މިހާރު ކުރިއަށްދާ މޯލްޑިވްސް ޕްރޯ ޓްރަޔަލްސްގެ ޖޫނިއާ މެންސް އާއި މެންސް އޯޕަން ކެޓަގަރީގެ ކުއާޓާ ފައިނަލް ހީޓްތައް ނިމި ސެމީ ފައިނަލަށް ތައްޔާރުވެފައިވާއިރު، މުބާރާތް ފޯރިގަދަވެއްޖެ އެވެ.
ޖޫނިއާ މެންސް ސެމީ ފައިނަލުން ފުރުސަތު ހޯދާފައިވަނީ މުހައްމަދު ކައިފް، އިބްރާހިމް އަތޫފް، އިޔަން އަހުމަދު އަދި އަބްދުﷲ ޝިމާލް ޝަމީމް (ޝިމައްލެ) އެވެ. ޝިމާލް އަކީ އެންމެ ފަހުން ބޭއްވި އެމްޓީސީސީ ބުރުނު ޝިކާރު ބޮޑީބޯޑިން ޗެލެންޖްގެ ޖޫނިއާ މެންސް ކެޓަގަރީގެ ޗެމްޕިއަނެވެ. ސެމީ ފައިނަލްގެ ހީޓް އެކެއްގައި ވާދަކުރަނީ އަތޫފާއި ކައިފް އެވެ. އަދި ދެ ވަނަ ހީޓުގައި ޝިމައްލެ އާއި އިޔަން ވާދަކުރާނެ އެވެ.
މެންސް އޯޕަން ސެމީ ފައިނަލްގައި ވާދަކުރަނީ މުހައްމަދު ވިއާމް އާއި އަލީ ޖާވިދު (ޖާއްޓެ)ގެ އިތުރުން ރާއްޖޭގެ އެއް ވަނަ ބޮޑީބޯޑަރުގެ މަގާމު އެންމެ ފަހުން ވެސް ހޯދި އަލީ ހުޝްރުވާން އަހުމަދު (ކުޑަ އައްޔަ) އަދި މުހައްމަދު ޖަރީޝް ޖިހާދު އެވެ.
ކުއާޓާ ފައިނަލްގެ ހީޓް ހަތަރެއްގައި ކުޑަ އައްޔަ ވަނީ އަހުމަދު ނަޒްމީން ބަލިކޮށްފަ އެވެ. ކުޑައައްޔަ ވަނީ 14.17 ޕޮއިންޓް ސްކޯ ކޮށްފަ އެވެ. މިއީ މުބާރާތުގެ އެއް ހީޓްގެ އެންމެ ރަނގަޅު ސްކޯ އެވެ. ނަޒްމީނަށް އެ ހީޓުގައި ކުރެވުނީ 9.10 ޕޮއިންޓެވެ. ކުއާޓާ ފައިނަލްގެ ހީޓް ދޭއްގައި ޖާއްޓެ މޮޅުވީ 13.27 ޕޮއިންޓު ސްކޯ ކޮށްގެންނެވެ. އޭނާއާ ވާދަކުރި މޫސާ މުހައްމަދު އަށް ސްކޯ ކުރެވުނީ 5.53 ޕޮއިންޓެވެ.
ޑްރޮޕް ނީ ކެޓަގަރީ މިހާރު ގޮސްފައިވަނީ ކުއާޓާ ފައިނަލާ ހަމައަށެވެ. ކުއާޓާ ފައިނަލްގައި ދެ ހީޓެއް ހިމެނޭއިރު، ފުރަތަމަ ހީޓުގައި ވާދަކުރަނީ ޝިމައްލެ، ވިއާމް އަދި ރީޝާން އެވެ. އަދި ހީޓު ދޭއްގައި ވާދަކުރަނީ ކުޑަ އައްޔަ، ދާއޫދު ފަޒީހު އަދި ހައްސާން މުހައްމަދު އެވެ.
އަންނަ މަހު ފަހުކޮޅު ރާއްޖޭގައި ހޯސްޓްކުރާ މޯލްޑިވްސް ޕްރޯ އިން އައިބީސީން ދޭ ވައިލްޑްކާޑް ސްލޮޓްގައި ރާއްޖޭން ވާދަކުރާނީ ސީނިއާ ޑިވިޝަނުގައި ދެ ބޮޑީބޯޑަރުންނާއި ޖޫނިއާ މެންސް ޑިވިޝަންގައި ދެ ބޮޑީބޯޑަރުންނާއި ޓްރަޔަލްސް އިން ކުރިހޯދާ ޑްރޮޕްނީ ކެޓަގަރީގެ ދެ ބޮޑީބޯޑަރުންނަށެވެ.
ހުނަރުހުރި ލެވަލާއި މުބާރާތުގައި ވާދަކުރަން އަންނަ ދުނިޔޭގެ އެންމެ ވަރުގަދަ ބޮޑީބޯޑަރުންގެ ލެވަލަށް ބަލާފައި، ވައިލްޑްކާޑް އެންޓްރީއެއް ދިނުމުގެ ބަދަލުގައި، ވިމެންސް ޑިވިޝަނުން ވައިލްޑް ކާޑްގެ ބަދަލުގައި އެމްބީބީއޭ އިން ދޭނީ ފްރީ ޕާސް އެވެ. ޕްރީ ޕާސް ދިނުމަށް ހަމަޖެހިފައިވަނީ މެންސް އޯޕަން ކެޓަގަރީ އާއި ޖޫނިއާ މެންސް ކެޓަގަރީން ހަތަރު ޖާގަ، ވިމެންސް އޯޕަން ޑިވިޝަން އަދި ޑްރޮޕްނީ ޑިވިޝަން، ކޮންމެ ޑިވިޝަނަކުން ދެ ޖާގަ އެވެ.
މޯލްޑިވްސް ޕްރޯ ޓްރަޔަލްސް އަކީ ހަމައެކަނި އަންނަ މަހު މާލޭގައި ހޯސްޓްކުރާ މަތީ ފެންވަރުގެ އިންޓަނޭޝަނަލް މުބާރާތް، އައިބީސީ މޯލްޑިވްސް ޕްރޯ އިން ލިބޭ ޖާގަ ވުރެ، މާ މުހިންމު ފުރުސަތެއް ވެސް ފަހިވެފައި އޮތް އިވެންޓެެކެވެ. ޓްރަޔަލްސްގައި ބައިވެރިވެ، ބޮޑީބޯޑަރުން ހޯދާ މާކްސް މި އަހަރު މުޅިން އަލަށް ފެށި މޯލްޑިވްސް ބޮޑީބޯޑިން ލީގަށް ގުނާނެ އެވެ. އަދި މި ޓްރަޔަލްސް އަށް ފަހު މި އަހަރުގެ ނިޔަލަށް ގައުމީ ސީނިއާ އަދި ޖޫނިއާ ސްކޮޑު ވެސް ނަގާނެ އެވެ.
