އެމްޑީޕީގެ މެމްބަރުންގެ ތެރެއިން އިލެކްޝަންސް ކޮމިޝަނުގައި، އެޕާޓީގެ މެމްބަރުންގެ ގޮތުގައި ދަފްތަރުކޮށްފައި ނުވާ މެމްބަރުން، އެ މަރުހަލާ ފުރިހަމަ ކުރަން ތިން މަސްދުވަހުގެ މުހުލަތެއް ދީފައި ވާތީ ރައްޔިތުންގެ މަޖިލީހުގެ ބައެއް މެމްބަރުން މިއަދު ކަންބޮޑުވުން ފާޅުކުރައްވައިފި އެވެ.
ރައްޔިތުންގެ މަޖިލީހުގައި މިހާރު ކުރިއަށްދާ ޖަލްސާއަށް، ވެލިދޫ ދާއިރާގެ އެމްޑީޕީ މެމްބަރު މުހައްމަދު އަބްދުﷲ ޝަފީގު ހުށަހެޅުއްވި މައްސަލައިގެ ބަހުސްގައި ބައެއް މެމްބަރުން ވިދާޅުވީ އެމްޑީޕީގެ ގައުމީ މަޖިލީހުގެ ނިންމުން މުރާޖައާ ކުރަން ޖެހޭ ކަމަށެވެ.
ބިލެއްދޫ ދާއިރާގެ އެމްޑީޕީ މެމްބަރު އަހުމަދު ހަލީމް (ދޮންބިލަތް ހަލީމް) ވިދާޅުވީ އެމްޑީޕީގެ ގައުމީ މަޖިލީހުގެ ނިންމުމުގެ ނަތީޖާއަކަށް ވާނީ 100 ދުވަހުގެ ތެރޭގައި އެޕާޓީގެ އެތައް ހާސް މެމްބަރުން ޕާޓީން ވަކިވުން ކަމަށެވެ.
"އެއީކީ ވާނެ ކަމެއް ނޫން، ތިރީސް ނުވަހާސް މެމްބަރުން، 100 ދުވަސް ތެރޭގައި، އިލެކްޝަންސްގައި އެ އޮންނަ ގަވައިދާ އެއްގޮތަށް އަޅުގަނޑުމެނަަށް، ފިންގަޕްރިންޓް ޖަހާފައި އެމީހުން އަނބުރާ ރަޖިސްޓްރީކުރުމަކީ އެއީ އެއްގޮތަކަށް ވެސް ކުރެވޭނެ ކަމެއް ނޫން،" ހަލީމް ވިދާޅުވި އެވެ.
އޭނާ ވިދާޅުވީ ގައުމީ މަޖިލީހުގެ އެ ނިންމުން ތަންފީޒުކުރުމުގެ މާނައަކީ އެމްޑީޕީއަށް 39،000 މެމްބަރުން ގެއްލުން ކަމަށެވެ.
"ދާއިރުގައި އެ ދަނީ ޕާޓީ އުފައްދަން އެންމެ ފުރަތަމަ މަސައްކަތްކުރި ،އޭގެ ތެރެއިން އެންމެ މުހިންމުކޮށް މަސައްކަތް ކުރި އަޅުގަނޑުމެންގެ ވަރަށް ރަނގަޅު، މިޕާޓީއަށް އިހުލާސްތެރި މެމްބަރުން،" ހަލީމް ވިދާޅުވި އެވެ.
މިލަންދޫ ދާއިރާގެ މެމްބަރު އަލީ ރިޒާ ވިދާޅުވީ އެމްޑީޕީގެ ގައުމީ މަޖިލީހުގެ ޖަލްސާގައި އޭނާ ވޯޓު ދެއްވީ ޕާޓީން ބަޔަކު ވަކިކުރާ ގޮތަށް ނިންމާކަށް ނޫން ކަމަށެވެ. އޭގެ ބަދަލުގައި ވޯޓު ދެއްވީ އީސީގެ ދަފްތަރުގައި ނެތް މެމްބަރުން އެ ދަފްތަރުގައި ޖެއްސުމުގެ މަސައްކަތް ކުރަން ކަމަށް އޭނާ ވިދާޅުވި އެވެެ.
