އައިޖީއެމްއެޗްގައި ވަޒީފާ އަދަކުރަމުން ދިޔަ ފިލިޕީންސް ނަރުސް މޭރީ ގްރޭސް މަރާލުމުގެ ދައުވާ އުފުލާފައިވާ އޭނާގެ ފިރިމީހާ މާވިން އެސްވައި ވާގަސްއާ ދެކޮޅަށް ދައުލަތުން 110 ހެކި މިއަދު ހުށަހަޅައިފި އެވެ. އަދި މާވިންގެ ފަރާތުން ދިފާއީ ހެކި ހުށަހަޅަން އަދި އިތުރު ފުރުސަތެއް ދޭން ޝަރީއަތުން ނިންމި އެވެ.
މޭރީ މަރާލުމުގެ ދައުވާ އުފުލިފައިވަނީ އޭނާގެ ފިރިމީހާ މާވިންގެ މައްޗަށެވެ. އަދި މަރާލުމުގައި ބައިވެރިވުމުގެ ދައުވާ މާވިންގެ ލޯބިވެރިޔާ ހަލީމަތު ލަމްހާ އަބްދުލްރަހްމާންގެ މައްޗަށް އުފުލާފައިވެ އެވެ. މި ތިން މީހުން ވެސް ދިޔައީ އައިޖީއެމްއެޗްގައި ނަރުހެއްގެ ވަޒީފާ އަދާ ކުރަމުންނެވެ.
ދެ ފަރާތުން ހުށަހަޅާ ހެކި ހާމަކުރަން މިއަދު ބޭއްވި އަޑުއެހުމުގައި ދައުލަތުގެ ވަކީލް ވިދާޅުވި ގޮތުގައި މާވިންއަށް އުފުލާފައިވާ ދައުވާ ސާބިތު ކުރަން ހުށަހެޅި ޖުމުލަ 110 ހެކީގެ ތެރޭގައި ހިމެނެނީ 74 ޝަފައީ ހެކިންނާއި 36 ކިތާބީ ހެއްކެވެ.
ކިތާބީ ހެކިތަކުގެ ތެރޭގައި ދައުލަތުން ހުށަހަޅާފައިވާ ހެކީގެ ތެރޭގައި މިހާތަނަށް ނުލިބި އޮތީ އެންމެ ލިޔެކިޔުމެއް ކަމަށް ދައުލަތުގެ ވަކީލް ވިދާޅުވި އެވެ. އެއީ ހެކި ލިސްޓުގެ 105 ނަންބަރުގައި އޮތް، މޭރީ އާއި މާވިންގެ ދަރިފުޅު އޮލިވާ ގްރޭސްގެ ސައިކޮލޮޖިކަލް އެސަސްމަންޓް ރިޕޯޓް އެވެ.
އޮލިވާ ގްރޭސްގެ ސައިކޮލޮޖިކަލް އެސަސްމަންޓް ރިޕޯޓް ލަސްވެގެން ދަނީ ފިލިޕީންސް އިން އެ ރިޕޯޓް ތައްޔާރު ކުރާތީ ކަމުގައި ދައުލަތުން ވިދާޅުވި އެވެ. މަރުގެ އެ ހާދިސާއަށް ފަހު، އާއިލާގެ އެހެން މީހުނާއެކު އޮލިވާ ފިލިޕީންސްއަށް ދިޔައީ އެވެ.
މީގެ ކުރިން ވެސް އެ ލިޔެކިއުން ނުލިބޭކަން ދައުލަތުން ފާހަގަ ކުރެއްވުމުން، މައްސަލަ ބައްލަވާ ގާޒީ ހުސައިން ފާއިޒް ރަޝާދު ވަނީ އިބްތިދާއީ މަރުހަލާ ނިމެންދެކަށް އެ ލިޔެކިއުން ހުށަހަޅަން ފުރުސަތު ދެއްވައިފަ އެވެ. ގާޒީގެ އެ ނިންމެވުން މިއަދު ވެސް ވަނީ ދަމަހައްޓަވައިފަ އެވެ.
މިއަދުގެ އަޑުއެހުމަށް ދިފާއީ ހެކި ހާމަކުރަން އޮތް ނަމަވެސް ހެކި ހާމައެއް ނުކުރެ އެވެ. ދިފާއީ ވަކީލް އިސްމާއީލް މުހައްމަދު އެދިވަޑައިގަތީ އިތުރު ފުރުސަތެއް ދެއްވުމަށެވެ. އޭނާ ވިދާޅުވި ގޮތުގައި، މާވިންއަކީ އެހެން ގައުމެއްގެ މީހަކަށް ވާތީ މުއާމަލާތް ކުރުމުގައި ވެސް ދަތިކަމެއް ހުރި ކަމަށެވެ.
