މީހުންގެ ރުހުމާ ނުލައި ސިޔާސީ ޕާޓިތަކަށް ވެއްދުމާއި ވަކިކުރުމުގެ ކަންތައް ތަކުރާރުވާތީ އެކަމާ ކަންބޮޑުވުން ފާޅުކޮށް ރައްޔިތުންގެ މަޖިލީހަށް މިއަދު މައްސަލައެއް ހުށަހަޅައިފި އެވެ.
ރައްޔިތުންގެ މަޖިލީހުގެ ވެލިދޫ ދާއިރާގެ އެމްޑީޕީ މެމްބަރު މުހައްމަދު އަބްދުﷲ ޝަފީގު (މޯޑް) މިއަދު ހުށަހެޅުއްވި މައްސަލައިގައި ވިދާޅުވީ ގާނޫނާ ހިލާފަށް ޕާޓީތަކަށް މީހުން ވައްދާތީ، ޕާޓީއެއްގެ ދަފުތަރުގައި ޖެހެން ބޭނުން ނުވާ ރައްޔިތުންގެ ޝަކުވާތައް އިތުރުވެފައިވާ ކަމަށެވެ. ޕާޓީތަކަށް އެގޮތަށް މީހުން ވެއްދުމަކީ ޕާޓީ ނިޒާމަށް މީހުން ކުރާ އިތުބާރު ކުޑަވެ، މީހުންނަށް އުނދަގޫތައް ކުރިމަތިވާ ކަމަށް ވެސް މައްސަލަ ހުށަހަޅުއްވަމުން އޭނާ ވިދާޅުވި އެވެ.
މީހުންނަށް ނޭނގި ޕާޓިތަކަށް ވެއްދުމާއި ވަކިކުރުމުގެ މައްސަލައިގައި އިލެކްޝަންސް ކޮމިޝަނުން އަމަލުކުރަމުން އަންނަ ގޮތާ މެދު ވެސް އޭނާ ކަންބޮޑުވުން ފާޅުކުރެއްވި އެވެ.
އެ މައްސަލަ މަޖިލީހަށް ބަލައިގަތީ ވޯޓުގައި ބައިވެރިވެވަޑައިގެންނެވި 40 މެމްބަރުންގެ އިއްތިފާގުންނެވެ.
އެ މައްސަލައަށް މިއަދު ކުރި ބަހުސްގައި މެމްބަރުން ވިދާޅުވީ އޮޅުވާލައިގެން ޕާޓީތަކަށް ވައްދާފައިވާ މީހުންނަށް އެމީހުންގެ ހައްގު ހޯދައިދޭން މަސައްކަތް ކުރަން ޖެހޭ ކަމަށެވެ.
މީހުންނަށް ނޭނގި ސިޔާސީ ޕާޓީތަކަށް ވެއްދުމުގެ މައްސަލަ އަށް ސަަމާލުކަން ލިބުނީ ވެރިިކަން ކުރާ ކޯލިޝަނުގެ މައިޕާޓީ އެމްޑީޕީގެ މެމްބަރުންގެ ދަފުތަރު އިލެކްޝަންސް ކޮމިޝަނުގައި އޮންނަ، ސިޔާސީ ޕާޓީތަކުގެ ދަފްތަރާ އެއްގޮތް ކުރުމުގެ މަސައްކަތް ފެށި ހިސާބުންނެވެ. އެމްޑީޕީގެ ގައުމީ މަޖިލީހުން ނިންމާފައި ވަނީ އެޕާޓީގެ ދަފްތަރާއި އީސީގެ ދަފްތަރު އެއްގޮތް ކުރުމުގެ މަސައްކަތް ތިން މަސްދުވަހުގެ ތެރޭގައި ނިންމާށެވެ.
އެމްޑީޕީގެ ގައުމީ މަޖިލީހުން އެގޮތަށް ނިންމުމުން މެމްބަޝިޕް އޮތީ ކޮންޕާޓީއެއްގައި ތޯ ގިނަ ބަޔަކު ބެލި އިރު އެމްޑީޕީގެ ޕީޖީ ގްރޫޕްގެ ބައެއް މެމްބަރުން ވެސް އީސީގައި، އެޕާޓީގެ މެމްބަރުންގެ ގޮތުގައި ދަފްތަރުކޮށްފައެއް ނެތެވެ.
މަޖިލީހަށް މިއަދު މައްސަލަ ހުށަހެޅުއްވި، ވެލިދޫ ދާއިރާގެ މެމްބަރު މުހައްމަދު އަބްދުﷲ ޝަފީގުގެ މަންމައާއި ބައްޕަ އަށް ނޭނގި އަދާލަތު ޕާޓީއަށް ވައްދާފައިވާ މައްސަލަ އޭނާ ވަނީ އީސީއަށް ހުށަހަޅުއްވައިފަ އެވެ.
މައްސަލަ ހައްލުކުރަން އީސީގެ ފިޔަވަޅުތަކެއް
ރާއްޖޭގައި ހިންގާ ސިޔާސީ ޕާޓީތަކުން މެމްބަރުން އިތުރުކުރަން ސައްހަ ނޫން ފޯމު ހުށަހަޅާ މައްސަލަ ބޮޑުވެފައިވާއިރު، އެ ގޮތަށް ހުށަހަޅާ ސައްހަ ނޫން ފޯމުތަކަށް ބޮޑު ޖޫރިމަނާއެއް ކުރަން އިލެކްޝަންސް ކޮމިޝަން (އީސީ)އިން ވަނީ ނިންމައިފަ އެވެ.
މިގޮތުން، ޕާޓީ އަކުން ހުށަހަޅާފައިވާ ސައްހަ ނޫން ކޮންމެ ފޯމަކަށް، ޕާޓީ 10،000ރ. އިން ޖޫރިމަނާ ކުރުމުގެ އިތުރުން ޕާޓީން ހުށަހަޅާ ސައްހަ ނޫން ކޮންމެ ފޯމަކަށް ޕާޓީގެ ރަޖިސްޓްރާ ވެސް ޖޫރިމަނާ ކުރަން ނިންމާފައިވެ އެވެ.
ޕާޓީގެ ރަޖިސްޓްރާ ފުރަތަމަ ފަހަރު 5،000ރ. އިން އަދި އޭގެ ފަހުން 10،000ރ.އިން ޖޫރިމަނާކުރާނެ އެވެ.
އެ ފިޔަވަޅު އަޅާނީ މިދިޔަ އޭޕްރީލް މަހުގެ އެއް ވަނަ ދުވަހުން ފެށިގެން ހުށަހަޅާފައިވާ ފޯމުތަކަށް ކަމަށް ވެސް އީސީން ވަނީ ބުނެފަ އެވެ.
ނަމަވެސް، ސައްހަ ނޫން ފޯމު ހުށަހަޅާ މައްސަލަ، ޕާޓީތަކަށް އަދަބު ދީގެން ނުހުއްޓުވޭނެ ކަމަށް ޕާޓީތަކުން އަންނަނީ ބުނަމުންނެވެ.
