ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން ބޮމުގެ ހަމަލާއެއް ދިން މައްސަލައިގެ ޝަރީއަތުން ތަނާޒުލްވި ގާޒީ އާދަމް މުހައްމަދަށް އިންޒާރު ދިން މީހާ ޓެގް އަޅުވައި މޮނިޓާ ކުރަން އެމްޑީޕީން ގޮވާލައިފި އެވެ.
ގާޒީ އާދަމަށް އިންޒާރު ދިނީ އެ މައްސަލާގައި ދައުވާ އުފުލާފައިވާ މ. ކުދެހިގެ އިސްހާގުގެ ދަރިފުޅު މުހައްމަދު އިއުފާފު އިސްހާގެވެ. ގާޒީ އާދަމާއި އޭނާގެ އާއިލާއަށް އޭނާ މަރުގެ އިންޒާރު ދިނީ ބްލޮގާ ޔާމީން ރަޝީދު މަރާލި މައްސަލައިގެ ޝަރީއަތަކާ ގުޅިގެނެވެ. އެ މައްސަލާގައި ދައުވާ އުފުލުނު މ. ކުދެހިގެ ހަސަން ޝިފާޒްއަކީ އިއުފާފުގެ ބޮޑުބެއެކެވެ.
އެމްޑީޕީން ނެރުނު ބަޔާނެއްގައި ބުނީ "ގާޒީއަށް ތަނާޒުލުވެވަޑައިގަންނަވާން ޖެހިވަޑައިގަތީ، ތުހުމަތުކުރެވޭ އިސްހާގުގެ ދަރި އަދިވެސް ދޫވެފައި ހުރުމުން ކަމުގައި ވުމަކީ، މި ޕާޓީން ކުށްވެރިކުރާ ކަމެއް" ކަމަށެވެ.
ބިރު ދެއްކުމުގެ މައްސަލައަށް ހަ މަހަށް ވުރެ ގިނަ ދުވަސްވެފައިވާއިރު ތަންފީޒީ އިދާރާތަކުން މި މައްސަލަ ބަލައި ވީހާވެސް އަވަހަށް ދައުވާ ކުރަން ފޮނުވުމަށް އެމްޑީޕީން ގޮވާލާފައިވެ އެވެ. އަދި އަމަލު ހިންގި ފަރާތް، ޓެގް އަޅުވައި މޮނިޓާ ކުރަން ވެސް އެމްޑީޕީން ގޮވާލާފައިވެ އެވެ.
މީގެ އިތުރަަށް ވީހާވެސް އަވަހަށް މެއި ހައެއް ހަމަލާގެ ޝަރީއަތް ބައްލަވާ ގާޒީންގެ ބެންޗު އެކުލަވާލައި ކައިރިކައިރީ ގިނަ އަޑުއެހުންތަކެއް ބާއްވައިގެން މައްސަލަ ކުރިއަށް ގެންގޮސް އިންސާފުވެރިކަމާއެކު ނިންމައިލަން ވެސް އެމްޑީޕީން ގޮވާލާފައިވެ އެވެ.
ގާޒީ އާދަމަށް އިންކާރު ދިން މީހުންގެ ތެރޭގައި އިސްހާގުގެ ދަރިއެއް ހުރިކަން އެނގުނީ ވެސް އެ ކަން ފާހަގަކޮށް އިސްހާގުގެ ފަރާތުން ކޯޓަށް ސިޓީއެއް ފޮނުވުމުންނެވެ. ގާޒީއަށް އިންޒާރު ދިން މައްސަލަ ގެންދަނީ ތަހުގީގުކުރަމުންނެވެ.
ބްލޮގާ ޔާމީން ރަޝީދު މަރާލި މައްސަލާގައި ދައުވާ އުފުލާފައިވާ ހަސަން ޝިފާޒްގެ މައްޗަށް ދަށު ކޯޓުގައި ދައުވާ ސާބިތުވެފައެއް ނުވެ އެވެ. އެ މައްސަލާގައި ދޫވި ބައެއް މީހުންގެ މައްސަލަ ހައިކޯޓަށް ހުށަހެޅި ނަމަވެސް ޝިފާޒްގެ މައްސަލަ ދައުލަތުން އިސްތިއުނާފް ކޮށްފައެއް ވެސް ނުވެ އެވެ.
