މިއުނިކް (ޖޫން 16) - ލިވަޕޫލްގެ ފޯވާޑް ސަޑިއޯ މާނޭ ގަންނަން ކުރާ މަސައްކަތުގައި ބަޔާން މިއުނިކުން އެ ޓީމަށް ކުޅޭ އޮސްޓްރިއާގެ މިޑްފީލްޑަރު މާސެލް ސަބިޓްޒާ ވިއްކާލަން ނިންމާފައިވާ ކަމަށް މީޑިއާ ރިޕޯޓްތައް ބުނެފި އެވެ.
ސެނެގާލް ގައުމީ ޓީމުގެ ތަރި، މާނޭ، 30، ހޯދަން ބަޔާނުން ކުރި ދެ ބިޑެއް ލިވަޕޫލުން ވަނީ އަނބުރާ ފޮނުވާލައިފަ އެވެ. ލިވަޕޫލުން މާނޭ ވިއްކާލަން ކިޔާ އަގު އުޅެނީ 45 މިލިއަން ޑޮލަރުގަ އެވެ. ބަޔާނުން އެންމެ ބޮޑަށް ވެސް ހުށަހަޅަން މި ވަގުތު ތައްޔާރަށް އޮތީ 35 މިލިއަން ޑޮލަރު ކަމަށް ޖަރުމަނުގެ ބިލްޑް ނޫހުން ރިޕޯޓްކުރެ އެވެ.
މާނޭ ވަނީ ބަޔާނަށް ތިން އަހަރުގެ ކޮންޓްރެކްޓެއްގައި ބަދަލުވާން އެއްބަސްވެފަ އެވެ. އެކަމަކު، އެ ޑީލް ކުރިއަށް ދެވޭނީ ލިވަޕޫލާއި ބަޔާނުން މާނޭގެ ޓްރާންސްފާ ފީއަކާ މެދު އެއްބަސްވެގެންނެވެ. ލިވަޕޫލުން ޖުމްލަ އެކު 105 މިލިއަން ޑޮލަރު ދައްކާގޮތަށް ބެންފީކާ އަށް ކުޅެމުން އައި އުރުގުއޭގެ ފޯވާޑް ޑާވިން ނޫނޭޒް ގަތުމާ އެކު، މާނޭ ވިއްކާލާނެކަން ވަނީ ޔަގީންވެފަ އެވެ.
ޖަރުމަނުގެ ނޫސްތަކުން ރިޕޯޓްކުރާގޮތުގައި މާނޭ ހޯދަން ލިވަޕޫލުން ކިޔާ އަގު ހޯދަން ބަޔާނުން އެ ޓީމަށް ކުޅޭ ސަބިޓްޒާ ދޫކޮށްލަން އޮތީ ތައްޔާރަށެވެ. މިދިޔަ ސީޒަނުގައި އާރްބީ ލައިޕްޒިގު ދޫކޮށް ސަބިޓްޒާ ބަޔާނަށް ބަދަލުވީ 18 މިލިއަން ޑޮލަރަށެވެ. އެކަމަކު، ބަޔާނުގެ ފުރަތަމަ އެގާރައިން ސަބިޓްޒާ އަށް ފުރުސަތު ނުލިބޭތީ އޭނާ ވަނީ ކަންބޮޑުވުން ފާޅުކޮށްފަ އެވެ.
ސަބިޓްޒާ، 28، ހޯދަން އިނގިރޭސި ޕްރިމިއާ ލީގުގެ އާސެނަލާއި ޓޮޓެންހަމް ހޮޓްސްޕާސް އިން ވަނީ ޝައުގުވެރިކަން ފާޅުކޮށްފަ އެވެ. އޭގެ އިތުރުން އިޓަލީގެ އޭއެސް ރޯމާ އާއި ސްޕެއިނުގެ ވިޔަރެއާލާއި ސެވިއްޔާ އިން ވެސް ސަބިޓްޒާ އަށް ބިޑްކުރުން އެކަށީގެންވެ އެވެ. ޖަރުމަނުގެ ބިލްޑުން ރިޕޯޓްކުރާ ގޮތުގައި ސަބިޓްޒާ ވިއްކާލަން ބަޔާނުން ކިޔާ އަގު އުޅެނީ 20-30 މިލިއަން ޑޮލަރާ ދެމެދުގަ އެވެ.
