ވެރިކަން ކުރާ ކޯލިޝަނުގެ މައިޕާޓީ މޯލްޑިވިއަން ޑިމޮކްރެޓިކް ޕާޓީ އުފެއްދުމުގައި އެންމެ އިސްކޮށް އުޅުއްވި އެޕާޓީގެ އެެއް ބާނީ މުހައްމަދު ލަތީފު (ގޯގޯ ލަތީފު) މިއަދު އަވަހާރަވެއްޖެ އެވެ.
ލަތީފު އަވަހާރަވީ އިރު ފަރުވާ ހޯއްދަވަމުން ގެންދެވީ ކޮން އާލާސްކަންފުޅަކަށް ކަމެއް، އެ ތަފްސީލެއް އަދި ނުލިބެ އެވެ. އޭނާ އަވަހާރަވުމުން އެމްޑީޕީގެ އިސް ބޭފުޅުން ގެންދަވަނީ އާއިލާއަށް ތައުޒިޔާ ވިދާޅުވަމުންނެވެ.
ލަތީފުގެ އާއިލާއަށް ތައުޒިޔާވިދާޅުވެ، ރައީސް އިބްރާހީމް މުހައްމަދު ސޯލިހު ކުރެއްވި ޓުވީޓެއްގައި ވިދާޅުވީ ލަތީފަކީ ރާއްޖެެއަށް ޑިމޮކްރަސީ ގެނައުމުގައި ގިނަ މަސައްކަތްތަކެއް ކޮށްދެއްވި ބޭފުޅެއް ކަމަށެވެ.
"އެމްޑީޕީގެ ފައުންޑާ މެމްބަރު މުހައްމަދު ލަތީފް އަކީ މި ޕާޓީ ވުޖޫދަށް ގެނެސް ދިވެހިރައްޔިތުން ގެ އިންސާނީ ހައްގުތައް ހޯދާދިނުމަށް ގިނަގުނަ މަސައްކަތްތަކެއްކުރައްވާ އަދި އަގުނުކުރެވޭ ގުރުބާނީ ތަކެއް ވެފައިވާ ހިއްވަރުގަދަ ދިވެހި ދަރިއެއް،" ލަތީފު އަވަހާރަވުމުން، އެމްޑީޕީގެ ޗެެއާޕާސަން، އިކޮނޮމިކް މިނިސްޓަރު ފައްޔާޒް އިސްމާއީލް ކުރެއްވި ޓްވީޓެއްގައި ވިދާޅުވި އެވެ.
ގޯގޯ ލަތީފަކީ ކުރީގެ ރައީސް މައުމޫނު އަބްދުލް ގައްޔޫމުގެ ވެރިކަމުގައި ރާއްޖޭގެ ވެރިކަމުގެ ނިޒާމަށް އިސްލާހީ ބަދަލުތައް ގެންނަން އެންމެ ފުރަތަމަ މަސައްކަތް ފެށި އިރު އެހަރަކާތުގައި ވަރަށް އިސްކޮށް އުޅުއްވި ބޭފުޅެކެވެ. އެކަމުގެ ތެރޭގައި އޭނާ ޖަލަށް ވެސް ލި އެވެ. ރައްޔިތުންގެ މަޖިލީހުގެ މެމްބަރެއްގެ ގޮތުގައި ހުންނަވައިގެން ވެސް އޭނާ އިސްލާހީ މަސައްކަތުގައި ބައިވެރިވެވަޑައިގެންނެވި އެވެ.
ސިޔާސީ ޕާޓީއެއްގެ ގޮތުގައި 2001 ވަނަ އަހަރު އެމްޑީޕީ ރަޖިސްޓްރީ ކުރަން ސޮއިކުރެއްވި ބޭފުޅުންގެ ތެރޭގައި ލަތީފު ހިމެނިވަޑައިގެންނެވި އެވެ. އޭނާ އެޕާޓީއާ ދުރަށް ވަޑައިގެންނެވީ 2008 ވަނަ އަހަރު އެމްޑީޕީއަށް ރާއްޖޭގެ ވެރިކަން ލިބުނު ފަހުން، އުފެދުނު ހިޔާލުތަފާތުވުންތަކެއްގަ އެވެ.
