ލުޒޭން، ސްވިޒަލެންޑް (ޖޫން 8) - ހަ އަހަރަށް ދިގު ދެމިގެންދިޔަ ތަހުގީގަކަށް ފަހު، ފީފާގެ ކުރީގެ ރައީސް ޖޯސެޕް ބްލެޓާ އާއި ޔުއޭފާގެ ކުރީގެ ރައީސް މިޝޭލް ޕްލެޓިނީގެ މައްޗަށް ތުހުމަތުކުރެވިފައިވާ ކޮރަޕްޝަނާއި މަކަރާއި ހީލަތުގެ މައްސަލައިގައި ޝަރީއަތް މިއަދު ފަށައިފި އެވެ.
ބްލެޓާ ،86، އަދި ޕްލެޓިނީ ،66،ގެ ޝަރީއަތް މިއަދު ފަށަނީ ސްވިޓްޒަލޭންޑްގެ ސިޓީއެއް ކަމަށްވާ ބެލިންޒޯނާ ފެޑެރަލް ކްރިމިނަލް ކޯޓުގަ އެވެ. ބްލެޓާ އާއި ޕްލެޓިނީގެ މައްޗަށް ކުރެވޭ ކޮރަޕްޝަނާއި މަކަރާއި ހީލަތުގެ މައްސަލައިގެ ބޮޑު ތަހުގީގު ފެށީ 2015 ވަނަ އަހަރެވެ. މި ތަހުގީގު ހަ އަހަރަށް ދިގު ދެމިގެންދިޔަ އެވެ.
ކުރިން ފުޓްބޯޅައިގައި ނުފޫޒު ގަދަ ދެ ފަރާތް ކަމަށްވާ ބްލެޓާ އާއި ޕްލެޓިނީއާ ދެކޮޅަށް ދައުވާ ކުރަނީ 2011 ވަނަ އަހަރު، އޭރު ޔުއެފާގެ ރައީސްގެ މަގާމުގައި ހުރި ޕްލެޓިނީ އަށް، އޭރު ފީފާގެ ރައީސްގެ މަގާމުގައި ހުރި ބްލެޓާ ދިން ދެ މިލިއަން ޑޮލަރުގެ މައްސަލައިގަ އެވެ.
ސްވިޓްޒަލޭންޑްގެ އެޓާނީ ޖެނެރަލްގެ އޮފީސް (އޯއޭޖީ) އިން އުލުފާފައިވާ ދައުވާގައި ބުނެފައިވާ ގޮތުގައި، މި ޕޭމަންޓް ޕްލެޓިނީ އަށް ދީފައިވަނީ ގަވައިދާ ހިލާފަށް، ފީފާ އަށް ގެއްލުންވާ ގޮތަށެވެ.
މި ތުހުމަތުތައް ބްލެޓާ އާއި ޕްލެޓިނީ ވަނީ ދޮގުކޮށްފަ އެވެ. ޕްލެޓިނީ އަށް ދިން ފައިސާ އަކީ، އޭނާ ފީފާގެ އެޑްވައިޒަރެއްގެ ގޮތުގައި ކޮށްދީފައިވާ މަސައްކަތަށް ދިން ޕޭމަންޓެއް ކަމަށް ބްލެޓާ ވަނީ ބުނެފަ އެވެ.
ފީފާގެ އެޑްވައިޒަރެއްގެ ގޮތުގައި 1998 އިން 2002 ވަނަ އަހަރާ ހަމައަށް، ކޮށްފައިވާ މަސައްކަތަށް ފީފާ އިން ދޭންޖެހޭ ފައިސާގެ އިންވޮއިސްއެއް ޕްލެޓިނީ ވަނީ 2011 ވަނަ އަހަރު ހުށަހަޅައިފަ އެވެ. އެކަމަކު، އެއީ ފޯޖްކޮށްފައިވާ އިންވޮއިސްއެއް ކަމަށް ވަނީ ތުހުމަތުކޮށްފަ އެވެ.
ދެ ހަފުތާގެ މުއްދަތަކަށް ކުރިއަށްދާނެ ޝަރީއަތް ނިމޭނީ ޖޫން 22ގަ އެވެ. އަދި މައްސަލަ ބަލާ ތިން ފަނޑިޔާރުން، ހުކުމް އިއްވާނީ އަންނަ މަހުގެ އަށް ވަނަ ދުވަހު އެވެ. މި މައްސަލަ ބްލެޓާ އާއި ޕްލެޓިނީގެ މައްޗަށް ސާބިތުވެއްޖެނަމަ، ފަސް އަހަރުގެ ޖަލު ހުކުމެއް ނުވަތަ ޖޫރިމަނާއެއް އައިސްދާނެ އެވެ.
މި މައްސަލަ ފެންމަތިވުމާއެކު، ބްލެޓާ އާއި ޕްލަޓިނީ ވެސް ވަނީ ފުޓްބޯޅައިގެ ހުރިހާ ހަރަކާތްތަކުން ސަސްޕެންޑްކޮށްފަ އެވެ. -- އޭއެފްޕީ
