއި ކުރައްވާފަ އެވެ.
ގޯގޯ ލަތީފަކީ ކުރީގެ ރައީސް މައުމޫނު އަބްދުލް ގައްޔޫމުގެ ވެރިކަމުގައި ރާއްޖޭގެ ވެރިކަމުގެ ނިޒާމަށް އިސްލާހީ ބަދަލުތައް ގެންނަން އެންމެ ފުރަތަމަ މަސައްކަތް ފެށި އިރު އެހަރަކާތުގައި ވަރަށް އިސްކޮށް އުޅުއްވި ބޭފުޅެކެވެ. އެކަމުގެ ތެރޭގައި އޭނާ ޖަލަށް ވެސް ލި އެވެ. ރައްޔިތުންގެ މަޖިލީހުގެ މެމްބަރެއްގެ ގޮތުގައި ހުންނަވައިގެން ވެސް އޭނާ އިސްލާހީ މަސައްކަތުގައި ބައިވެރިވެވަޑައިގެންނެވި އެވެ.
ސިޔާސީ ޕާޓީއެއްގެ ގޮތުގައި 2001 ވަނަ އަހަރު އެމްޑީޕީ ރަޖިސްޓްރީ ކުރަން ސޮއިކުރެއްވި ބޭފުޅުންގެ ތެރޭގައި ލަތީފު ހިމެނިވަޑައިގެންނެވި އެވެ. އޭނާ އެޕާޓީއާ ދުރަށް ވަޑައިގެންނެވީ 2008 ވަނަ އަހަރު އެމްޑީޕީއަށް ރާއްޖޭގެ ވެރިކަން ލިބުނު ފަހުން، އުފެދުނު ހިޔާލުތަފާތުވުންތަކެއްގަ އެވެ.