ދިފާއީ ހެކި ހުށަހަޅަން އުތުރު ފުރުސަތެއް ދޭން ދައުލަތުން ދެކޮޅު ހެދި އެވެ. ދައުލަތުގެ ވަކީލް ވިދާޅުވި ގޮތުގައި ދައުލަތުގެ ހެކިތަކާއި ދިފާއީ ހެކިތައް އެއް މަޖިލީހެއްގައި އިއްވުމަށް ޝަރީއަތް ކުރުމާ ބެހޭ ޖިނާއީ އިޖުރާއަތުގެ ގަވާއިދުގައި ބަޔާންކޮށްފައި އޮންނާތީ ދެން އިތުރު ފުރުސަތެއް ދެވިގެން ނުވާނެ އެވެ.
ނަމަވެސް ގާޒީ ފާއިޒް ވަނީ އިތުރު ހަތް ދުވަހުގެ ފުރުސަތެއް ދިފާއަށް ދެއްވައިފަ އެވެ. އޭގެ އިތުރަށް މިއަދަށް ދިފާއީ ހެކި ހާމަނުކުރެވުނު ސަބަބު ތަފްސީލްކޮށް ބަޔާންކޮށް ލިޔުމުން ކޯޓަށް ހުށަހަޅުއްވަން ވެސް ގާޒީ އެންގެވި އެވެ. އަދި އެއީ ދެވޭނެ އެންމެ ފަހު ފުރުސަތު ކަމުގައި ވިދާޅުވި އެވެ.
މާވިންއާ ދެކޮޅަށް 110 ހެކި ހުށަހެޅިއިރު މިއީ މި މައްސަލާގައި ދެން ދައުވާ އުފުލާފައިވާ ލަމްހާއާ ދެކޮޅަށް ވެސް ދައުލަތުން ހުށަހެޅި 110 ހެއްކެވެ. ދެ މީހުންގެ މައްސަލަ އަދި ވަކިވަކިން ގެންދިޔައަސް ޝަރީއަތުގެ މަރުހަލާ ގެންދާނީ އެކުގައި ކަމަށް ގާޒީ ފާއިޒް ކުރިން ވިދާޅުވެފައިވެ އެވެ.
މައްސަލައިގެ ފަސްފަހަތް
މޭރީ ގްރޭސް އަކީ އައިޖީއެމްއެޗްގެ ޑައިލެސިސް ޑިޕާޓްމެންޓްގެ ނަރުހެކެވެ. އޭނާގެ ފިރިމީހާ މާވިންއާއި ލަމްހާއަކީ ކެޝުއަލްޓީގައި މަސައްކަތް ކުރާ ނަރުހުންނެވެ. މޭރީގެ ހަށިގަނޑު ޕޯސްޓްމޯޓަމް ހެދި އިރު މޭރީ މަރުވެފައި ވަނީ ބޮލަށް ދީފައިވާ ބޮޑު އަނިޔާއަކުން ކަން ރިޕޯޓުން ވަނީ ދައްކައިފަ އެވެ.
މިދިޔަ އަހަރުގެ އޮކްޓޯބަރު މަހުގެ 19 ވަނަ ދުވަހު މޭރީ މަރުވެގެން ފުލުހަށް ރިޕޯޓް ކުރީ ވެސް މާވިން އެވެ. މާވިން ރިޕޯޓް ކުރީ މޭރީ ދަންޖެހިގެން މަރުވެފައި ހުއްޓައި ފެނިގެން ކަމުގަ އެވެ. ނަމަވެސް ޝައްކު ކުރެވޭ ބައެއް ކަންކަން ހުރުމާއެކު މައްސަލައިގެ ތަހުގީގު އެ ހިސާބުން ފެށި އެވެ.
ދަންޖެހިގެން މަރުވި ކަމަށް ބުނެ ރިޕޯޓް ކުރިޔަސް ތުހުމަތު ކުރެވޭ ކަންކަން ހުރުމުން ފުލުހުން ތަހުގީގު ހިންގުމަށް ފަހު މާވިން ހައްޔަރު ކުރީ އޮކްޓޯބަރު 27 ގަ އެވެ. އޭގެ ފަހުން ލަމްހާ ހައްޔަރު ކުރީ އޭގެ 50 ދުވަސް ފަހުން ޑިސެމްބަރު 16 ގަ އެވެ.
މާވިންގެ މައްޗަށް މަރުގެ ދައުވާ އުފުލާފައިވާއިރު، ލަމްހާގެ މައްޗަށް މަރުގައި ބައިވެރިވުމުގެ ދައުވާގެ އިތުރަށް އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތެއްގައި ބާރު ހިންގުމުގެ ދައުވާ އާއި ހުއްދަ ނަގައިގެން ކުރަން ޖެހޭ ކަމެއް ހުއްދަ ނުނަގާ ކުރުމުގެ ދައުވާ އުފުލާފައިވެ އެވެ. އެއީ އައިޖީއެމްއެޗުން ހުއްދަ ނުނަގާ، ނުރައްކާތެރި ބައެއް ބޭސްތަކެއް ނެގި ކަމުގެ ތުހުމަތުގަ އެވެ.
