ލަންދޫގައި ދެ ރުއް ދޭތެރޭ ތާށިވެ، މީހަކު މަރުވެއްޖެ

ނ. ލަންދޫއިން އެ އަތޮޅު ރިސޯޓަކަށް ގެންދަން، ލޭންޑިން ކްރާފްޓަކަށް ރުއްތަކެއް އެރުވުމުގެ ތެރޭގައި ދެ ރުއް ދޭތެރޭ ފިތިގެން މީހަކު މަރުވެއްޖެ އެވެ.

ފުލުހުން ބުނީ އެހާދިސާގައި މަރުވީ ބަންގްލަދޭޝްގެ އުމުރުން 53 އަހަރުގެ މީހެއް ކަމަށެވެ. އެހާދިސާގެ މައުލޫމާތު ފުލުހުންނަށް ލިބުނީ މިއަދު ހަވީރު 4:15 އެހާކަށް ހާއިރު ކަމަށާއި، ދެ ރުއް ދޭތެރޭ ފިތުނު މީހާ ލަންދޫ ސިއްހީ މަރުކަަޒަށް ގެންދިޔަ އިރު ވެސް މަރުވެފައިވާ ކަމަށް ސިއްހީ މަރުކަޒުން މައުލޫމާތު ދިން ކަމަށް ވެސް ފުލުހުން ބުންޏެވެ.

އެ ހާދިސާގެ އިތުރު ތަފްސީލެއް އަދި ނުލިބެ އެވެ.

ލަންދޫގައި މިފަދަ ހާދިސާއެއް ހިނގިއިރު މިދިޔަ މަހުގެ ތެރޭގައި ބިއްލޫރި ޝީޓުތަކެއް ދަށުގެ ހިނގި ވަކި ދެ ހާދިސާއެއްގައި ވެސް ދެ ބިދޭސީއަކު ވަނީ މަރުވެފަ އެވެ. އަދި އިތުރު މީހެއްގެ ހާލު ވަރަށް ސީރިއަސްވި އެވެ.