މިއުނިކް (ޖޫން 22) - ލިވަޕޫލް ދޫކޮށް ސެނެގާލްގެ ފޯވާޑް، ސަޑިއޯ މާނޭ ޖަރުމަނުގެ ޗެމްޕިއަން ބަޔާން މިއުނިކަށް ސޮއިކޮށްފި އެވެ.
މާނޭ، 30، ބަޔާނަށް މިއަދު ރަސްމީކޮށް ބަދަލުވީ 2025 ވަނަ އަހަރުގެ ޖޫން މަހުގެ ނިޔަލަށް ހަދާފައިވާ ކޮންޓްރެކްޓަކަށެވެ. އޭނާ ލިވަޕޫލް ދޫކޮށްލިއިރު، އެ ޓީމާ އެކު ހަދާފައިވާ އެއްބަސްވުމުގައި ބާކީ އޮތީ އެންމެ އަހަރަކެވެ. ބަޔާނުން މާނޭގެ ޑީލް ނިންމީ ޖުމްލަ އެކު ލިވަޕޫލަށް 43 މިލިއަން ޑޮލަރު ދައްކާ ގޮތަށެވެ.
ލިވަޕޫލާ އެކު އާ އެއްބަސްވުމެއް ހަދަން މާނޭ ބޭނުންވީ ހަފްތާ އަކު 440,000 ޑޮލަރު ލިބޭ ގޮތަށް ހަތަރު އަހަރުގެ ކޮންޓްރެކްޓެއް ހެދުމަށެވެ. އެ ހުށަހެޅުމާ އެއްގޮތަށް ލިވަޕޫލުން ކުރިއަށް ނުދެ އެވެ. ބަޔާނުން މާނޭގެ ސޮއި ހޯދީ ވެސް ހަފްތާ އަކު 440،000 ޑޮލަރު ލިބޭ ކޮންޓްރެކްޓެއްގަ އެވެ. އެކަމަކު، ބަޔާނުން މާނޭ ގެންދިޔައީ ތިން އަހަރުގެ ކޮންޓްރެކްޓެއްގައި، ދެ ފަރާތް އެއްބަސްވާނަމަ އިތުރު އެއް އަހަރަށް އާ ކުރެވޭ ގޮތަށެވެ.
ބަޔާނަށް ސޮއިކުރުމަށް ފަހު މާނޭ އެ ޓީމުގެ ޖޯޒީ ދައްކާލަނީ.--- ފޮޓޯ: ބަޔާން
ބަޔާނަށް ބަދަލުވުމަށް ފަހު ދިން އިންޓަވިއުގައި މާނޭ ބުނީ އޭނާ އަށް އެހެން ކްލަބްތަކެއްގެ ހުށަހެޅުން ލިބިފައިވަނިކޮށް ބަޔާނާ ގުޅެން ނިންމީ މާ ބޮޑަށް ވިސްނަން ނުޖެހުނު ކަމަށެވެ.
"ބަޔާނަކީ ކޮން ފެންވަރެއްގެ ޓީމެއްކަން އަހަންނަށް ކުރިން ވެސް އެނގޭ. އެހެންވީމަ، ބަޔާން ކަހަލަ ދުނިޔޭގެ މެދުގައި ވެސް މަޝްހޫރު ކްލަބަކަށް ބަދަލުވާން މާ ބޮޑަށް ވިސްނަން ނުޖެހުނު. ބަޔާނާ އެކު ގިނަ ކާމިޔާބީތަކެއް ހޯދަން ބޭނުން، މިއީ މި ޗެލެންޖް ނަގަން އެންމެ ރަނގަޅު ވަގުުތު،" ބަޔާންގެ ރަސްމީ މީޑިއާ ޗެނަލަށް ދިން އިންޓަވިއުގައި މާނޭ ބުންޏެވެ.
ސައުތެމްޓަން ދޫކޮށް 41 މިލިއަން ޑޮލަރުގެ ފީ އަކަށް 2016 ވަނަ އަހަރު ލިވަޕޫލަށް ބަދަލުވި މާނޭ ވަނީ އެ ޓީމަށް، ޖުމްލަ ހަ ސީޒަނުގައި ކުޅެދިން 269 މެޗުން 120 ގޯލުޖަހައި 38 ގޯލު ޖަހަން ފުރުސަތު ތަނަވަސްކޮށްދީފަ އެވެ. ލިވަޕޫލާ އެކު އިނގިރޭސި ޕްރިމިއާ ލީގާއި ޗެމްޕިއަންސް ލީގާއި ޔުއެފާ ސުޕަ ކަޕާއި ކްލަބް ވޯލްޑް ކަޕާއި އިނގިރޭސި އެފްއޭ ކަޕް އަދި އިނގިރޭސި ލީގު ކަޕްގެ ޗެމްޕިއަންކަން ހޯދި އެވެ.
މި އަހަރަކީ މާނޭ އަށް ގައުމީ ޓީމުގެ ލެވަލްގައި ވެސް ކާމިޔާބު އަހަރެކެވެ. އެ ގޮތުން އޭނާ ވަނީ މިދިޔަ ފެބްރުއަރީ މަހު ނިމުނު އެފްރިކަން ކަޕް އޮފް ނޭޝަންސްގެ ޗެމްޕިއަންކަން ސެނެގާލަށް ހޯދައިދޭން އިސް ރޯލެއް ކުޅެފަ އެވެ. އަދި ގަތަރުގައި މި އަހަރު ފަހުކޮޅު ބާއްވާ ފީފާ ވޯލްޑް ކަޕުން ސެނެގާލަށް ފުރުސަތު ހޯދައިދިނުމުގައި މާނޭ ވަނީ މުހިއްމު ގޯލުތަކެއް ޖަހައިދީފަ އެވެ.