"އެރޭގެ އެ ބައްދަލުވުމުގައި އަޅުގަނޑު ހިތުން އަޅުގަނޑަށް ވޯޓު ދެވުނީ އިލެކްޝަންސް ކޮމިޝަނުގެ ދަފްތަރުން ވަކިވެފައި ތިބި ތިރީސް ނުވަ ހާހަށް ވުރެ ގިނަ މެމްބަރުން، ކުރިއަށް އޮތް ސަތޭކަ ދުވަހުގެ ތެރޭގައި ، އިލެކްޝަންސް ކޮމިޝަނުގެ އެ އޮންނަ ގާނޫނީ ހަމަތަކުގެ މަތިން އެމްޑީޕީއަށް އަލުން އަނބުރާ ރަޖިސްޓާކުރަން،" ރިޒާ ވިދާޅުވި އެވެ.
ރިޒާ ވިދާޅުވި ގޮތުގައި އޭނާ ހިމެނިވަޑައިގަންނަވާ ގޮތުން މިލަންދޫ ދާއިރާގެ 600 އަށް ވުރެ ގިނަ މީހުން، އެމްޑީޕީގެ މެމްބަރުންގެ ގޮތުގައި އީސީގެ ދަފްތަރުގައި ނެތް ކަމަށެވެ. އެކަމަކު އެ މެމްބަރުން އީސީގެ ދަފްތަރުގައި ޖެއްސުމުގެ ކަންތައް މުހުލަތުގެ ތެރޭގައި ނިންމާނެ ކަމަށް ވެސް އޭނާ ވިދާޅުވި އެވެ.
މައްސަލައަކީ ކޮބާ؟
މަޖިލީހުގައި އެމްޑީޕީ ތަމްސީލުކުރާ މެމްބަރުން ވެސް ތިބޭ އެ ޕާޓީގެ ގައުމީ މަޖިލީހުން މިދިޔަ މަހު ނިންމާފައިވަނީ ޕާޓީގެ މެމްބަރުންގެ ދަފްތަރު އިލެކްޝަންސް ކޮމިޝަނުގެ ދަފްތަރާ އެއްގޮތް ކުރުމަށެވެ.
އެމްޑީޕީން ލަފާކުރާ ގޮތުގައި ގާތްގަނޑަކަށް 30،000 އަށް ވުރެ ގިނަ މެމްބަރުން ވަނީ އެ ޕާޓީގެ ދަފްތަރުން ވަކިވެފަ އެވެ.
މުހިންމު ނިންމުތަކެއް ނިންމަންޖެހޭ ކޮންގްރެސް އަންނަ އޯގަސްޓުމަހުގެ 19އަށް ތާވަލުކޮށްފައިވާއިރު، އެމްޑީޕީގެ މެމްބަރުންގެ ގޮތުގައި އީސީގެ ދަފްތަރުގައި ޖެހިފައިނުވާ މީހުން، އެ ދަފްތަރުގައި ޖެހެން ތިން މަސްދުވަސް ދޭން ގައުމީ މަޖިލީހުން ވަނީ ނިންމައިފަ އެވެ.
ނަމަވެސް، ކޮންގްރެސްގައި ބައިވެރިވެވޭނީ ފުރަތަމަ 30 ދުވަހުގެ ތެރޭގައި އެ ދަފްތަރުގައި ޖެހޭ މީހުންނަށެވެ.
އެ ހުށަހެޅުން މެއި 30 ގައި ގައުމީ މަޖިލީހުން ފާސްކޮށްފައިވަނީ އެ ބައްދަލުވުމުގައި ބައިވެރިވި 90 މެމްބަރުންގެ ތެރެއިން 70 މެމްބަރުންގެ ވޯޓާއެކު އެވެ.
ދަފްތަރު އެއްގޮތް ކުރާއިރު، އެންމެ ކުރީއްސުރެ އެމްޑީޕީގެ މެމްބަރުންގެ ގޮތުގައި ތިބި މީހުން އަލުން ދަފްތަރުގައި ޖެހެން ނުޖެހޭ ގޮތަށް އެ ރޭގެ ބައްދަލުވުމަށް ހުށަހެޅުނެވެ. ނަމަވެސް، އޭގެ ކުރިން ހުށަހެޅުން ފާސްވުމުން، މި ހުށަހެޅުމަށް ވޯޓަކަށް ނާހަ އެވެ.
