ލަންޑަން (ޖޫން 17) - ލިވަޕޫލްގެ ފޯވާޑް ސަޑިއޯ މާނޭ ޖަރުމަނުގެ ޗެމްޕިއަން ބަޔާން މިއުނިކަށް ވިއްކާލަން ނިންމައިފި އެވެ.
މާނޭ، 30، ވަނީ މިދިޔަ ސީޒަނަށް ފަހު، ލިވަޕޫލް ދޫކޮށްލަން ބޭނުންވާކަން ކްލަބަށް އަންގައިފަ އެވެ. ލިވަޕޫލުން މާނޭގެ އެދުމާ އެއްގޮތަށް ކުރިއަށްދާން ނިންމީ މިދިޔަ އަހަރުން ފެށިގެން މާނޭ ލައްވައި އާ ކޮންޓްރެކްޓެއްގައި ސޮއިކުރަން ކުރި މަސައްކަތް ކާމިޔާބުނުވުމުންނެވެ.
އަންނަ އަހަރު ޖޫންގެ ނިޔަލަށް ކޮންޓްރެކްޓްގައި ހުރި މާނޭ ބޭނުންވީ ހަފްތާ އަކު 440,000 ޑޮލަރު ލިބޭ ގޮތަށް ލިވަޕޫލާ އެކު ހަތަރު އަހަރުގެ ކޮންޓްރެކްޓެއް ހެދުމަށެވެ. އެ ހުށަހެޅުމާ އެއްގޮތަށް ލިވަޕޫލުން ކުރިއަށް ނުދެ އެވެ. ލިވަޕޫލްގެ މިސްރު ފޯވާޑް މުހައްމަދު ސަލާހު ވެސް ވަނީ 480،000 ޑޮލަރު ހަފްތާ އަކު ލިބޭ ގޮތަށް ކޮންޓްރެކްޓް އާ ކުރަން ލިވަޕޫލަށް ހުށަހަޅައިފަ އެވެ. އެކަމަކު، އަންނަ ސީޒަނުގެ ނިޔަަލަށް ކޮންޓްރެކްޓްގައި ހުރި ސަލާހާ އެކު ލިވަޕޫލުން އަންނަނީ މަޝްވަރާތަކެއް ބާއްވަމުންނެވެ.
ލިވަޕޫލަށް ހަތް އަހަރު ކުޅެދިން މާނޭ ހޯދަން ބަޔާނުން ފުރަތަމަ ހުށަހެޅި ދެ ބިޑް ވެސް ލިވަޕޫލުން ވަނީ އަނބުރާ ފޮނުވާލައިފަ އެވެ. އެއީ ބަޔާނުން ފުރަތަމަ ހުށަހެޅީ ޖުމްލަ އެކު 35 މިލިއަން ޑޮލަރާއި 40 މިލިއަން ޑޮލަރު ލިބޭ ބިޑެއް ކަމަށްވާތީ އެވެ. އެކަމަކު، ބަޔާންގެ ތިން ވަނަ ހުށަހެޅުން ކަމަށްވާ، ޖުމްލަ އެކު، 52 މިލިއަން ޑޮލަރުގެ ޑީލަށް ލިވަޕޫލުން އެއްބަސްވީ އެވެ.
"ޑީލް ނިމިއްޖެ، ސަޑިއޯ (މާނޭ) ބަޔާނާ ގުޅޭނެ،" ބަޔާންގެ ސްޕޯޓިން ޑިރެކްޓަރު ހަސަން ސަލިހަމްދްޒިޗް ބުންޏެވެ.
ސައުތެމްޓަން ދޫކޮށް 41 މިލިއަން ޑޮލަރުގެ ފީ އަކަށް 2016 ވަނަ އަހަރު ލިވަޕޫލަށް ބަދަލުވި މާނޭ ވަނީ އެ ޓީމަށް ކުޅެދިން 269 މެޗުން 120 ގޯލުޖަހައި 38 ގޯލު ޖަހަން ފުރުސަތު ތަނަވަސްކޮށްދީފަ އެވެ. ލިވަޕޫލާ އެކު އިނގިރޭސި ޕްރިމިއާ ލީގާއި ޗެމްޕިއަންސް ލީގާއި ޔުއެފާ ސުޕަ ކަޕާއި ކްލަބް ވޯލްޑް ކަޕާއި އިނގިރޭސި އެފްއޭ ކަޕް އަދި އިނގިރޭސި ލީގު ކަޕްގެ ޗެމްޕިއަންކަން ހޯދި އެވެ.
މާނޭ، ކްލަބް ދޫކޮށްލާނެކަން އެނގޭތީ ލިވަޕޫލުން ވަނީ ބެންފީކާ އަށް ކުޅެމުން އައި އުރުގުއޭގެ ފޯވާޑް ޑާވިން ނޫނޭޒް ސޮއިކޮށްފަ އެވެ.
މި އަހަރަކީ މާނޭ އަށް ގައުމީ ޓީމުގެ ލެވަލްގައި ވެސް ކާމިޔާބު އަހަރެކެވެ. އެ ގޮތުން އޭނާ ވަނީ މިދިޔަ ފެބްރުއަރީ މަހު ނިމުނު އެފްރިކަން ކަޕް އޮފް ނޭޝަންސްގެ ޗެމްޕިއަންކަން ސެނެގާލަށް ހޯދައިދޭން އިސް ރޯލެއް ކުޅެފަ އެވެ. އަދި ގަތަރުގައި މި އަހަރު ފަހުކޮޅު ބާއްވާ ފީފާ ވޯލްޑް ކަޕުން ސެނެގާލަށް ފުރުސަތު ހޯދައިދިނުމުގައި މާނޭ ވަނީ މުހިއްމު ގޯލުތަކެއް ޖަހައިދީފަ އެވެ.
ބަޔާނުން މާނޭ ގަންނަން ކުރާ މަސައްކަތަށް މަގުފަހިކުރުމުގެ ގޮތުން އެ ޓީމަށް ކުޅެމުން އައި އޮސްޓްރިއާގެ މިޑްފީލްޑަރު މާސެލް ސަބިޓްޒާ ވިއްކާލާނެ ކަަމަށް ޖަރުމަނުގެ ނޫސްތަކުން ވަނީ ރިޕޯޓްކޮށްފަ އެވެ.
